Segir glæpahring starfandi hér á landi

Sýslumaðurinn á Keflavíkurflugvelli, Jóhann R. Benediktsson, telur að vel skipulagður litháískur glæpahringur standi fyrir umfangsmiklum innflutningi og dreifingu og sölu fíkniefna hér á landi.

Sameining spítalanna misráðin

Læknafélag Íslands telur að sameining spítalanna í Reykjavík hafi verið misráðin og að hagræðingin sem stefnt var að hafi einungis komið fram í fækkun sjúkrarúma. Þetta kemur fram í greinargerð með ályktun félagsins á aðalfundi þess fyrir helgi.

Blóðug átök öfgamanna og stjórnarhersins á Filippseyjum

Fjórtán liggja í valnum og tæplega áttatíu liggja sárir eftir átök íslamskra öfgamanna og stjórnarhersins á Filippseyjum í dag. Hermenn voru sendir í leiðangur um fjalllendi hinnar svokölluðu Jolo-eyju þar sem íslamskir vígamenn voru taldir vera í felum, sem kom á daginn.

Sex börn létust í eldsvoða

Sex systkini létust í eldsvoða í fjölbýlishúsi í Chicago í Bandaríkjunum í gær. Móðir barnanna og þrjú systkini til viðbótar slösuðust í eldinum, en börnin sem létust voru á aldrinum þriggja til fjórtán ára.

Hermaður NATO beið bana eftir árás samherja

Einn hermaður NATO lést og nokkrir særðust í árás samherja þeirra í Suður-Afganistan í morgun. Hermennirnir áttu í átökum við vígamenn úr röðum talíbana og höfðu kallað eftir aðstoð frá lofthernum.

„Krókódílamaðurinn" lést eftir árás stingskötu

Ástralski sjónvarpsmaðurinn Steve Irwin, best þekktur fyrir nána umgengni sína við krókódíla og önnur viðsjárverð dýr, lést í nótt eftir árás stingskötu í köfunarferð. Irwin var að gera heimildarmynd um stóra kóralrifið við Norðaustur Queensland þegar atburðurinn átti sér stað.

Sænski Folkepartiet braust inn á netsvæði andstæðinganna

Sænski Sósíaldemókrataflokkurinn hefur kært stjórnmálaflokkinn Folkepartiet fyrir umfangsmikla tölvuglæpi eftir að upp komst að flokksmenn Folkepartiet höfðu ítrekað brotist inn á lokað netsvæði sósíaldemókratanna sem geymir ýmis trúnaðarmál þeirra, þ.á m. uppskriftina að kosningabaráttu sósíaldemókratanna.

Kvikmynd á leiðinni?

Undirbúningur að kvikmynd um Baugsmálið er hafinn. Þetta segir Jóhannes Jónsson í Bónus í viðtali við Sirrý í þættinum Örlagadeginum, sem sýndur verður á NFS í kvöld.

Ræðst á næstu vikum

Tveir fundir á næstu vikum ráða úrslitum um hvort eitthvað komi út úr tveggja ára starfi stjórnarskrárnefndar. Ákveðin pattstaða ríkir vegna tuttugustu og sjöttu greinar stjórnarskrárinnar, sem snýr að málskotsrétti forsetans.

Fíkniefnahundur á Litla-Hraun

Ákvörðun hefur verið tekin um að fá fíkniefnahund á Litla-Hraun. Þjálfari hundsins hefur þegar hafið leitina að rétta hundinum og vonast til að hann verði kominn til starfa í fangelsinu eftir um tvo mánuði.

Vildu ekki senda viðgerðarmann um helgi

Öryggishnappur hjá eldri konu í Stórholtinu var óvirkur í rúman sólarhring eftir að verktaki gróf í sundur símalínuna. Þá voru aðrir íbúar við götuna án netsambands og sumir án sjónvarps. Ekki stóð til að gera við bilunina fyrr en á morgun, þar til Síminn vissi að málið væri komið í fjölmiðla.

