Aftur tapar Phoenix í þriðju framlengingu

Denver Nuggets lagði Phoenix Suns á heimavelli sínum í nótt 139-137 eftir þrjár framlengingar. Þetta er í annað sinn á stuttum tíma sem Phoenix lendir í þremur framlengingum og tapar. Carmelo Anthony skoraði 43 stig fyrir Denver og þar á meðal sigurkörfuna í lokin. Raja Bell var stigahæstur hjá Phoenix með 30 stig.

Del Piero markahæsti leikmaður Juventus

Framherjinn Allesandro del Piero varð í gærkvöld markahæsti leikmaður í sögu Juventus þegar hann skoraði þrennu í auðveldum 4-1 sigri liðsins á Fiorentina í bikarkeppninni.

Sainz sigraði á 10. leiðinni

Spænski ökuþórinn Carlos Sainz sigraði á 10. leiðinni í París Dakar rallinu í gær þegar keppendur eru nú komnir inn í Malí. Nani Roma varð í öðru sæti í áfanganum, en forystusauðurinn í rallinu, Stephane Peterhansel, varð þriðji.

Wigan lagði Arsenal

Wigan vann góðan sigur á Arsenal í fyrri leik liðanna í undanúrslitum enska deildarbikarsins á heimavelli sínum í gærkvöld 1-0 með marki frá varamanninum Paul Scharner skömmu fyrir leikslok. Nokkrar tafir urðu á leiknum vegna bilunar í flóðljósum á vellinum, en Paul Jewell stjóri Wigan var sáttur við frammistöðu sinna manna í leiknum.

McGrady meiddur

Tracy McGrady, leikmaður Houston Rockets, mun missa af í það minnsta tveimur leikjum með liði sínu eftir að hann var fluttur á sjúkrahús með mikla bakverki eftir leik Houston og Denver á sunnudagskvöldið. Þetta eru ekki góð tíðindi fyrir Houston sem er einnig án Yao Ming vegna meiðsla.

Nash og James leikmenn vikunnar

Steve Nash, leikmaður Phoenix Suns og Mike James hjá Toronto Raptors voru hafa verið útnefndir leikmenn vikunnar í Vestur- og Austurdeildinni í NBA. James stýrði liði Toronto til þriggja sigra í fjórum leikjum og skoraði 25 að meðaltali í leik og gaf sjö stoðsendingar. Nash skoraði 21 stig að meðaltali í leik og gaf 14,3 stoðsendingar í þremur sigrum Phoenix í fjórum leikjum.

Schwarzer til Portsmouth?

Ástralski markvörðurinn Mark Schwarzer er sagður muni ganga til liðs við Portsmouth frá Middlesbrough í dag fyrir um tvær milljónir punda. Í síðustu viku fór Schwarzer fram á að verða seldur frá Boro þrátt fyrir að vera nýbúinn að skrifa undir nýjan samning við félagið.

Arsenal hefur áhuga á Zigic

Nú hefur Arsenal bæst í hóp þeirra úrvalsdeildarliða sem áhuga hafa á að fá serbneska framherjann Nikola Zigic hjá Rauðu Stjörnunni í Belgrad, en áður höfðu Liverpool og West Ham sýnt hinum hávaxna framherja áhuga. West Ham er sagt hafa boðið 7 milljónir punda í leikmanninn, en tilboðinu var neitað og forráðamenn Rauðu Stjörnunnar segja að hann sé ekki til sölu fyrr en í fyrsta lagi í sumar.

Skoðar Nicolas Anelka

Breska slúðurpressan heldur því fram í dag að David Moyes, stjóri Everton, sé nú á höttunum eftir franska framherjanum Nicolas Anelka hjá Fenerbache. Anelka hefur spilað með Arsenal, Liverpool og Manchester City á Englandi, en hefur verið mjög duglegur að koma sér í ónáð hjá knattspyrnustjórum sínum í gegn um tíðina.

Búist við fáum áhorfendum á JJB-vellinum

Forráðamenn Wigan búast við að ekki mikið fleiri en 11.00 manns mæti á leik liðsins við Arsenal í undanúrslitum enska deildarbikarsins í kvöld og segja nokkrar ástæður liggja þar að baki, meðal annars gríðarlegum fjölda leikja yfir hátíðarnar og svo þá staðreynd að leikurinn sé sýndur í beint í sjónvarpinu.

Dæmdur í þriggja leikja bann

David Sommeil hefur verið dæmdur í þriggja leikja bann af aganefnd enska knattspyrnusambandinu fyrir ljóta tæklingu hans á Lee Young-Pyo, leikmann Tottenham í viðureign liðanna á dögunum. Sommeil áfrýjaði kæru sambandsins fyrir stuttu, en því var hafnað og því þar hann að sætta sig við þriggja leikja bann.

