Stuldur á við kostnað menntakerfis

Skattsvikarar stela jafn miklu af samfélaginu á hverju ári og kostar reka allt skólakerfið á Íslandi. Skattsvikin eru talin nema allt að þrjátíu og fimm milljörðum. Jóhanna Sigurðardóttir alþingismaður fagnar tillögum starfshóps fjármálaráðherra sem vill stórefla skatteftirlit og veita eftirlitsmönnum auknar heimildir til að fylgjast með stórfyrirtækjum og afla upplýsinga um bankainnistæður og fjármagnsflutninga. Jóhanna segir tillögur starfshópsins róttækari en dæmi séu um hér á landi. Hún segir um miklar fjárhæðir að ræða, sem séu sambærilegar því sem það kosti að reka allt mennakerfið á Íslandi. Því sé eftir miklu að slægjast að ná þessum peningum til baka. Menn hafi fundið nýjar leiðir til skattsvika, sem verði að taka á. Einstaklingar og fyrirtæki nýta sér í auknum mæli svokallaða skattaparadís erlendis til að koma tekjum undan skatti. Þá kemur fram í skýrslu starfshópsins að hætta sé á því að menn misnoti heimild til að fresta því að greiða skatt af söluhagnaði af hlutabréfum með milligöngu eignarhaldsfélaga. Sem upplagt tilefni skattsvika er einnig nefnt að Ísland sé eitt örfárra landa sem ekki leggja skatt á vexti sem greiddir eru úr landi. Fyrirtæki setja upp eignarhaldskeðjur þar sem félag erlendis er látið lána hinum innlenda fé gegn háum vöxtum sem eru skattfrjálsir. Jóhanna Sigurðardóttir segir mikilvægt að efla skattaeftirlit og hún fagnar einkum tillögum starfshópsins um að sérstök deild innan skattkerfisins fylgist með stórfyrirtækjum. Hún nefnir til að mynda tillögu um að skattayfirvöld fái heimild til þess að skoða allar innistæður í bönkum, sem sé tillaga sem skattayfirvöld telji að verði að ná fram að ganga. Rúmlega tuttugu þúsund einkahlutafélög er að finna á Íslandi en þeim hefur fjölgað um 7000 á fjórum árum. Algeng aðferð við skattsvik er að færa alla sína einkaneyslu á fyrirtæki eða félög og komast þannig hjá skattgreiðslum. Þá finnast þess einnig dæmi að hluti launa, til dæmis bónus eða kaupréttur, sé ekki gefin upp til skatts og hluthöfum veitt vaxtalaus lán sem ekki eru gerð upp. Jóhanna segir að skattaeftirlitið sé vanbúið eins og það er í dag. Reynslan kenni að hver starfsmaður til viðbótar margborgi sig. Hún segir nauðsynlegt að taka á þessu máli strax á vorþingi. Það sé ekki hægt að búa við það að almenningur greiði sína skatta, en í skattalögum séu glufur sem geri það að verkum að fyrirtæki og fjármagnseigendur geti greitt enn minna til samfélagsins.