Um 5000 manns kynntu sér starfsemi álversins í Straumsvík

Hátt í fimm þúsund manns kynntu sér starfsemi álversins í Straumsvík í dag þegar álverið var opnað fyrir almenning. Boðið var upp a skoðunarferðir um álverið undir leiðsögn starfsmanna, sem og menningu og fræðslu af ýmsum toga fyrir unga sem aldna. Til að lágmarka umferð einkabíla um svæðið voru rútuferðir til Straumsvíkur frá bílaplani Fjarðarkaupa við Bæjarhraun í Hafnarfirði. Álverið var síðast opnað almenningi fyrir níu árum eða um það leyti sem kerskáli þrjú var tekinn í notkun.

Ekki einsdæmi að reynt sé að hafa áhrif á fræðimenn

Páll Skúlason fyrrum rektor Háskóla Íslands segir að þrír menn innan háskólans hafi komið að máli við sig vegna málflutnings Stefáns Ólafssonar prófessors um efnahagsmál. Hann segir að þegar háskólamenn tjái sig opinberlega þá geri þeir það í eigin nafni en ekki háskólans.

Vill vera hjá pabba í Pakistan

Ung skosk stúlka, Molly Campbell, sagði á fréttamannafundi í Pakistan í dag að hún vildi fremur dvelja hjá föður sínum í Pakistan en móður sinni í Skotlandi. Foreldrar stúlkunnar eru skilin og hafa deilt um forræði yfir henni.

Ítalir taka sér stöðu í Líbanon

Ítalskar hersveitir gengu áfram á land í Suður-Líbanon í dag, annan daginn í röð. Talsmaður friðargæsluliðs Sameinuðu þjóðanna í Líbanon sagði að 880 ítalskir hermenn yrðu komnir til landsins og búnir að taka sér stöðu fyrir austan hafnarborgina Tírus fyrir kvöldið.

Hneyksli fyrir kvennaknattspyrnuna

Kvennalið Vals er nú formlega orðið Íslandsmeistari í kvennaknattspyrnu, en ekki er hægt að segja að liðið hafi fengið tækifæri til að ljúka keppni með tilþrifum því lið FH mætti aðeins með 6 leikmenn til leiks á Valbjarnarvöll og því var Valsliðinu dæmdur sigur án þess að flautað væri til leiks. Þjálfari Vals kallar atvikið hneyksli fyrir kvennaknattspyrnuna.

Viðskiptaháskólinn á Bifröst verður Háskólinn á Bifröst

Viðskiptaháskólinn á Bifröst skiptir um nafn og verður Háskólinn á Bifröst, og Bifröst University á ensku. Magnús Árni Magnússon, fráfarandi aðstoðarrektor, kynnti nýtt nafn og ástæðu nafnabreytingar. Nafnið er í takt við nýja tíma því skólinn hefur aukið námsframboð sitt á síðustu árum og býður nú fjölbreytt nám við þrjár deildir, viðskiptadeild, lagadeild og félagsvísindadeild. Skólinn var settur við hátíðlega athöfn í dag og munu um 700 manns stunda þar nám í vetur. Þetta er áttugasta og níunda starfsár skólans sem hefur starfað á tveimur stöðum undir fjórum nöfnum á ýmsum skólastigum.

Lífleg Ljósanótt

Um fjörtíu þúsund manns voru á Ljósanótt í Reykjanesbæ í gærkvöldi og voru hátíðarhöldin í gær þau fjölsóttustu til þessa en Ljósanótt var haldin nú í sjöunda sinn.

Fjölbreyttur varningur til sölu á sveitamarkaði

Nú stendur yfir markaðsdagur í gamla sláturhúsinu við Laxá Í Leirársveit. Sveitamarkaðurinn hefur verið opinn alla daga í sumar en þar er til sölu heimaframleiddur varningur af ýmsu tagi, handverk og vörur sem hvergi er á boðstólum annars staðar. Þetta er í næst síðasta sinn sem markaðurinn er haldinn í sumar en hann verður einnig næstkomandi sunnudag. Þá mun hann opna að nýju í lok nóvermber og þá verður settur upp jólamarkaður.

