Mikilvægar kosningar í Venesúela

Íbúar í Venesúela greiddu í dag atkvæði um hvort reka ætti forseta landsins úr embætti. Niðurstaðna er beðið með eftirvæntingu þar sem þær gætu haft víðtæk áhrif, meðal annars hér á landi. Hugo Chaves hefur verið umdeildur í embætti frá því að hann settist á forsetastól í Venesúela árið 1998. Undanfarin tvö ár hafa blóðug átök staðið um forsetann sem vonir standa til að ljúki með atkvæðagreiðslunni. Margir óttast þó að svo verði ekki, einkum ef Chaves tapar og véfengir kosninguna. Sjálfur hefur hann ýjað að því að tap gæti fallið í grýttan jarðveg meðal stuðningsmanna í hernum og olíuiðnaði og að þeir myndu hugsanlega ekki sætta sig við annan forseta. Chaves hét því í kosningabaráttu sinni árið 1998 að berjast gegn spillingu og fátækt. Frá því að hann tók við embætti hefur hann lagt stóran hluta olíuauðs landsins í að niðurgreiða heilbrigðisþjónustu, menntun og ýmis konar félagsþjónustu fyrir fátæka. Þetta hefur tryggt honum vinsældir meðal hluta þjóðfélagsins en andstæðingar hans eru honum æfir fyrir að hafa sóað olíuauð í kolröng verkefni sem þeir segja fyrst og fremst þjóna tilgangi Chaves. Úrslita kosninganna er beðið með mikilli eftirvæntingu, ekki síst í ljósi þess að Venesúela er fimmti stærsti olíuframleiðandi heims. Óreiða og upplausn í landinu yrði til þess að olíuverð á heimsmarkaði hækkaði enn frekar en það var einmitt einkum ótti við hugsanlega óöld í landinu sem varð til þess að verð á olíufati á heimsmarkaði hækkaði á föstudaginn upp í fjörutíu og sex dollara, sem er hæsta verð sem mælst hefur. Afleiðingar frekari hækkunar gætu orðið mjög alvarlegar fyrir efnahagslíf víða um heim, þar með talið hér á landi. Á myndinni sést Hugo Chaves greiða atkvæði sitt í kosningunum í dag.