Móna Lísa forrík, fimm barna móðir

Fyrirsætan Mona Lisa, sem prýðir samnefnt málverk Leónardós Da Vincis, var forrík, fimm barna móðir. Breska dagblaðið, The Daily Telegraph, greinir frá því í dag að ítalskur sérfræðingur hafi fundið sannanir fyrir raunverulegum bakgrunni Monu Lisu, en sumir hafa haldið því fram að hún hafi verið móðir Da Vincis, og aðrir hafa sagt hana vændiskonu frá Flórens. Sérfræðingurinn sem nú þykist vita betur, segir að hún hafi verið gift forríkum ítölskum viðskiptajöfur. Samkvæmt nýjum vísbendingum hét hún réttu nafni, Lisa Gherardini, og gekk að eiga Francesco del Giocondo árið 1495, en hann var vinur listamannsins Leonardos Da Vincis. Sérfræðingurinn sem telur sig geta sannað þetta, hefur eytt 25 árum í að leita vísbendinga og skoða gömul skjöl í Flórens, en bakgrunnur þessarar þekktustu konu heims hefur verið sagnfræðingum umhugsunarefni í 400 ár.