Endurgreiðslum TR að ljúka

Flestallir þeirra tæplega 24 þúsund lífeyrisþega sem áttu inneign hjá Tryggingastofnun ríkisins hafa nú fengið endurgreiðslu. Flestir lífeyrisþeganna sem áttu inneignir hjá TR eftir endurreikning bótaréttar fyrir árið 2003 fengu þær greiddar inn á reikninga í gær, en í einhverjum tilvikum verður hugsanlega lagt inn hjá lífeyrisþegum í dag. Alls fá tæplega 24 þúsund þeirra eingreiðslu núna fyrir jólin. Inneignir eru í flestum tilvikum innan við 50 þúsund krónur og hjá tæplega 8 þúsund lífeyrisþegum er þessi eingreiðsla undir 10 þúsund krónum. Að meðaltali eru greiðslur vegna vanreiknaðra bóta 44.209, að því er fram kemur í frétt frá TR. Ofgreiðslur tæplega 11 þúsund lífeyrisþega eru á hinn bóginn rúmlega 87 þúsund krónur að meðaltali. Ákvörðun hefur verði tekin um að fresta innheimtuaðgerðum fram í febrúar á næsta ári. Kröfur undir þremur þúsundum króna hafa verið felldar niður hjá tæplega 1200 lífeyrisþegum.