Micheal Ballack meiddist í vináttuleik í dag

Fyrirliði þýska landsliðsins Michael Ballack meiddist lítillega í vináttuleik fyrir HM. Leikurinn var gegn undir 18 ára liði Servette Geneva og endaði leikurinn með tólf mörkum gegn engu.

Pele hrifinn Gerrard

Goðsögnin frá Brasilíu sjálfur meistari Pele er mjög hrifinn af Steven Gerrard, fyrirliða Liverpool og landsliðsmanns Englands. Hann segist vildi óska þess að Gerrard væri Brassi.

Ajax ræða við Davids

Forráðamenn Ajax í Hollandi hafa talað við Edgar Davids um að koma og leika með þeim á næstu leiktíð. Leikmaðurinn spilaði með Tottenham í vetur en vill halda heim til Hollands eftir aðeins ársveru á Englandi.

Samningur Brown framlengdur hjá Cleveland

Forráðamenn Cleveland Cavaliers hafa ákveðið að Mike Brown verði áfram aðalþjálfari liðsins eftir að hann leiddi það til 50 sigra í deildarkeppninni og alla leið í oddaleik gegn Detroit Pistons í undanúrslitum Austurdeildarinnar á dögunum.

Santa Cruz tæpur

Roque Santa Cruz, framherji Bayern Munich, er tæpur fyrir fyrsta leik Paraguay á HM gegn Englendingum 10. Júní. Santa Cruz er með eymsli í hægra hné, en hann missti af meirihluta þýska keppnistímabilsins.

Finn enga pressu

Portúgalski landsliðsmaðurinn og leikmaður Manchester United, Cristiano Ronaldo, segist ekki finna fyrir neinni pressu þrátt fyrir þær kröfur sem þjóð hans setur á herðar hans. Þessi Portúgalski vængmaður sannaði mikilvægi sitt fyrir landsliðið í Evrópukeppninni fyrir tveimur árum en núna mun hann spila enn mikilvægara hlutverk fyrir landslið sitt í Þýskalandi.

Owen fyrirliði á móti Hvít-Rússum

Michael Owen verður fyrirliði Englands í æfingaleiknum á móti Hvít-Rússum á fimmtudaginn og Theo Walcott byrjar á bekknum. Owen og Crouch byrja í framlínunni á meðan Arsenal tvíeykið Ashley Cole og Sol Campell byrja í vörninni.

HM er í Sviss

Það líður að jólum, rétt rúmar tvær vikur í HM. Ég hef verið í sambandi við ágætan túlk í Munchen, Pablo Perez Torres, mann ættaðan frá heitu löndunum en hefur verið ráðinn sem þýðandi og þulur hjá þýska landsliðinu. Hann var á leið með þeim í æfingabúðir, á ónefndum stað, sennilega til Sviss þar sem helstu landsliðin eru að undirbúa sig undir keppnina. Þannig hefur brasilíska landsliðið lagt undir sig eitthvert smáþorp og selur grimmt inná æfingar liðsins, mér skilst að 5000 manns hafi borgað sig inn í gær, svona einsog á landsleik Íslands og Andorra í Laugardalnum.

Chimbonda segist vera á leið til Tottenham

Bakvörðurinn knái hjá Wigan, Pascal Chimbonda, segist viss um að hann muni ganga í raðir Tottenham í næstu viku. Wigan hefur þegar neitað þriggja milljón punda tilboði frá Tottenham í kappann og vill félagið fá meira en helmingi hærri upphæð fyrir hann.

Ronaldo segist verða klár fyrir fyrsta leik

Ronaldo leikmaður Brasilíu og Real Madrid, segist verða kominn í sama form og samherjar sínir í landsliði Brasilíu, á einni viku og að hann muni verða klár fyrir fyrsta leikinn gegn Króatíu 13, júní.

