Kristinn tilkynnir um framtíð sína í dag

Kristinn H. Gunnarsson, þingmaður Framsóknarflokksins, ætlar í dag að tilkynna um pólitíska framtíð sína samkvæmt heimildum fréttastofu. Kristinn ákvað að þiggja ekki þriðja sæti á lista flokksins í Norðvesturkjördæmi fyrir komandi Alþingiskosningar.

Aðgerðaráætlun vegna Reykjaneshallar

Reykjanesbær hefur unnið að því að skoða mögulegar leiðir til úrbóta í varðandi svifryksmengun í Reykjaneshöll. Í fréttatilkynningu frá bænum segir að Menningar-, íþrótta- og tómstundaskrifstofa bæjarins hafi skilað inn skýrslu og aðgerðaráætlun til Heilbrigðiseftirlits Suðurnesja. Fram hefur komið að svifryk í Reykjaneshöll er umtalsvert og yfir heilsuverndarmörkum á svifryki utandyra.

Framtíðarlandið býður ekki fram í vor

Á fundi Framtíðarlandsins í kvöld voru greidd atkvæði um það hvort ætti að bjóða fram í alþingiskosningum í vor. Niðurstaðan var að 96 sögðu nei og 92 sögðu já. Því hefur verið ákveðið að bjóða ekki fram. Þar að auki þurfti aukinn meirihluta, eða 2/3 atkvæða, til þess að samþykkja tillöguna. Tillagan um framboð í komandi alþingiskosningum var því felld.

Erilsamt hjá lögreglunni í gær

Lögreglan á höfuðbrogarsvæðinu setti upp myndavél við Dalasmára í Kópavogi í gær. Brot fimmtán ökumanna voru mynduð. Meðalhraði hinna brotlegu var tæpir 46 km/klst. Þarna er 30 km hámarkshraði en sá hraðast ók var mældur á tvöföldum hámarkshraða. Eftirlit lögreglunnar í Dalasmára kom í kjölfar ábendinga frá íbúunum sem kvörtuðu undan hraðakstri á þessum stað. Annars staðar á höfuðborgarsvæðinu tók lögreglan tuttugu og fimm ökumenn fyrir hraðakstur.

Siv leiðir Framsókn í Suðvesturkjördæmi

Siv Friðleifsdóttir, Samúel Örn Erlingsson og Una María Óskarsdóttir skipa þrjú efstu sæti Framsóknarflokksins í Suðvesturkjördæmi. Þetta var niðurstaða aukakjördæmisþings í kvöld. Þingið hófst kl. 20:00 en þar var tillaga kjörnefndar að framboðslista fyrir komandi þingkosningar borin upp til samþykktar. Listinn var samþykktur án breytinga. Þess er gaman að geta að Steingrímur Hermannsson skipar heiðurssætið á listanum.

Enn rökrætt um framboð Framtíðarlandsins

Mjög fjölsóttur fundur Framtíðarlandsins stendur enn yfir á Hótel Loftleiðum. Mörg hundruð manns mættu á fundinn en gildan atkvæðisrétt höfðu einungis þeir sem gerst höfðu félagar fyrir tólf á hádegi á mánudaginn var. Á fundinum var borin upp tillaga stjórnar um að boðið yrði fram í nafni Framtíðarlandsins í næstu alþingiskosningum og drög að stefnu þar að lútandi var lögð fram.

Konan sem lýst var eftir er fundin

Konan sem lögregla höfuðborgarsvæðisins lýsti eftir í kvöld, Guðríður Bjarney Ágústsdóttir, er fundin. Hennar hafði verið saknað frá því fyrr í kvöld. Lögreglan vill koma þökkum á framfæri til þeirra sem aðstoðuðu við leitina.

ÞSSÍ í samstarf við stjórnvöld í Níkaragúa

Viðræður við stjórnvöld í Níkaragúa um þróunarsamvinnu á sviði orkumála eru að hefjast í höfuðborginni Managua. Að sögn Gísla Pálssonar umdæmisstjóra Þróunarsamvinnustofnunar Íslands hefur ný stjórn Sandínista áhuga á því að hraða þróun og framkvæmdum á sviði jarðhitamála og fá íslensk fyrirtæki til samstarfs.