Sutton mun gera fína hluti hjá Birmingham

Framherjinn Emile Heskey hjá Birmingham segist þess fullviss að fyrrum landsliðsmaðurinn Chris Sutton eigi eftir að smella vel inn í liðið eftir að hann var keyptur frá Glasgow Celtic og segir að kaupin á Sutton sýni að félagið ætli sér stóra hluti í framtíðinni.

Evra búinn að skrifa undir

Manchester United hefur nú gengið formlega frá þriggja og hálfs árs samningi við franska varnarmanninn Patrice Evra frá Mónakó. Evra stóðst læknisskoðun hjá félaginu í dag og talið er að hinn 24 ára gamli leikmaður hafi kostað United um fimm milljónir punda. "Hann er enn að bæta sig og þannig menn viljum við hafa í liðinu," sagði Ferguson um Frakkann unga.

KR mætir Keflavík

Í dag var dregið í 8-liða úrslitum bikarkeppni KKÍ í karla- og kvennaflokki. Stórleikurinn í karlaflokki er án efa viðureign KR og Keflavíkur, en leikirnir fara fram dagana 21. og 22. janúar næstkomandi.

Nadal verður ekki með á opna ástralska

Spænski tenniskappinn Rafael Nadal hefur dregið sig úr keppni á opna ástralska meistaramótinu í tennis sem fram fer í Sydney í vikunni vegna meiðsla. Nadal hefur átt við meiðsli að stríða á fæti síðan á Mastersmótinu í Madrid í haust. "Ég er langt frá mínu besta vegna meiðslanna og því er líklega betra að ég reyni að hvíla núna," sagði Nadal í samtali við Marca.

Tek stig í deildinni fram yfir sigur í bikarnum

Paul Jewell segir að fyrir sér sé það miklu mikilvægara að hala inn stig í deildarkeppninni í ensku úrvalsdeildinni en að vinna bikarkeppni, en lið hans tekur á móti Arsenal í undanúrslitum enska deildarbikarsins í kvöld. Leikurinn verður í beinni útsendingu á Sýn og hefst útsending klukkan 19:30.

Niemi kominn til Fulham

Fulham hefur landað markverðinum Antti Niemi frá Southampton eftir að sá finnski stóðst læknisskoðun hjá félaginu og kostaði hann um eina milljón punda. Fastlega er búist við að Niemi fari beint inn í byrjunarlið Fulham, en hann hefur nú undirritað tveggja og hálfs árs samning við félagið.

Gæti snúið aftur til Ítalíu í sumar

Framherjinn sterki, Hernan Crespo, hefur látið í veðri vaka að hann vilji snúa aftur til Ítalíu eftir að tímabilinu lýkur á Englandi í vor og segist sakna ítalska lífsstílsins.

Á von á erfiðum leik í kvöld

Arsene Wenger, stjóri Arsenal, á von á mjög erfiðum leik í kvöld þegar hans menn heimsækja Wigan í undanúrslitum enska deildarbikarsins í kvöld og býr sig mikla baráttu inni á vellinum. Leikurinn verður í beinni útsendingu á Sýn og hefst útsending klukkan 19:30 í kvöld.

Viðurkennir mistök

Sir Alex Ferguson, stjóri Manchester United, viðurkennir að hann hafi ef til vill hlíft eldri leikmönnum liðsins full mikið á síðustu tveimur árum og segir það erfitt þegar komi að því að leikmenn sem hafi verið í fremstu röð um árabil þurfi að víkja fyrir sér yngri mönnum.

Vill losna frá Real Madrid

Danski miðjumaðurinn Thomas Gravesen hefur gefið það út í samtali við breska fjölmiðla að hann vilji losna frá spænska félaginu, því hann fái allt of lítið að spila. Gravesen hefur því verið mikið orðaður við lið í ensku úrvalsdeildinni, ekki síst sitt gamla félag Everton, sem virðist hafa saknað hans mikið síðan hann flutti í sólina á Spáni.

Missir úr nokkra leiki

Framherjinn Robin Van Persie hjá Arsenal mun missa úr nokkra leiki með liðinu á næstunni eftir að í ljós kom að hann er tábrotinn. Forráðamenn Arsenal vonast til að kappinn verði fljótur að jafna sig, en ljóst er að hann mun missa af deildarbikarleiknum við Wigan og væntanlega deildarleiknum við Middlesbrough um helgina.

Robson sagður muni aðstoða Staunton

BBC greinir frá því í morgun að gamla brýnið Sir Bobby Robson muni verða ráðinn sem sérstakur ráðgjafi Steve Staunton hjá írska landsliðinu í knattspyrnu á næstu dögum. Enn hefur ekki verið greint opinberlega frá ráðningu Staunton í starfið, en gert er ráð fyrir að það verði á allra næstu dögum.

