Fulham úr leik

Úrvalsdeildarlið Fulham féll úr keppni í enska bikarnum í dag þegar liðið lá á heimavelli fyrir neðrideildarliði Leyton Orient 2-1. Fulham fékk tækifæri til að jafna leikinn úr vítaspyrnu í síðari hálfleik, en markvörður Orient var hetja liðsins og varði spyrnuna og tryggði sínum mönnum ótrúlegan sigur. Heiðar Helguson var ekki í liði Fulham í dag.

Frumraun Keane breyttist í martröð

Roy Keane vill eflaust gleyma fyrsta leik sínum með Glasgow Celtic sem fyrst, því liðið beið lægri hlut fyrir 1. deildarliði Clyde í bikarkeppninni í dag 2-1. Keane hafði hægt um sig í leiknum, en tvö mörk voru dæmd af Clyde í leiknum og þóttu það umdeildir dómar.

Bryant skoraði 50 stig

Kobe Bryant er heldur betur í stuði þessa dagana og í nótt skoraði hann 50 stig fyrir LA Lakers í sigri liðsins á grönnum sínum í LA Clippers 112-109. Bryant hefur því skorað að meðaltali 49 stig í síðustu tveimur leikjum liðsins og í nótt hirti hann auk þess 8 fráköst og gaf 8 stoðsendingar.

Skrautlegur sigur Liverpool

Liverpool bar sigurorð af Luton Town 5-3 í lokaleik dagsins í FA bikarnum á Englandi, en leikurinn var bráðfjörugur og var sýndur í beinni útsendingu á Sýn. Heimamenn í Luton Town komust í 3-1 í leiknum, en Liverpool sýndi klærnar í síðari hálfleik og tryggði sér sigurinn.

Stjarnan lagði Víking

Þrír leikir fóru fram í DHL-deild kvenna í handbolta nú síðdegis. Stjarnan sigraði Víking 24-18 á heimavelli sínum í Ásgarði. Rakel Dögg Bragadóttir var markahæst í liði Stjörnunnar með 6 mörk, en Natasha Damiljanovic skoraði 5 fyrir Víking.

Luton yfir gegn Liverpool í hálfleik

Luton Town er heldur betur að koma á óvart gegn Liverpool í lokaleik dagsins í enska bikarnum. Luton hefur yfir 2-1 í hálfleik, eftir að Steven Gerrard hafði komið Evrópumeisturunum yfir senmma leiks. Leikurinn er í beinni útsendingu á Sýn.

Stórtap hjá Haukastúlkum

Kvennalið Hauka tapaði í dag 37-24 fyrir króatíska liðinu Podravka í EHF-keppninni í handbolta á heimavelli sínum að Ásvöllum, en síðari leikur liðanna fer fram á sama stað. Ramune Pekarskyte skoraði 11 mörk fyrir Haukana, sem komust í 3-0 í leiknum en sáu aldrei til sólar eftir það. Sérstaklega var markvörður Podravka þeim erfiður ljár í þúfu, en hún varði 27 skot í leiknum.

Úrvalsdeildarliðin í vandræðum en sluppu við áföll

Nokkur úrvalsdeildarlið lentu í vandræðum gegn smærri liðum í enska bikarnum í dag, en þó sluppu þau við stóráföll. Everton náði aðeins jafntefli 1-1 gegn Milwall, Middlesbrough gerði jafntefli við Nuneaton 1-1, Birmingham gerði markalaust jafntefli við Torquay og West Brom gerði 1-1 jafntefli við Reading. Að öðru leiti náðu úrvalsdeildarliðin að leggja andstæðinga sína að velli.

Eiður tryggði Chelsea sigurinn

Eiður Smári Guðjohnsen tryggði Chelsea 2-1 sigur á Huddersfield í enska bikarnum í dag með marki á 82. mínútu. Carlton Cole kom Chelsea yfir í leiknum, en Huddersfield sýndi mikla seiglu og náði að jafna, áður en Eiður Smári gerði út um leikinn í lokin. Eiður var fyrirliði Chelsea í dag.