Of seint að læra að prjóna

Það kom flatt upp á marga í íslenska flugheiminum fyrir 22 árum þegar Arngrímur Jóhannsson sagði upp stöðu sinni sem yfirflugstjóri Arnarflugs, stofnaði sitt eigið flugfélag, og keypti gamla Boeing þotu. Nú stendur hann enn á tímamótum, kominn í nýtt félag, og er í fyrsta sinn á ferlinum að láta smíða fyrir sig þotur.

Fulltrúi forseta mætti ekki á fund utanríkismálanefndar

Hvorki fulltrúi forsetaembættisins né utanríkisráðuneytisins mætti á fund utanríkismálanefndar í morgun, vegna setu forsetans í þróunarráði Indlands. Halldór Blöndal, formaður nefndarinnar, segir að utanríkisráðherra muni koma á fund nefndarinnar síðar.

Orðaskak á þingi vegna ummæla Frjálslyndra

Þingmenn Frjálslynda flokksins gerðu harða hríð að Sæunni Stefánsdóttur, þingmanni Framsóknarflokks og formanni Innflytjendaráðs, í upphafi þingfundar í morgun, fyrir að halda því fram að Frjálslyndi flokkurinn ali á mannfyrirlitningu og hatri í garð útlendinga í útvarpserindi í gær. Siv Friðleifsdóttir heilbrigðisráðherra kom félaga sínum til varnar og sagði frjálslyndi Frjálslynda flokksins komið langt frá upprunalegri merkingu orðsins.

Fiskimjölsverksmiðju við Krossanes lokað

Aldrei framar munu menn finna peningalykt á Akureyri. Ísfélag Vestmannaeyja hefur ákveðið að loka fiskimjölsverksmiðjunni á Krossanesi og eru viðbrögð bæjarbúa ekki öll á sama veg.

Hætt að miða við fyrri greiðslur

Hætt hefur verið að miða við fyrri greiðslur í fæðingarorlofi, þegar næsta barn fæðist innan þriggja ára, en umboðsmaður alþingis telur það ekki samræmast lögum. Þetta kom fram í fyrirspurnartíma á alþingi í dag. Magnús Stefánsson sagði, í svari við fyrirspurn Jóhönnu Sigurðardóttur, að starfshópur væri að skoða framkvæmd laganna í kjölfar niðurstöðu umboðsmanns og hann styddi þá breytingu sem þegar hefði verið gerð.

3 milljónir króna í miskabætur raunhæfar

Saga drengjanna í Breiðavík sýnir hvernig samfélagið getur framleitt afbrotamenn, segir Guðrún Ögmundsdóttir. Hún segir ekki óraunhæft að borga fórnarlömbum ofbeldis í Breiðavík þrjár milljónir í miskabætur fyrir þjáningar sínar.

Leggst gegn framboði í nafni Framtíðarlandsins

Ómar Ragnarsson einn forsprakka Framtíðarlandsins segist leggjast gegn framboði til alþingiskosninga í nafni Framtíðarlandsins. Það sé ekki ráðlegt að stærstu umhverfissamtök landsins bjóði fram í eigin nafni. Búist er við miklum átökum á fundi Framtíðarlandsins í kvöld þar sem ákveðið verður hvort ráðist verður í framboð fyrir alþingiskosningar.

Forsætisráðherra boðar lækkun skatta á fyrirtæki

Forsætisráðherra boðaði einföldun á skattkerfinu og lækkun skatta á fyrirtæki til að auka samkeppnishæfni íslenskra fyrirtækja á viðskiptaþingi í dag. Formaður viðskiptaráðs segir hvalveiðar Íslendinga geta sett árangur útrásarfyrirtækjanna í uppnám.

