Borgin brýtur lög í skólaeldhúsum

Það er gríðarlegt ábyrgðarleysi af hálfu borgaryfirvalda að hafa ekki lærða matreiðslumenn starfandi í grunnskólaeldhúsum í Reykjavík að mati Níels Olgeirssonar, formanns Matvís - félags matvinnslumanna, og til þess má rekja bágt ástand þeirra. Samkvæmt úttekt á eldhúsum sem gerð var fyrir fræðsluráð Reykjavíkur er mörgu ábótavant í rekstri 23 eldhúsa af 34. Þau uppfylla meðal annars ekki kröfur um hollustuhætti og hagkvæmni í innkaupum. Níels segir að samkvæmt reglugerð frá Hollustuvernd eigi aðeins þeir að meðhöndla matvæli í mötuneytum sem hafa menntun til þess. Auk þess segi í iðnaðarlögum að enginn eigi að höndla með matvæli nema meistari, sveinn eða nemi. Þetta sé því lögvarin iðngrein og því telur Níels að Reykjavíkurborg sé að brjóta lög með framferði sínu. Hann heldur því einnig fram að heilbrigðisyfirvöld eigi að sjá til þess að fagmenntað fólk vinni þessi verk. "Gæði á mat og öryggi barnanna er meira eftir því sem menntun kokka er meiri því að matvæli eru viðkvæm vara," segir Níels. "Heilbrigðisyfirvöld eiga ekki að komast upp með það að labba inn í skólaeldhús, kíkja á matseðilinn, athuga hvort það séu vaskar á réttum stöðum, niðurföll, salerni og handlaugar fyrir starfsfólk en gera enga kröfu um menntun af þess hálfu." Þau sveitarfélög sem hafa ráðið menntaða matreiðslumenn til starfa í grunnskólum segja að það borgi sig þótt þeir séu dýrari starfskraftur þar sem þeir spari margfalt á við ófaglærða með hagkvæmari innkaupum og betri matreiðslu. Ófaglærðir matreiðslumenn í Reykjavík fá greitt samkvæmt töxtum Starfsmannafélags Reykjavíkur sem eru lægri en taxtar í Matvís. Júlíus Sigurbjörnsson, deildarstjóri rekstrardeildar Fræðslumiðstöðvar Reykjavíkur, segir að borgin hafi ekki getað ráðið faglært fólk inn í grunnskólana þar sem hörgull sé á því. Hann vildi ekki ræða úttektina sem gerð var á grunnskólaeldhúsum í borginni þar sem hún væri nýkomin inn á borð fræðsluráðs.