Auglýst eftir hirðfífli

Opinber stofnun í Bretlandi, sem hefur varðveislu staða með menningarsögulegt gildi á sinni könnu, hefur auglýst eftir starfskrafti í stöðu hirðfífls ensku krúnunnar. Ekkert hirðfífl hefur verið starfandi í Bretlandi í rúmlega 350 ár. Í starfslýsingunni kemur fram að æskilegt sé að umsækjandi sé glaðvær og eigi eigin búning með bjöllum, en hið opinbera býðst til að skaffa veldissprota. Staða hirðfífls var sett af þegar Karl fyrsti var tekinn af lífi árið 1649 og Oliver Cromwell komst til valda. Konungsveldið var endurreist áratug seinna en ekki hirðfíflsembættið.