Eldur í geymslu á Hótel Höfn

Rétt eftir klukkan fimm í dag varð elds vart í geymslu í kjallara Hótels Hafnar. Brunakerfið lét vita af eldinum en erfiðlega gekk að staðsetja eldinn vegna reyks. Reykkafari var sendur inn til þess að staðsetja hann. Slökkvilið Hafnar er enn að störfum á hótelinu. Einhverjar glæður leynast þar enn og verið er að reykræsta hótelið.

Samfylkingin vill huga að sprotafyrirtækjum

Á blaðamannafundi í dag kynnti Samfylkingin nýja stefnumótun í atvinnumálum. Þær unnu til verðlauna á nýafstöðnu Sprotaþingi Samtaka sprotafyrirtækja og Samtaka iðnaðarins sem haldið var á föstudag. Þar greiddu fundarmenn atkvæði um tillögur stjórnmálaflokkanna og urðu tillögur Samfylkingarinnar í þremur efstu sætunum.

Ítalskur svikahrappur kostar TM tíu milljónir

Tryggingamiðstöðinni hf var í Héraðsdómi Reykjavíkur í dag gert að greiða Íslensku umboðssölunni hf tæpar tíu milljónir vegna stolins fiskfarms sem var í eigu Íslensku umboðssölunnar hf. Málsatvik eru þau að Ítala tókst að villa á sér heimildir þannig að hann fékk afgreiddan fiskfarm frá íslensku umboðssölunni fyrir rúmar 110 þúsund evrur.

Tvær á gjörgæsludeild eftir bílslys á Breiðholtsbrautinni

Konurnar tvær sem slösuðust í árekstri á Breiðholtsbrautinni í morgun eru báðar á gjörgæsludeild Landspítala-háskólasjúkrahús. Þær hafa gengist undir skurðaðgerðir og eru með alvarlega áverka en eru með meðvitund.

Ekki miðað við fyrri greiðslur í fæðingarorlofi

Hætt hefur verið að miða við fyrri greiðslur í fæðingarorlofi þegar næsta barn fæðist innan þriggja ára en Umboðsmaður Alþingis telur það ekki samræmast lögum. Þetta kom fram í fyrirspurnartíma á Alþingi í dag.

Sex milljónir í skaðabætur vegna vinnuslyss

Héraðsdómur Reykjavíkur dæmdi í dag verktakafyrirtækið Heimi og Þorgeir hf. og Vörð Íslandstryggingu hf. til að greiða fyrrum starfsmanni Heimis og Þorgeirs tæpar sex milljónir króna í skaðabætur vegna vinnuslyss. Fyrirtækjunum var einnig gert að greiða vexti frá slysadegi 30. ágúst 2004.

Barnaníðingur grunaður um fleiri afbrot

Vísbendingar eru um að meintur barnaníðingur, sem áreitti stúlkur í Vogahverfi, tengist fleiri málum en upphaflega var haldið. Maðurinn, sem er 26 ára, situr í gæsluvarðhaldi vegna gruns um að hann hafi áreitt fjórar stúlkur á aldrinum 5 til12 ára.

Frestur starfsmanna RUV framlengdur

Frestur starfsmanna RUV til að svara hvort þeir vilji hætta hætta störfum þegar hið nýja RUV ohf tekur til starfa hefur verið framlengdur fram á föstudag. Upphaflega átti fresturinn að renna út í dag. Samkvæmt heimildum fréttastofu hafa einhverjir starfsmenn nú þegar nýtt sér réttinn og munu hætta við breytingarnar.

Þrír Íslendingar yfirheyrðir vegna barnaklámhrings

Kynferðisbrotadeild lögreglunnar á höfuðborgarsvæðinu hefur síðan um áramótin rannsakað mál þriggja Íslendinga sem taldir eru tengjast barnaklámhring í Austurríki.

Búið að opna Ártúnsbrekku

Búið er að opna Ártúnsbrekku í Reykjavík aftur en henni var lokað í vesturátt, á öðrum tímanum í dag, eftir að pallbíll með flutningavang aftan í valt í brekkunni.

