Tveir Íslendingar í Írak

Tveir Íslendingar fóru til Íraks fyrir mánuði til að sinna friðargæslustörfum á vegum bresks fyrirtækis. Báðir hafa starfað sem lögreglumenn og var annar þeirra nýlega sakfelldur fyrir brot í starfi. Utanríkisráðuneytið hefur engar upplýsingar um veru mannanna í Írak eða hvað þeir eru að gera. Fyrir mánuði héldu Þórjón Pétursson og Þórir Marínó Sigurðsson til Íraks til starfa. Samkvæmt heimildum fréttastofu sinna þeir þar friðargæslustörfum á vegum breskra aðila en ekki hafa fengist upplýsingar um hvers eðlis þau störf eru. Utanríkisráðuneytið hefur engar upplýsingar um veru mannanna í Írak og þar fengust þær upplýsingar í dag að enginn Íslendingur væri við störf í landinu á vegum opinberra aðila á borð við ráðuneytið, Rauða krossinn eða Sameinuðu þjóðirnar. Utanríkisráðuneytið ráðlagði Íslendingum að yfirgefa landið í mars í fyrra og voru þeir sem þar dvelja, eða aðstandendur þeirra, beðnir um að upplýsa ráðuneytið um dvalarstað, síma og fjölskylduhagi viðkomandi. Þessi tilkynning er enn í fullu gildi en rétt er að minna á að Ísland er á meðal helstu stuðningsþjóða við hernámið í Írak. Fjölskyldur beggja manna eru afar sparsamar á upplýsingar um veru og störf mannanna í Írak. Ættingjar Þóris hafa staðfest að hann er þar við störf en vilja ekki gefa frekari upplýsingar. Fréttamaður hefur sent Þóri rafpóst í tvígang og fengið svar frá honum jafnharðan. Hann greinir þar frá því að hann sé í tímabundnu leyfi frá lögreglunni og að erfitt sé að ná í hann í síma. Aðspurður um hvað hann sé að gera í Írak og hvar hann sé staddur svaraði Þórir: „Svar við spurningunni er því miður no comment. Get ekki tjáð mig.“ Þórjón og Þórir komust í sviðsljós samfélagsins í fyrra þegar þeir sem lögreglumenn voru ákærðir fyrir ólöglega handtöku, ranga skýrslugerð og brot í opinberu starfi. Þeir voru báðir fundnir sekir í Héraðsdómi en Hæstiréttur sýknaði Þóri í vor en dæmdi Þórjón í tveggja mánaða skilorðsbundið fangelsi. Vegna málaferlanna hafði báðum mönnunum verið vikið úr starfi og voru þeir launalausir um nokkurra mánaða skeið. Helgi Jóhannesson, lögmaður Þóris, sagði í samtali við fréttastofu að í kjölfar sýknudómsins hefði Þórir fengið uppgerð vangoldin laun. Hann hefði einnig farið fram á miskabætur en ríkislögmaður synjaði þeirri kröfu. Helgi segist reikna með að farið verði með þá kröfu fyrir dómstóla.