Fólk verslar dýrari vöru

Kaupmenn búast við mun meiri jólaverslun í ár en fyrir síðustu jól. Emil B. Karlsson hjá Samtökum verslunar og þjónustu segir áberandi að fólk sé að kaupa dýrari gjafavöru en áður enda séu meiri peningar í umferð. Verslun jókst að jafnaði um 5% á mánuði á síðastliðnu ári og búist er við að söluaukning geti orðið um 20% í desember miðað við jólamánuðinn í fyrra. Emil B. Karlsson hjá Samtökum verslunar og þjónustu segir að fólk sé að kaupa dýrari hluti en áður. Þeir sem selji bifreiðar, raftæki og heimilistæki beri sig vel undan ástandinu. Emil segir athyglisvert að jólaverslunin sé jafn mikil og raum ber vitni þrátt fyrir að fréttir berist af verslunarferðum til Bandaríkjanna þar sem fólk sé að versla gríðarlega mikið. Hann segir aukinn kaupmátt og greiðari aðgang að lánsfé hugsanlega skýringu. Þorvaldur Þorvaldsson, verslunarstjóri ELKO, segir ljóst að fólk sé að kaupa dýrari hluti en áður, svo sem skjávarpar, myndavélasímar, heimabíókerfi og fleiri tæki. Þessi tæki hafi lækkað í verði og séu orðin viðráðanlegri fyrir fjölda fólks. Hann segist sjá þess merki að margir hafi meira fé milli handanna en áður og verð hluta skipti marga minna máli. Eggert Jóhannsson, feldskeri, segir að ástandið minni á það sem var fyrir um 4 árum, spenna sé mikil og fólk kaupi dýrari vöru en oft áður. Eggert segir að verslunin sé klárlega meiri en í fyrra en það komi ekki í ljós fyrr en skömmu fyrir jól hversu mikið meiri. Hann segir þó áberandi að það séu meiri peningar í umferð, ekki síst þar sem fólk sé nú að staðgreiða vörur í miklu meira mæli en áður. Þetta séu ekki greiðslukortajól heldur staðgreiðslujól. Hann segir fólk leyfa sér meira en áður, enda hafi það meira á milli handanna.