Geta treyst hlutleysi Capacent Gallup

Íbúar í Hafnarfirði geta treyst því að kynningarefni sem komi frá bænum, vegna stækkunar álversins í Straumsvík, verði sett fram með hlutlausum hætti. Þetta segir í tilkynningu sem upplýsinga- og kynningarfulltrúi Hafnarfjarðar hefur sent frá sér.

Þungar áhyggjur af kjaramálum kennara

Kennarar í Langholtsskóla eru uggandi yfir þróun kjaramála og telja sig sitja eftir öðrum stéttum í þeirri efnahags- og kjaraþróun sem átt hefur sér stað undanfarið í þjóðfélaginu. Kennararnir skora á Launanefnd sveitarfélaga að leiðrétta það misræmi sem hefur orðið. Þeir vilja að Launanefnd standi við ákvæði í kjarasamningi sem segi að teknar skuli upp viðræður til að meta hvort almenn efnahags- og kjaraþróun gefi tilefni til viðbragða. Tímamörk á þeim viðræðum í samningnum voru 1. september 2006.

Baráttufundur vegna virkjanaframkvæmda í neðri hluta Þjórsár

Andstæðingar virkjanaframkvæmda í neðri hluta Þjórsár efna til baráttufundar næsta sunnudag. Náttúruverndarsamtök Suðurlands og Sól á Suðurlandi standa fyrir fundinum sem haldinn verður í félagsheimilinu Árnesi í Skeiða- og Gnúpverjahreppi.

Núverandi gengisástand óviðunandi

Viðskiptaþing var sett á Hótel Nordica í dag. Formaður Viðskiptaráðs Erlendur Hjaltason sem einnig er forstjóri Exista sagði í setningarræðu að ekki yrði unað við núverandi ástand gengismála mikið lengur. Hann sagði lausnirnar þó ekki vera augljósar; “Við verðum að standa fyrir opinni og upplýstri umræðu um þessi mál á næstunni.”

Vöruflutningabíll valt í Ártúnsbrekku

Vöruflutningabíll valt í Ártúnsbrekku í Reykjavík og er lokað fyrir umferð í vesturátt vegna óhappsins. Nokkur olía lekur úr bílnum. Lögregla og slökkvilið eru á staðnum en ekki er talið að alvarleg meiðsl hafi orðið á fólki.

Þingmenn ánægðir með stofnun þróunarfélags

Þingmenn stjórnar og stjórnarandstöðu virðast sammála um að það hafi verið gott skref að stofna þróunarfélag um framtíð byggðarinnar á Miðnesheiði. Björgvin G Sigurðsson þingmaður Samfylkingarinnar spurði í fyrirspurnatíma á Alþingi í dag hvort fram hefði farið úttekt um nýtingu á svæðinu.

Rannís úthlutar styrkjum

Vísindamenn fengu úthlutað alls 600 milljónum króna í dag þegar stærsti vísindasjóður landsins opnaði féhirslur sínar og deildi út fé til ýmissa verkefna. Joðskortur kvenna, mannleg hegðun sögupersóna í grafískum tölvuleikjum og sjálfsímynd Íslendinga eru á meðal þess sem Rannsóknarsjóður Íslands veitti fé.

Þarf að ryksuga Reykjaneshöll

Árna Sigfússyni bæjarstjóra í Reykjanesbæ þykir leitt að heilbrigðiseftirlit Suðurnesja telji bæinn hunsa niðurstöður eftirlitsins varðandi svifryksmengun í Reykjaneshöll. Það hafi ekki verið ætlunin. Hann segir að grasið verði hreinsað á allra næstu dögum. Eins og fram hefur komið leiða niðurstöður mælinga heilbrigðiseftirlits Suðurnesja í ljós að svifryksmengun í Reykjaneshöll er langt yfir heilsuverndarmörkum.

Hafísinn á undanhaldi

Hafísinn, sem nýverið lagðist inn á firði á Vestfjörðum, er á hraðri leið frá landi. Hann er nú kominn upp undir miðlínuna á milli Íslands og Grænlands og öll hætta af honum liðin hjá, að sögn Ásdísar Auðunsdóttur hjá Veðurstofunni.