FH lagði ÍA

Íslandsmeistarar FH lögðu Skagamenn 2-1 í lokaleik dagsins í Landsbankadeild karla í knattspyrnu á heimavelli sínum í Kaplakrika. Sigurvin Ólafsson kom FH yfir í fyrri hálfleik, en Bjarni Guðjónsson jafnaði metin fyrir ÍA úr vítaspyrnu á 52. mínútu. Það var svo varamaðurinn Atli Guðnason sem tryggði heimamönnum sigurinn á 75. mínútu. Skagamenn eru því enn án stiga í deildinni, en Íslandsmeistararnir eru með fullt hús eftir þrjár umferðir.

Góður sigur Valsmanna í Eyjum

Valsmenn unnu í dag sinn fyrsta sigur í Landsbankadeildinni þetta sumarið þegar þeir lögðu Eyjamenn örugglega 3-0 í Vestmannaeyjum. Matthías Guðmundsson kom Val á bragðið með marki úr vítaspyrnu í fyrri hálfleik og Garðar Gunnlaugsson bætti svo við tveimur mörkum í síðari hálfleiknum.

Skagamenn búnir að jafna

Bjarni Guðjónsson var rétt í þessu að jafna leikinn fyrir ÍA gegn FH í 1-1 í Kaplakrika. Markið kom úr vítaspyrnu á 52. mínútu og skömmu síðar björguðu Skagamenn skoti FH á marklínu í annað sinn í leiknum, sem sýndur er beint á Sýn.

Englendingar töpuðu fyrir Hvít-Rússum

B-lið Englands gerði lítið til að hrífa landsliðsþjálfara sinn Sven-Göran Eriksson í dag þegar það tapaði 2-1 fyrir Hvít-Rússum í æfingaleik sem haldinn var í Reading. Rangstöðufnykur var af marki enska liðsins, sem var arfaslakt í leiknum og missti þar að auki markvörðinn Robert Green í meiðsli sem þýða að hann missir af HM.

Íslandsmeistararnir yfir í hálfleik

Íslandsmeistarar FH hafa yfir 1-0 í hálfleik gegn Skagamönnum í stórleik kvöldsins í Landsbankadeildinni. Það var Sigurvin Ólafsson sem skoraði markið sem skilur liðin að með glæsilegu skoti beint úr aukaspyrnu á 40. mínútu.

Fleiri forföll í enska landsliðshópnum

Það hefur heldur betur dregið til tíðinda í æfingalandsleik Englendinga og Hvít-Rússa sem fram fer í Reading í kvöld. Markvörðurinn Robert Green meiddist illa þegar hann tók útspark og Hvít-Rússarnir jöfnuðu metin í 1-1 í kjölfarið. Strax hefur fengist staðfest að Green getur ekki farið með Englendingum til Þýskalands og mun því Scott Carson taka stöðu hans í hópnum.

Valsmenn komnir í 2-0 í Eyjum

Valsmenn eru búnir að bæta við öðru marki sínu í Vestmannaeyjum og var þar að verki Garðar Gunnlaugsson strax í upphafi síðari hálfleiksins. Það er því útlit fyrir að Valur sé að krækja í sín fyrstu stig á Íslandsmótinu í sumar. Staðan í leik FH og ÍA í Hafnarfirði er enn 0-0, en sá leikur er sýndur í beinni á Sýn.

Valur yfir í hálfleik gegn ÍBV

Valsmenn hafa yfir 1-0 gegn ÍBV í Vestmannaeyjum þegar flautað hefur verið til leikhlés í viðureign liðanna í Landsbankadeild karla. Það var Matthías Guðmundsson sem skoraði markið á 18. mínútu þegar hann fylgdi eftir skoti sínu eftir fyrirgjöf Guðmundar Benediktssonar. Leikurinn hefur verið mjög fjörugur og eflaust eiga eftir að koma fleiri mörk í Eyjum í síðari hálfleik. Hægt er að fylgjast með gangi mála á Boltavaktinni hér á Vísi og þá er rétt að geta þess að leikur FH og ÍA er hafinn í beinni útsendingu á Sýn.

