Fallbaráttuslag ÍBV og HK/Víkings frestað

Ekki verður af fyrirhuguðum fallbaráttuslag ÍBV og HK/Víkings í Pepsi-Max deild kvenna í dag en liðin áttu að mætast á Hásteinsvelli klukkan 14:00.

Veðurstofan varaði við stormi á höfuðborgarsvæðinu, suðurlandi og miðhálendi upp úr hádegi.



Í kjölfarið hefur verið tekin ákvörðun um að fresta leiknum en ekki er komin ný tímasetning á leikinn.

Um er að ræða gríðarlega þýðingarmikinn leik fyrir bæði lið sem eru í harðri baráttu í neðri hluta deildarinnar. HK/Víkingur er í neðsta sæti með 7 stig, fimm stigum minna en Eyjakonur sem eru í 8.sæti en í 9.sæti er Keflavík með 10 stig.