Enginn slasaðist þegar flugvél nauðlenti í Eyjafirði

Betur fór en á horfðist þegar lítil flugvél nauðlenti skammt frá svokölluðum Gamla Hjalteyrarvegi í Eyjafirði á öðrum tímanum í dag. Tveir menn voru innanborðs, flugkennari og nemandi hans, en þeir eru ómeiddir. Talið er að mannleg mistök hafi valdið því að þeir þurftu að nauðlenda. Vélin steyptist á hvolf í lendingunni og er nokkuð skemmd. Rannsóknarnefnd flugslysa er komin á staðinn en búið er að loka vettvangi og verið er að rannsaka orsakir slyssins.

Skutu niður georgíska herþyrlu

Aðskilnaðarsinnar í Suður-Ossetíu skutu í dag niður herþyrlu stjórnarhersins í Georgíu, að sögn rússnesku fréttastofunnar Interfax. Suður-Ossetía er hérað í Georgíu, en aðskilnaðarsinnar hafa stjórnað héraðinu með með stuðningi rússneskra stjórnvalda um árabil.

Mannfall í átökum í Afganistan

Þrír kanadískir hermenn voru meðal þeirra sem féllu í hörðum bardögum í Afganistan, að sögn afganska varnarmálaráðuneytisins í dag. Herir Atlandshafsbandalagsins og uppreisnarmenn talibana hafa undanfarið barist í Kandahar sýslu

Gefur kost á sér í 3. sæti í SV-kjördæmi

Valdimar Leó Friðriksson, 9. þingmaður Samfylkingarinnar í Suðvesturkjördæmi, hefur ákveðið að gefa kost á sér til áframhaldandi þingmennsku fyrir Samfylkinguna. Hann óskar eftir stuðningi Samfylkingarfólks í 3. sæti listans fyrir Suðvesturkjördæmi.

Árleg messa í Eyrarkirkju í dag

Árviss messa verður haldin í Eyrarkirkju í Seyðisfirði í Ísafjarðardjúpi kl. 14 í dag. Fréttavefur Bæjarins besta á Ísafirði greinir frá því hefð hafi myndast fyrir tíu árum eða svo að messa árlega í kirkjunni. Kirkjan er merkileg fyrir margar sakir en hún var reist árið 1866 og gerð upp fyrir áratug síðan. Kirkjan var friðuð í byrjun árs 1990. Það er Valdimar Hreiðarsson, sóknarprestur á Suðureyri sem messar og Sigríður Ragnarsdóttir er organisti.

Nokkuð um þjófnað á gaskútum

Undanfarið hefur talsvert borið á þjófnaði á gaskútum og eru slík mál til rannsóknar hjá lögreglunni í Reykjavík. Nokkrir voru handteknir vegna þessa fyrir helgina en einn mannanna tók gaskút ófrjálsri hendi og hinir eru meintir vitorðsmenn hans. Þá liggur einn aðili undir grun og verður hann færður til yfirheyrslu fljótlega. Enginn hefur tilkynnt þjófnað á gaskútum um helgina en sölumenn gaskúta hafa verið mjög á verðbergi síðustu daga.

Næst æðsti leiðtogi Al-Kaída í Íran handtekinn

Íraskur embættismaður sagði í morgun að næst æðsti leiðtogi Al Kaída samtakanna í Írak hefði verið handtekinn. Maðurinn heitir Hamed Juma Faris Al-Suaidi.

Evrópufar hrapar á tunglið

Fyrsta geimfar Evrópumanna lauk ferð sinni í dag á fyrirfram ætlaðan hátt með því að rekast á tunglið. Evrópska geimferðastofnunin stóð fyrir förinni, sem hófst fyrir þremur árum.