B-lið Englands yfir gegn Hvít-Rússum

Varalið Englendinga leikur æfingaleik við Hvít-Rússa í kvöld og hefur yfir 1-0 í hálfleik. Enska liðið getur þakkað fyrir að vera með forystu í leiknum eftir að rússneska liðið átti stangarskot undir lok hálfleiksins. Það var Jermaine Jenas sem kom enska liðinu yfir á 35. mínútu þegar hann fylgdi eftir skalla Michael Owen í þverslánna, en endursýning í sjónvarpi sýndi reyndar að Owen var rangstæður þegar hann skallaði knöttinn.

Bolton hækkar tilboð sitt í Johnson

Bolton gerði í dag 8,5 milljón punda tilboð í framherjann Andy Johnson hjá Crystal Palace og jafnaði þar með tilboð Wigan frá því fyrir skömmu. Bæði tilboð hafa verið samþykkt af hálfu Palace og nú er það Johnson sem velur til hvors liðsins hann vill fara í sumar.

Bell missir af næsta leik með Phoenix

Skotbakvörðurinn Raja Bell hjá Phoenix Suns verður ekki með liðinu í öðrum leik úrslitaeinvígisins við Dallas Mavericks eftir að hafa tognað illa í leik liðanna í nótt. Josh Howard hjá Dallas sneri sig á ökkla í byrjun leiksins og kom ekki meira við sögu eftir það, en um helmingslíkur eru taldar á að hann verði með í næsta leik.

Guðjón Þórðarson hættur hjá Notts County

Guðjón Þórðarson er hættur störfum hjá enska liðinu Notts County. Guðjón staðfesti þetta í samtali við Arnar Björnsson í íþróttafréttum NFS nú rétt eftir klukkan 18. Guðjón sagðist nokkrar mismunandi ástæður að baki ákvörðun sinni, en vildi ekki ræða þær nánar. Guðjón segist fjarri því að vera hættur að þjálfa og er nú á heimleið, þar sem hann mun fara yfir þá möguleika sem eru í stöðunni.

Morientes til Valencia

Spænski framherjinn Fernando Morientes hjá Liverpool gekk í dag í raðir Valencia í heimalandi sínu, en kaupverðið hefur ekki fengist uppgefið. Morientes náði sér aldrei á strik hjá enska liðinu á því ári sem hann var í herbúðum þess og skoraði aðeins 12 mörk í þeim 60 leikjum sem hann spilaði.

Maradona dreymir um að þjálfa Argentínu

Diego Maradona segir að hann dreymi um að þjálfa Argentínu í framtíðinni, og hann trúir því að Spánn og Argentína muni veita Brasilíu mestu keppnina í Heimsmeistaratitilinn.

Fyrsti sigur Víkings í höfn

Nýliðar Víkings unnu í dag sinn fyrsta sigur í Landsbankadeild karla þegar þeir burstuðu Breiðablik 4-1 í uppgjöri nýliðanna í deildinni. Heimamenn höfðu tögl og haldir í leiknum gegn slökum Blikum.

Larsson sagði nei við Celtic

Stjórnarformaður Glasgow Celtic segist hafa reynt að lokka sænska framherjann Henrik Larsson aftur til skoska liðsins á dögunum, en Larsson sagði þvert nei. Hann var ítrekað beðinn að framlengja dvöl sína hjá Evrópumeisturunum, en er harðákveðinn í að snúa aftur heim til Svíþjóðar og spila með gamla liðinu sínu Helsingborg.

Góður sigur á Norðmönnum

Átján ára karlalandslið íslands í körfubolta heldur uppteknum hætti á Norðurlandamótinu í körfubolta sem fram fer í Svíðþjóð og í dag vann liðið sannfærandi sigur á Norðmönnum 78-63. Hörður Vilhjálmsson lék vel fyrir íslenska liðið, skoraði 26 stig, hirti 7 fráköst og gaf 7 stoðsendingar. Sextán ára lið tapaði naumlega fyrir Finnum í opnunarleik sínum og mætir Svíum síðar í dag.

Fín byrjun hjá Birgi Leifi

Birgir Leifur Hafþórsson var í stuði á fyrsta keppnisdegi opna áskorendamótsins í Marokkó í Afríku í dag og lauk hann fyrsta hringnum á 67 höggum, eða 4 höggum undir pari. Hann er því á meðal efstu manna eftir fyrsta daginn.

