Hóta blóðbaði í Evrópu

Samtök sem sögð eru tengjast Al-Qaida hafa hótað að standa fyrir blóðbaði í Evrópu á næstunni. Í yfirlýsingu samtakanna, sem birtist á Netinu í dag eru Evrópuríki fordæmd fyrir að hafa ekki dregið herlið sín heim frá Írak og Afghanistan. Osama Bin Laden gerði  Evrópuríkjum tilboð um frið þann 15. apríl síðastliðinn gegn því að evrópsk herlið yrðu flutt heim frá Írak og Afghanistan innan þriggja mánaða. Þessir þrír mánuðir eru nú liðnir og í yfirlýsingu sem birtist á Netinu í dag undir nafni Abu Hafs al-Masri herdeildanna, sem lýstu yfir ábyrgð á sprengjutilræðunum í Madrid í vetur, er blóðugu stríði lýst á hendur Evrópubúum og sagt að árásum muni ekki linna fyrr en ríki Evrópu sjái að sér og dragi herlið sín heim. Evrópskum borgum verði eytt og byrjað verði á Ítalíu og Silvio Berlusconi, sem samtökin sendu einnig hótun í síðustu viku. Ýmsir hryðjuverkasérfræðingar hafa lýst því yfir að ekki beri að taka hótanir frá Abu Hafs al-Masri herdeildunum alvarlega og að þær tengist ekki samtökum Al-Qaida nema að mjög takmörkuðu leyti. Hvað sem hótunum líður hafa samtökin áður lýst yfir ábyrgð á atvikum sem þau hafa ekki tengst, svo sem víðtæku rafmagnsleysi í Bandaríkjunum og Bretlandi í fyrra.