ÍBV lagði Gróttu

DHL-deild kvenna hófst aftur í dag eftir langt vetrarfrí. ÍBV sigraði Gróttu í Eyjum 31-25. Ivana Velkjovic skoraði níu mörk fyrir Eyjastúlkur, en Renata Horvath skoraði mest fyrir Gróttu, átta mörk.

Martin Djetou látinn fara frá Bolton

Sam Allardyce hefur ákveðið að láta Martin Djetou fara frá félaginu eftir að leikmanninum mistókst að sanna sig síðan hann kom til Bolton í haust. Djetou hafði vonast til að fá að spila með liðinu í bikarnum nú um helgina til að sanna sig fyrir stjóranum, en sá hefur ekki talið sig hafa not fyrir leikmanninn.

Orðað við Iaquinta hjá Udinese

Breska dagblaðið Mirror greinir frá því í dag að Tottenham Hotspurs sé nú að undirbúa 7 milljón punda tilboð í ítalska sóknarmanninn Vincenzo Iaquinta hjá Udinese. Þá segir í sömu frétt að félagið sé í viðræðum við Portsmouth um að selja þá Noe Pamarot, Sean Davis og Pedro Mendes fyrir alls um 5 milljónir punda til að fjármagna kaupin á Iaquinta.

Everton undir gegn Millwall

Nú standa yfir 23 leikir í enska bikarnum og leikhlé komið í þeim flestum. Það sem af er stendur hæst að Millwall hefur yfir 1-0 í hálfleik gegn úrvalsdeildarliði Everton. Blackburn hefur yfir 2-0 gegn QPR með mörkum frá Todd og Bellamy, Chelsea hefur yfir 1-0 gegn Huddersfield með marki frá Carlton Cole, en þar er Eiður Smári Guðjohnsen í byrjunarliði Chelsea.

Clijsters sigraði í Hong Kong

Tenniskonan Kim Clijsters sigraði á sterku tennismóti sem fram fór í Hong Kong í dag, þegar hún lagði stigahæstu tenniskonu heims, Lindsay Davenport, í úrslitaleik 6-3 og 7-5. Þær stöllur verða svo í eldlínunni á opna ástralska meistaramótinu sem fram fer síðar í þessum mánuði.

Jón Arnór í stuði með Napoli

Jón Arnór Stefánsson var í stuði með liði sínu Napoli í ítölsku A-deildinni í körfubolta í gærkvöldi og skoraði 21 stig í sigri liðsins á Roma, 94-70 og er liðið í þriðja sæti deildarinnar eftir sigurinn.

Í viðræðum við Fulham

Markvörðurinn Antti Niemi er nú í viðræðum við Fulham um að ganga til liðs við félagið frá Southampton, þar sem hann hefur varið markið með ágætum síðustu ár. Charlton var einnig talið vera á höttunum eftir Niemi, en nýjustu fréttir herma að hann sé við það að skrifa undir hjá Fulham og snúi því aftur í úrvalsdeildina. Kaupverðið er talið vera um 1,5 milljónir punda.

Palace hafnaði stóru tilboði í Johnson

Birmingham hafði ekki erindi sem erfiði í dag þegar liðið bauð Crystal Palace 3 milljónir punda og tvo leikmenn í skiptum fyrir framherjann Andy Johnson, en Palace sagði þvert nei eins og áður. Svörin sem Birmingham fékk var að Palace ætlaði sér í úrvalsdeildina og því hefði það ekki efni á að selja Johnson fyrr en í allra fyrsta lagi í sumar.

Arsenal lagði Cardiff

Þremur leikjum er nú lokið í enska bikarnum. Arsenal lagði Cardiff 2-1 með mörkum frá Robert Pires, Aston Villa lagði Hull City 1-0 á útivelli með marki Gareth Barry, en 1. deildarlið Leeds náði jafntefli 1-1 á útivelli gegn Wigan og því verða liðin að mætast öðru sinni á heimavelli Leeds.