Heiðar Davíð í góðum málum

Kylfingurinn Heiðar Davíð Bragason hélt áfram að leika vel á öðrum degi Kinnaborgmótsins í Svíðþjóð í dag og lauk hann keppni á tveimur höggum undir pari og er því samtals á þremur höggum undir pari. Heiðar var í efsta sæti mótsins þegar hann lauk keppni í dag.

Redknapp semur við Portsmouth

Knattspyrnustjórinn Harry Redknapp skrifaði í dag undir þriggja ára samning við úrvalsdeildarfélagið Portsmouth, en eldri samningur hans við félagið rann út í lok síðustu leiktíðar. Redknapp þótti standa sig vel eftir að hann tók við liðinu í annað sinn á ferlinum og undir hans stjórn slapp liðið við fall í 1. deildina með ótrúlegum hætti.

Víkingar í stuði

Víkingur hefur yfir 2-0 í hálfleik gegn Breiðablik í fyrsta leik dagsins í Landsbankadeild karla í knattspyrnu, en hér er um að ræða viðureign nýliðanna í deildinni. Heimamenn komust yfir á 18. mínútu þegar Viktor Bjarki Arnarsson skoraði úr vítaspyrnu og hann lagði svo upp annað markið fyrir félaga sinn Hörð Bjarnason með glæsilegum hætti á 31. mínútu.

Pires semur við Villarreal

Franski miðjumaðurinn Robert Pires hjá Arsenal hefur gert tveggja ára samning við spænska liðið Villarreal. Pires hefur verið hjá Arsenal í sex ár, en hann var með lausa samninga í sumar og komst ekki að samkomulagi við forráðamenn Arsenal um nýjan samning.

Englendingar fá frest til 30 maí vegna Rooney

Enska knattspyrnusambandið FA fær frest frá FIFA til 30 maí vegna Wayne Rooney, leikmanns Manchester United og enska landsliðsins fyrir HM. Eins og flestum er kunnugt þá er kappinn meiddur en gert er ráð fyrir því að hann verði leikfær þegar mótið er hafið í næsta mánuði.

Diaw tryggði Phoenix sigurinn í Dallas

Franski framherjinn Boris Diaw átti sinn besta ferlinum í nótt þegar Phoenix Suns gerði sér lítið fyrir og lagði Dallas Mavericks 121-118 á útivelli í fyrsta leik liðanna í úrslitaeinvígi Vesturdeildarinnar. Diaw skoraði 34 stig fyrir Phoenix og þar á meðal sigurkörfuna í blálokin.

Góður árangur hjá unglingaliðunum

Góður árangur náðist á Norðurlandamóti unglinga í körfubolta sem hófst í Svíþjóð í dag. Átján ára landslið pilta sigraði Svía 86-84, þar sem Hörður Vilhjálmsson skoraði 30 stig fyrir Íslenska liðið. Þá vann átján ára lið Íslands í kvennaflokki einnig sigur á því sænska 71-64 og þar var það hin magnaða Helena Sverrisdóttir sem fór á kostum og skoraði 35 stig.

Skýr skilaboð hjá eiganda Cleveland

Dan Gilbert, eigandi NBA-liðs Cleveland Cavaliers, hefur sent stuðningsmönnum liðsins skýr skilaboð fyrir framtíðina. Í gær keypti hann auglýsingar fyrir um 25.000 dollara í stærstu blöðunum í Ohio-fylki, þar sem hann þakkaði stuðningsmönnum liðsins fyrir árið og lét í það skína að nýr samningur við ofurstjörnuna LeBron James væri efst á forgangslista félagsins.

Cizmek byrjaður að æfa með KR

Króatíski miðjumaðurinn Mario Cizmek mætti í dag á sína fyrstu æfingu með liði KR í dag, en sá er fyrrum u-21 árs landsliðsmaður. Þetta kemur fram á heimasíðu KR í dag. Vonast KR-ingar til þess að hann verði kominn með leikheimild fyrir næsta leik liðsins í Landsbankadeildinni, sem er gegn Keflvíkingum á sunnudag.