Bryant jafnaði 40 ára gamalt met Chamberlain

Kobe Bryant skoraði í nótt 45 stig í sigri LA Lakers á Indiana 96-90, en þetta var í fyrsta sinn síðan árið 1964 sem leikmaður skorar 45 stig eða meira, fjóra leiki í röð. Wilt Chamberlain var síðasti maðurinn til að ná því afreki, en Michael Jordan skoraði 45 stig eða meira þrjá leiki í röð árið 1990.

Vill semja strax við Henry

Arsene Wenger, stjóri Arsenal, vill að félagið helli sér strax í að útbúa nýjan samning við Thierry Henry eftir að hann gaf það út að hann vildi vera áfram í herbúðum félagsins.

Obi Mikel fær ekki að fara frá Lyn

Nígeríska undrabarnið John Obi Mikel hjá Lyn í Noregi hefur tapað máli sínu fyrir rétti í Noregi, þar sem hann fór fram á að vera látinn laus frá félaginu til að ganga í raðir eins af stóru félögunum á Englandi. Mál hins átján ára gamla leikmanns er orðið hið flóknasta, en hann skrifaði á sínum tíma undir samning við Manchester United og hélt því svo fram að hann hefði verið neyddur til að skrifa undir.

Alekna og Isibayeva best í Evrópu

Virgilijus Alekna og Jelena Isinbayeva hafa verið útnefnd frjálsíþróttamenn ársins í Evrópu fyrir árið 2005. Alekna er heimsmeistari í kringlukasti, en Isinbayeva hefur sem kunnugt er verið einráð í stangarstökki kvenna á árinu og sett fjölda heimsmeta. Hún varð m.a. fyrsta konan til að stökkva yfir fimm metra á síðasta ári.

Bayern fjölgar sætum á heimavelli sínum

Þýsku meistararnir í Bayern Munchen hafa ákveðið að bæta við rúmum 3.000 sætum á heimavöll sinn Allianz Arena fljótlega og því mun völlurinn taka við tæplega 70.000 manns á næstunni. Þetta var ákveðið eftir að uppselt var á tólf heimaleiki liðsins í röð í vetur. Breytingarnar eru ekki fyrirhafnarmiklar og því var ákveðið að ráðast í framkvæmdirnar strax.

Allardyce hefði viljað auðveldari andstæðing

Sam Allardyce, stjóri Bolton, segir að hann hefði vissulega kosið að fá auðveldari andstæðinga en Arsenal í fjórðu umferð enska bikarsins, en er þó mjög sáttur við að hafa fengið heimaleik.

Bellion lánaður til Nice

Franski sóknarmaðurinn David Bellion hefur verið lánaður frá Manchester United til Nice í heimalandi sínu Frakklandi út leiktíðina og mögulegt er að franska liðið kaupi hann að lánstímanum loknum. Bellion kom til Manchester United frá Sunderland árið 2003, en hefur ekki náð að festa sig í sessi á Old Trafford.

Schumacher íhugar að hætta

Fyrrum heimsmeistarinn Michael Schumacher hefur gefið það út að hann sé að íhuga að hætta eftir komandi tímabil í Formúlu 1. Hinn sjöfaldi heimsmeistari vill þó ganga úr skugga um hvort Ferrari-lið hans hefur burði til að komast aftur í fremstu röð áður en hann tekur endanlega ákvörðun.

Búið að velja í liðin

Hinn árlegi Stjörnuleikur KKÍ fer fram um næstu helgi og hafa þeir Einar Árni Jóhannsson þjálfari Njarðvíkur og Herbert Arnarsson þjálfari KR nú valið úrvalslið Íslendinga og erlendra leikmanna sem mætast í karlaflokki, en byrjunarliðin voru að mestu valin af íþróttafréttamönnum.

Ástralskur ökuþór lét lífið í morgun

Ástralski ökuþórinn Andy Caldecott lét lífið í París-Dakar rallinu í morgun þegar hann lenti í óhappi á þriðju sérleið dagsins. Caldecott ók KTM mótorhjóli og var reyndur ökuþór, en talið er að hann hafi látist samstundis. Hann var í tíunda sæti þegar óhappið átti sér stað. Tveir mótorhjólakappar létu lífið í þessari erfiðu og hættulegu keppni í fyrra, einn Spánverji og einn Ítali.

Carter tryggði Nets 10. sigurinn í röð

Vince Carter fór illa með sína gömlu félaga í Toronto Raptors í nótt þegar hann skoraði sigurkörfu New Jersey Nets með ævintýralegu þriggja stiga skoti um leið og lokaflautið gall. New Jersey sigraði 105-104 og var þetta 10. sigurleikur liðsins í röð. Carter skoraði 42 stig og hirti 10 fráköst í leiknum og Jason Kidd skoraði 22 stig og gaf 15 stoðsendingar.