Phoenix burstaði Miami

Stjörnum prýtt lið Miami Heat á ekki sjö dagana sæla um þessar mundir og í nótt tapaði liðið stórt fyrir Phoenix Suns 111-93, eftir að hafa fengið á sig 47 stig í fyrsta fjórðung leiksins. Dwayne Wade lék ekki með Miami í nótt, en Steve Nash fór á kostum í liði Phoenix, skoraði 11 stig og gaf 19 stoðsendingar, þar af 12 í fyrsta leikhlutanum, sem er annar besti árangur í sögu NBA.

Robson að landa Ehiogu

Bryan Robson, stjóri West Brom, er sagður vera að leggja lokahönd á að fá til sín varnarmanninn Ugo Ehiogu frá Middlesbrough, en Ehiogu lék einmitt undir stjórn Robson hjá Boro á sínum tíma. Robson var í stífum viðræðum við forráðamenn Boro í gær og talið er að samningar gætu jafnvel náðst um helgina. Ehiogu er 33 ára miðvörður og á að baki landsleiki fyrir England, en hefur lítið spilað í vetur.

Thierry Henry ætlar að vera áfram hjá Arsenal

Franski knattspyrnusnillingurinn Thierry Henry hefur nú bundið enda á vangaveltur um framtíð hans hjá Arsenal, því í kvöld lýsti hann því yfir í viðtali við The Sun að hann ætlaði að vera áfram hjá félaginu í það minnsta út næsta keppnistímabil. Þetta eru mjög góðar fréttir fyrir stuðningsmenn Arsenal, sem óttuðust mjög að hann fetaði í fótspor Patrick Vieira og reyndi fyrir sér á meginlandinu.

Ferdinand semur til 2010

Hinn tvítugi Anton Ferdinand hjá West Ham hefur undirritað nýjan samning við félagið sem gildir til ársins 2010. Ferdinand hefur verið hjá félaginu allar götur síðan 2001 og er aðeins tvítugur. "Ég er í skýjunum yfir því að búið sé að semja við Anton, hann á eftir að gera stóra hluti í framtíðinni," sagði Alan Pardew, stjóri West Ham. Þess má geta að Anton er bróðir Rio Ferdinand hjá Manchester United.

Van Persie skrifaði undir

Hollenski framherjinn Robin Van Persie hefur skrifað undir nýjan samning við Arsenal sem nær allt til ársins 2011. Hann var keyptur frá Feyenoord fyrir 2,75 milljónir vorið 2004, en miklar vonir eru nú bundnar við hann í framtíðinni.

Fimm leikir í beinni í enska bikarnum

Það verður sannkölluð íþróttaveisla á Sýn um helgina, þar sem hápunkturinn verður FA bikarinn á Englandi og hvorki meira né minna en fimm leikir í beinni útsendingu á laugardag og sunnudag. Auk þessa verða beinar útsendingar úr ítalska- og spænska boltanum og NBA körfuboltanum svo eitthvað sé nefnt.

Hornets spila þrjá leiki í New Orleans

Forráðamenn New Orleans/Oklahoma City Hornets-liðsins í NBA deildinni hafa nú tilkynnt að liðið muni spila þrjá heimaleiki í New Orleans í vor sökum þess hve vel uppbygging í borginni gengur eftir að fellibylurinn Katrín reið þar yfir á sínum tíma.

Henry fer til Barcelona

Fyrrum sóknarmaður Arsenal, Ian Wright, segist búast fastlega við því að Frakkinn Thierry Henry gangi til liðs við Barcelona á Spáni í sumar og tekur þar með undir áhyggjur stjórnarformanns Arsenal á dögunum.

Brown orðaður við tvö félög

Michael Brown, leikmaður Tottenham, hefur nú verið orðaður við tvö félög í ensku knattspyrnunni, en hann hefur ekki átt fast sæti í liði Tottenham síðan þeir Jermaine Jenas og Edgar Davids gengu í raðir liðsins í sumar. Manchester City og Sheffield United eru sögð hafa mikinn áhuga á Brown, sem er mikill vinnuhestur, en hann kom einmitt til Tottenham frá Sheffield United fyrir tveimur árum.