Jafntefli í Grindavík

Grindvíkingar og Keflvíkingar gerðu í kvöld 1-1 jafntefli í síðari leik kvöldsins í Landsbankadeild karla í knattspyrnu. Jóhann Þórhallsson kom heimamönnum á bragðið á 33. mínútu, en Guðmundur Steinarsson jafnaði metin úr víti skömmu síðar.

Keane gæti spilað á næstu leiktíð

Michael Kennedy, umboðsmaður miðjumannsins Roy Keane hjá Glasgow Celtic, segir ekki loku fyrir það skotið að leikmaðurinn spili með liðinu á næstu leiktíð. Keane fer til sérfræðings þegar hann kemur heim úr sumarleyfi sínu á næstu vikum og þá verður líklega tekin ákvörðun um framhaldið. Talið er að það muni freista Keane að spila með liðinu í Meistaradeildinni á næstu leiktíð, en hann á sem kunnugt er eitt ár eftir af samningi sínum við meistarana.

KR lagði Fylki

KR lagði Fylki 1-0 á heimavelli sínum í Frostaskjóli í Landsbankadeild karla í knattspyrnu í kvöld. Það var varnarmaðurinn Tryggvi Bjarnason sem skoraði markið sem skildi liðina að í kvöld, en bæði lið fengu nokkur tækifæri til að bæta við mörkum í kvöld. Leikurinn var í raun lítið fyrir augað í rokinu, en KR-ingar þiggja eflaust stigin þrjú með bros á vör.

Jafnt í hálfleik í Grindavík

Nú er kominn hálfleikur í leik Grindavíkur og Keflvíkur í Landsbankadeild karla í knattspyrnu og staðan er jöfn 1-1. Jóhann Þórhallsson kom heimamönnum yfir á 33. mínútu, en hinn sólbrúni Guðmundur Steinarsson jafnaði metin aðeins fjórum mínútum síðar með marki úr vítaspyrnu. Grindvíkingar leika með sterkan vindinn í bakið í síðari hálfleiknum, en mjög hvasst er í Grindavík sem og annarsstaðar á suðvesturhorninu í kvöld.

Verðum að ræða við konuna hans Shevchenko

Úkraínski framherjinn Andriy Shevchenko tilkynnir forráðamönnum AC Milan á morgun hvort hann ætli sér að framlengja samning sinn við félagið eða ganga til liðs við Englandsmeistara Chelsea. Félagi hann Gennaro Gattuso ætlar að gera sitt til að reyna að sannfæra framherjann sterka um að vera áfram í Mílanó.

Keflvíkingar fljótir að jafna

Það tók Keflvíkinga ekki langan tíma að jafna metin í Grindavík, því aðeins fjórum mínútum eftir að heimamenn komust yfir í leiknum, hefur Guðmundur Steinarsson jafnað fyrir Keflavík úr vítaspyrnu - eftir klaufagang í vörn heimamanna.

Jóhann kemur Grindvíkingum yfir

Jóhann Þórhallsson hefur komið Grindvíkingum í 1-0 gegn grönnum sínum úr Keflavík í sjónvarpsleiknum á Sýn. Mark Jóhanns kom á 33. mínútu og bætti Jóhann þar með fyrir að hafa klúðrað vítaspyrnu í upphafi hálfleiksins. Þetta er fjórða mark Jóhanns í deildinni

KR yfir í hálfleik

KR-ingar hafa yfir 1-0 gegn Fylki í leik liðanna á KR-velli. Það var Tryggvi Bjarnason sem skoraði mark heimamanna á 28. mínútu, en eftir fjöruga byrjun, dró heldur úr leikmönnum beggja liða í rokinu í Frostaskjóli. Leikur Grindavíkur og Keflavíkur er hafinn og er í beinni útsendingu á Sýn. Þar er staðan jöfn 0-0, en Grindvíkingar voru rétt í þessu að misnota vítaspyrnu á 10. mínútu leiksins.