Íranar vilja semja en ekki hætta að auðga úran

Kofi Annan framkvæmdastjóri Sameinuðu þjóðanna hefur eftir forseta Írans að Íranar séu reiðubúnir að semja um kjarnorkumál, en að þeir muni ekki hætta við að auðga úrans áður en samningaviðræður hefjast.

Ungmennin yfirheyrð í dag

Til óeirða kom milli lögreglu og unglinga í Skeifunni skömmu eftir miðnætti í nótt en hátt í 200 unglingarnir voru þar samankomnir vegna einkasamkvæmis. Lögregla beitti kylfum í átökunum en tíu manns voru handteknir og gistu fangageymslur í nótt.

Féll niður af húsþaki

Maður á þrítugsaldri var fluttur á gjörgæslu Landspítalans í nótt eftir að hann féll niður af húsþaki í miðborginni. Maðurinn fór út á svalir og þaðan þakið en hann hugðist njóta útsýnisins. Maðurinn rann í dögginni á þakinu með fyrrgreindum afleiðingum en fallið var um átta metrar. Maðurinn er nokkuð slasaður en líðan hans er stöðug og hann er með meðvitund. Nóttin var annars erilsöm hjá lögreglu en mikill mannfjöldi var samankominn í miðbænum og höfðu leigubílar vart undan að ferja fólkið heim í morgunsárið.

Lögregla beitti kylfum í óeirðum

Til óeirða kom milli lögreglu og unglinga í Skeifunni skömmu eftir miðnætti í nótt en um 200 unglingarnir voru þar samankomnir vegna samkvæmis. Ungur maður hafði kastaði af sér þvagi í hraðbanka SPRON og létu öryggisverðir lögreglu vita. Þegar lögregla kom á staðinn og hugðist handtaka manninn veittist hópurinn að lögreglunni og reyndi að koma í veg fyrir handtökuna.

Ætla að safna fyrir skóla í Pakistan

Borgarholtsskóli heldur upp á tíu ára afmæli sitt með fjársöfnun sem vonast er til að dugi fyrir nýjum skóla í Pakistan.

Þrýst á fyrrum rektor HÍ að beita áhrifum sínum

Stefán Ólafsson prófessor segir að þrýst hafi verið á þáverandi rektor Háskóla Íslands, um að hafa áhrif á afskipti Stefáns af efnahagsmálum. Stefán líkir stefnu ríkisstjórnarinnar í efnahagsmálum undanfarna áratugi við stefnu Thatchers, Reagans og Pinochets.

Lögin ekki í lagi

Menntamálaráðherra ætlar að beita sér fyrir breytingu á lögum um rétt barna af erlendum uppruna til skólavistar. Skólayfirvöld í Reykjavík hafa þurft að brjóta lögin til að uppfylla barnasáttmála Sameinuðu Þjóðanna.

Bónorðinu fálega tekið

Steingrímur J. Sigfússon vill stofna hræðslubandalag, segir Jón Sigurðsson, formaður Framsóknarflokksins. Hugmyndir Steingríms um kosningabandalag fá heldur dræmar undirtektir hjá formönnum hinna stjórnarandstöðuflokkanna.

Hafa náð meira en 70 kílóum af amfetamíni

Lögreglan og tollur hafa náð yfir sjötíu kílóum af amfetamíni í nokkrum stórum málum það sem af er árinu. Litháar hafa staðið á bakvið innflutning af tæplega sextíu kíló af amfetamíninu.

Þrír fluttir á slysadeild eftir harðan árekstur í Keflavík

Mjög harður árekstur varð á Hafnargötu á móts við Aðalstöðina í Reykjanesbæ á sjötta tímanum í dag. Þrír voru fluttir á Heilbrigðisstofnun Suðurnesja til aðhlynningar. Ekki er vitað um meiðsl fólksins að svo stöddu. Báðir bílanir eru mikið skemmdir en talir er að ökumaður annars bílsins hafi misst sjórn á honum með fyrrgreindum afleiðingu.