Campo er falur fyrir rétt verð

Sam Allardyce segir að vel megi vera að hann leyfi varnarmanninum Ivan Campo að snúa aftur til Spánar, þar sem hann hefur verið orðaður við gamla liðið sitt Mallorca, en aðeins ef rétt verð fáist fyrir hann. Samningur Campo við Bolton rennur út í sumar.

Mwaruwari kominn til Portsmouth

Enska úrvalsdeildarliðið Portsmouth hefur gengið frá kaupum á landsliðsmanninum Benjani Mwaruwari frá Zimbabwe fyrir rúmar fjórar milljónir punda. Mwaruwari þessi er sóknarmaður og spilaði áður með franska liðinu Auxeirre. Hann er 27 ára gamall og valdi Portsmouth fram yfir Wigan og Marseille sem einnig höfðu áhuga á að fá hann í sínar raðir.

Ákærður fyrir ljóta tæklingu

David Sommeil, leikmaður Manchester City, á yfir höfði sér þriggja leikja bann fyrir ljóta tæklingu sína á Lee Young-Pyo hjá Tottenham í leik liðanna í vikunni. Martin Jol, stjóri Tottenham kallaði þetta ljótustu tæklingu sem hann hefði séð, en boltinn var víðsfjarri þegar Sommeil sparkaði í hné mótherja síns.

Gaydamak formlega orðinn meðeigandi

Alexandre Gaydamak hefur nú formlega gengið frá kaupum á helmingshlut í knattspyrnufélaginu Portsmouth, en stjórnarformaðurinn Milan Mandaric er sagður hafa þegið um 15 milljónir punda fyrir að láta eftir hlut sinn. Gaydamak er jafnvel sagður hafa í hyggju að taka yfir allt félagið á næstu 12 mánuðum, en það ku hafa verið skilyrði fyrir kaup hans á helmingshlut sínum nú.

Schwarzer á sölulistann

Middlesbrough hefur samþykkt beiðni markvarðarins Mark Schwarzer um að vera settur á sölulista hjá félaginu. Schwarzer hefur spilað 342 leiki fyrir Boro síðan hann kom til liðsins árið 1997, en hann er ástralskur landsliðsmaður. Honum þótti kominn tími til að breyta til og hefur Steve McClaren ákveðið að verða við beiðni hans, með nokkrum trega þó.

Staðfestir kaupin á Evra

Franski landsliðsmaðurinn Patrice Evra á nú aðeins eftir að ganga í gegn um læknisskoðun á mánudag til að ganga formlega í raðir Manchester United fyrir 5,5 milljónir punda. Evra er 24 ára gamall og lék áður hjá Mónakó í Frakklandi, en Alex Ferguson segist hafa haft augastað á honum allar götur síðan Gabriel Heinze meiddist í haust.

McGrady vann einvígið við James

Tveir leikir fóru fram í NBA deildinni í körfubolta í nótt. Tracy McGrady og LeBron James háðu mikið einvígi þegar Houston vann góðan útisigur á Cleveland 90-81 og svo virðist sem Cleveland sakni Larry Hughes mikið, en hann verður frá í allt að tvo mánuði vegna fingurbrots. Cleveland hafði verið á mikilli sigurgöngu fyrir leikinn, en náði ekki að leggja meiðslum hrjáð lið Houston.

Liverpool er einhæft lið

Jose Mourinho, stjóri Chelsea, segir að þó Liverpool sé vissulega frábært varnarlið, sé það í raun það eina sem liðið geti og segir liðið mjög einhæft. "Liverpool verst vel, en það er líka það eina sem þetta lið getur. Það er mjög erfitt að spila á móti liði sem leikur eins og Liverpool og menn þurfa að nota höfuðið ef þeir ætla að vinna þá, það þýðir ekki að spila með hjartanu á móti þeim, því þá tapar þú."

Á höttunum eftir Kelly

Úrvalsdeildarlið West Ham er sagt vera að undirbúa tilboð í írska bakvörðinn Stephen Kelly hjá Tottenham nú í janúar, en samningur hans við Tottenham rennur út í sumar. Talið er víst að Tomas Repka muni fara frá félaginu fljótlega og þá er ljóst að West Ham mun vanta varnarmann til að fylla skarð hans.