Búist við átökum á fundi Framtíðarlandsins

Búist er við miklum átökum á fundi Framtíðarlandsins í kvöld þar sem ákveðið verður hvort ráðist verður í framboð fyrir alþingiskosningar. Fundurinn verður á Hótel Loftleiðum í kvöld klukkan átta og fyrir liggur tillaga stjórnar um að bjóða fram í alþingiskosningum undir merkjum Framtíðarlandsins. Drög að stefnuáætlun verða lögð fyrir fundinn.

Verð á loðnu í methæðum

Verð á loðnu er orðið hærra en nokkru sinni fyrr og bíða sjómenn þessi í ofvæni, á mörgum skipum norðaustur af landinu, að hún fari að ganga upp á landgrunnið og verða veiðanleg.

Sakaðir um að ala á andúð gegn útlendingum

Frjálslyndi flokkurinn elur á andúð gegn útlendingum og það kom skýrt fram í ræðu Guðjóns Arnar Kristjánssonar á flokkþingi Frjálslynda flokksins. Þetta sagði Sæunn Stefánsdóttir, þingmaður Framsóknarflokksins, við upphaf þingfundar í dag. Sæunn vísaði sérstaklega til þess að formaðurinn varaði við því að útlendingar bæru hingað berklasmit.

Baugstölur teknar úr samhengi

Starfstengdar greiðslur til æðstu yfirmanna Baugs voru samningsbundnar í starfssamningum og ekki teknar úr sjóðum félagsins ófrjálsri hendi eins og gefið hefur verið í skyn í fréttum RUV. Tölur sem fréttirnar byggðu á voru teknar úr samhengi. Þetta kemur frá í fréttatilkynningu frá Baugi Group hf.

Vinstri-grænir auka fylgi sitt samkvæmt könnun Mannlífs

Vinstri-grænir halda áfram að auka fylgi sitt samkvæmt nýrri könnun Mannlífs og mælast nú með tæplega 22% fylgi. Samfylkingin mælist hins vegar aðeins með um eins prósentustigs meira fylgi eða 23%.

Fulltrúi forseta ekki á fund utanríkismálanefndar

Hvorki fulltrúi forsetaembættisins né utanríkisráðuneytisins mættu á fund utanríkismálanefndar í morgun, vegna setu forsetans í þróunarráði Indlands. Halldór Blöndal, formaður nefndarinnar, segir að utanríkisráðherra muni koma á fund nefndarinnar síðar.

Tveir fluttir á slysadeild eftir harðan árekstur

Tveir voru fluttir á slysadeild eftir harðan árekstur á Breiðholtsbrautinni rétt fyrir klukkan tíu í morgun. Tveir fólksbílar lentu saman og voru tækjabílar frá slökkviliðinu kallaðir á staðinn til að ná ökumönnum, sem voru einir í bílunum, út úr þeim.

Ísland miðpunktur í kaupum á ferðaþjónustu

Hin árlega Mid-Atlantic kaupstefna verður haldin dagana 8.–11. febrúar í anddyri nýju og gömlu Laugardalshallarinnar. Kaupstefnan er á vegum Icelandair og er markmið hennar að tengja saman kaupendur og seljendur ferðaþjónustu í Bandaríkjunum og Evrópu.

Sól í Straumi vilja ekki Capacent Gallup

Samtökin Sól í Straumi eru ósátt við að fyrirtækið Capacent Gallup, hafi verið valið af Hafnarfjarðarbæ sem óháður kynningaraðili, í aðdraganda kosninga um stækkun álversins í Straumsvík.

Skjálftahrina við Herðubreiðarlindir

Skjálftahrinan við Herðubreiðarlindir stendur enn yfir en hrinan hófst í síðustu viku. Stærsti skjálftinn sem mælst hefur var í morgun upp á 2,5 á richter. Veðurstofunni hafa ekki borist neinar tilkynningar um skjálftarnir hafi fundist í byggð en skjálftahrinur eru á svæðinu öðru hverju.