Verður næsti landsliðsþjálfari Íra

Steve Staunton verður næsti landsliðsþjálfari Íra ef marka má fréttir frá BBC í dag. Staunton er leikjahæsti maður írska landsliðsins frá upphafi og talið er að hann verði kynntur formlega sem næsti landsliðsþjálfari Íra í vikunni. Staunton er sem stendur aðstoðarmaður Paul Merson hjá Walsall.

Dregið í fjórðu umferð

Bikarmeistarar Arsenal fá það erfiða verkefni að mæta Bolton í enska bikarnum, en nú rétt áðan var dregið í fjórðu umferð keppninnar. Chelsea mætir annað hvort Milwall eða Everton og Leyton Orient, sem sló Fulham úr keppninni um helgina, mætir Hermanni Hreiðarssyni og félögum í Charlton.

Jökull Elísabetarson úr KR

Víkingar fengu í dag liðsauka þegar Jökull Elísarbetarson gekk til liðs við félagið úr KR. Jökull sem verður 22 ára á þessu ári hefur spilað sem varnar og miðjumaður.

AC Milan lagði Parma í markaleik

AC Milan vann nauman sigur á Parma í kvöldleiknum á Ítalíu í kvöld, en Milanomenn máttu þakka fyrir að fara með sigur af hólmi 4-3, eftir að hafa náð 3-1 forystu í leiknum. Gilardino, Kaka og Shevchenko skoruðu mörk Milan í leiknum og eitt markið var sjálfsmark, en Marchionni skoraði tvö mörk fyrir Parma og Cannavaro eitt.

Markalaust hjá Villareal og Real Madrid

Villareal og Real Madrid gerðu markalaust jafntefli í spænska boltanum í kvöld. Villareal situr í fimmta sæti deildarinnar með 31 stig, en Real er í því sjötta með einu stigi minna. Leikurinn var sýndur á sjónvarpsstöðinni Sýn.

Jafnteflið ekki áfall

Sir Alex Ferguson, knattspyrnustjóri Manchester United, segir að jafnteflið gegn utandeildarliðinu Burton í enska bikarnum í dag sé ekki áfall, þó vissulega hafi hans menn búist við sigri.

Jóhannes lagði upp sigurmark Leiceister

Leicester City vann sætan sigur á Tottenham Hotspur í lokaleik dagsins í enska deildarbikarnum, 3-2. Það var enginn annar en Jóhannes Karl Guðjónsson sem lagði upp sigurmark Leicester í lokin með glæsilegri sendingu inn fyrir vörn úrvalsdeildarliðsins. Tottenham komst í 2-0 í leiknum en er nú fallið út leik í enska bikarnum líkt og í deildarbikarnum, gegn minni spámönnum.

Tottenham leiðir gegn Leiceister

Tottenham hefur yfir 2-1 á útvelli gegn Leicester í lokaleik dagsins í enska bikarnum. Jermaine Jenas og Paul Stalteri skoruðu mörk Tottenham, en Elvis Hammond minnkaði muninn fyrir Leicester undir lok fyrri hálfleiksins og því getur allt gerst í þeim síðari. Jóhannes Karl Guðjónsson er í liði Leicester í leiknum.

Fimmtándi sigur Barcelona í röð

Fátt virðist geta komið í veg fyrir að Barcelona verji titil sinn í spænsku úrvalsdeildinni í knattspyrnu, því í gær vann liðið fimmtánda sigur sinn í röð í öllum keppnum þegar það lagði erkifjendur sína í Espanyol 2-1. Það voru Samuel Eto´o og Deco sem skoruðu mörk Katalóníuliðsins.

Aftur stórtap hjá Haukastúlkum

Kvennalið Hauka tapaði stórt í annað sinn á tveimur dögum fyrir króatíska liðinu Podravka Vegeta í EHF keppninni í handbolta, lokatölur í dag 39-23 fyrir Podravka. Ragnhildur Guðmundsdóttir skoraði sjö mörk fyrir Hauka og Ramune Pekarskyte skoraði fimm mörk.

Juventus heldur sínu striki

Juventus hefur tíu stiga forskot á toppi ítölsku A-deildarinnar í knattspyrnu eftir leiki dagsins. Juve sigraði Palermo 2-1 í gær, þar sem Adrian Mutu gerði bæði mörk liðsins, en Inter náði aðeins jafntefli gegn Siena í dag og er því tíu stigum á eftir meisturunum. AC Milan er í þriðja sæti deildarinnar og getur komist upp fyrir granna sína með sigri á Parma á San Siro í kvöld.