Mikill karakter hjá KR

Leikmenn KR sýndu mikinn karakter með því að ná framlengingu og að lokum sigri gegn Fjölni á heimavelli sínum í Iceland-Express deildinni í gær eftir að hafa verið 14 stigum undir þegar 4. leikhluti var hálfnaður.

Langt komið með að landa Evra

David Gill, yfirmaður Manchester United er nú staddur í Mónakó þar sem hann að sögn félagsins hefur að mestu gengið frá kaupum á franska landsliðsmanninum Patrice Evra. Leikmaður þessi er 24 ára gamall og vill ólmur fara frá Mónakó. Hann hefur verið orðaður mest við Manchester United og Inter á Ítalíu, en nú virðist sem enska liðið sé komið langt með að ganga frá kaupunum.

Njarðvík og Grindavík töpuðu

Það urðu heldur betur óvænt úrslit í úrvalsdeild karla í kvöld þegar heil umferð var leikin. Efsta lið deildarinnar, Njarðvík, þurfti að sætta sig við tap í Borgarnesi gegn frísku liði Skallagríms 96-78. Þá lágu grannar þeirra í Grindavík mjög óvænt fyrir botnliði Hauka í Hafnarfirði, 98-82.

Yfirburðir Chelsea endast ekki lengi

Gary Neville segir að þó vissulega líti út fyrir að Chelsea muni rúlla upp ensku úrvalsdeildinni í ár eins og í fyrra, muni yfirburðir liðsins ekki vara lengi og bendir á önnur lið sem hafi náð að verða meistarar en hrunið í kjölfarið.

Andy Johnson er ekki til sölu

Forráðamenn Crystal Palace hafa enn eina ferðina séð ástæðu til að gefa út yfirlýsingu þess efnis að fyrrum landsliðsframherjinn Andy Johnson sé alls ekki til sölu. Johnson, sem fór á kostum með Palace í úrvalsdeildinni í fyrra þó liðið félli aftur í fyrstu deild, hefur verið mjög eftirsóttur af liðum í úrvalsdeildinni allar götur síðan Palace féll.

Riera klár í slaginn

Manchester City hefur staðfest að spænski leikmaðurinn Albert Riera sé nú formlega genginn í raðir félagsins að láni frá Espanyol og verður hjá enska liðinu út leiktíðina. Riera gæti orðið klár í slaginn fyrir bikarleik City við Scounthorpe um helgina. Stuart Pearce, stjóri City, er mjög ánægður að vera loks búinn að landa leikmanninum, en hann hefur lengið verið aðdáandi hans.

Mourinho og Ferguson sleppa vel

Enska knattspyrnusambandið hefur afráðið að refsa þeim Jose Mourinho og Alex Ferguson ekki fyrir ummæli sín í garð leikmanna og dómara í byrjun desember. Ferguson dró heilindi Rob Styles dómara í efa eftir leik við Everton, en Mourinho kallaði einn leikmanna Wigan svindlara. Þeim félögum verður þó gert að útskýra mál sitt fyrir sambandinu og hafa verið beðnir að gæta tungu sinnar í framtíðinni.

Lampard verður aldrei seldur

Jose Mourinho, stjóri Chelsea, segir að miðjumaðurinn Frank Lampard verði aldrei seldur frá ensku meisturunum og segist efast um að hann vilji taka gylliboðum Barcelona og Real Madrid á Spáni, sem vitað er að hafa augastað á landsliðsmanninum enska.

Leikur við Jamaica og Úrugvæ

Enska knattspyrnusambandið hefur staðfest að enska landsliðið í knattspyrnu muni leika æfingaleiki við Jamaica og Úrúgvæ í undirbúningi sínum fyrir HM í Þýskalandi í sumar. England leikur við Úrúgvæ á Anfield þann 1. mars í vor og mætir svo Jamaica þann 3. júní á nýja Wembley-leikvangnum, en það verður síðasti leikur liðsins áður en HM hefst.