Pottur brotinn í eftirliti með hraðakstri í Danmörku

Lene Espersen dómsmálaráðherra Danmerkur hefur beðið ríkislögreglustjóra í Danmörku að kanna hvort pottur sé brotinn í eftirliti með hraðakstri. Danska blaðið Berlingske Tidende komst að því nýlega að afar mismunandi er hvernig staðið er að umferðareftirliti í hinum ýmsu lögregluumdæmum.

Fjórtán hermenn létu lífið í Afganistan

Fjórtán breskir hermenn létu lífið í flugslysi í Afganistan í dag. Mennirnir voru í flugvél sem hrapaði nálægt Kandahar í sunnanverðu Afganistan.

Íranar heita fullri samvinnu

Manouchehr Mottaki utanríkisráðherra Írans hét í dag fullri samvinnu Írana varðandi ályktun Öryggisráðs Sameinuðu þjóðanna um vopnahlé í Líbanon. Kofi Annan framkvæmdastjóri Sameinuðu þjóðanna ræddi við hann í Teheran í dag.

TF-Líf sótti mann sem fékk verk fyrir brjóstið

Óskað var eftir aðstoð Landhelgisgæslunnar við að sækja mann sem hafði fengið verk fyrir brjóstið þegar hann var að ganga upp á Esjuna um klukkan þrjú í dag. Maðurinn var undir Þverfellshorni en erfitt færi er á þessum slóðum og því varð að kalla út TF-Líf. Nokkuð hvasst var á Esjunni og miklir sviftivindar en björgunaraðgerðir gengu vel. Maðurinn var fluttur á hjartamóttöku Landspítalans við Hringbraut. Líðan hans er góð og stöðug en hann mun gangast undir rannsóknir í dag.

Stefna Thatchers og Reagans í efnahagsmálum höfð til hliðsjónar hér á landi

Stefán Ólafsson prófessor segir að ríkisstjórnina hafi haft stefnu Thatchers og Reagans í efnahagsmálum til hliðsjónar á síðustu áratugum með þeim afleiðingum að skattbyrði hafi aukist á launafólk.

Frábær sigur á Norður-Írum

Íslenska landsliðið í knattspyrnu vann í dag frábæran 3-0 sigur á Norður-Írum í fyrsta leik sínum í undankeppni EM á Windsor Park í Belfast. Íslenska liðið gerði nánast út um leikinn með mörkum Gunnars Heiðars Þorvaldssonar, Hermanns Hreiðarssonar og Eiðs Smára Guðjohnsen í fyrri hálfleik. Þetta er sannarlega frábær byrjun hjá íslenska liðinu sem tekur næst á móti dönum á Laugardalsvelli í næstu viku.

Íraska stjórnin tekur við Abu Ghraib

Íraska stjórnin hefur nú tekið við lyklavöldum í hinu alræmda Abu Ghraib fangelsi. Enginn fangi var í fangelsinu þegar bandaríski herinn lét það af hendi.

Keppt í þríþraut á Ísafirði og Bolungarvík

Hópurinn Vasa2000 og Heilsubærinn Bolungarvík gangast fyrir árlegri keppni í þríþraut í dag. Á Fréttavef Bæjarins besta segir að keppnin fari fram í Bolungarvík og á Ísafirði og á leiðinni þar á milli. Keppni hefst með 700 metra sundi í sundlauginni í Bolungarvík en að því loknu taka við 17 km hjólreiðar um Óshlíð til Ísafjarðar og loks 7 km hlaup eftir Skutulsfjarðarbraut á Ísafirði. Þetta er í fimmta sinn sem keppnin er haldin. Um fjörtíu manns eru skráðir til leiks að þessu sinni en þáttaka hefur aukist ár frá ári.