Óeirðir í Venesúela

Óeirðir brutust út í Caracas, höfuðborg Venesúela í gær, eftir að ljóst varð að forseti landsins, Hugo Chaves, bar sigur úr bítum í kosningu um hvort reka ætti hann úr embætti. Svo virðist sem bæði andstæðingar og stuðningsmenn Chaves hafi gengið berserksgang í sumum hverfum borgarinnar í gær, og féllu nokkrir í átökum. Chaves sjálfur er kampakátur með úrslitin og segir þau stuðning við fátækrabyltinguna sem hann hefur staðið fyrir. Hann vill þó setjast niður með andstæðingum sínum og leita sátta.