Fundað í flugvirkjadeilu

Komið hafi fram á fundi með flugvirkjum í gær ósk um að reyna til þrautar að ná samningum, enda sé það vilji beggja aðila að afstýra boðuðu verkfalli.

Sáttasemjari segir miðlunartillögu eitt af því sem væri til skoðunar, væri hún líkleg til að sætta sjónarmiðin, og hafi hann nú þegar fyrirliggjandi einhverjar tillögur sem unnt væri að leggja fram skapist grundvöllur til þess.

Ástráður segist bjartsýnn þar til annað kemur á daginn, nú sé gerð úrslitatilraun til að afstýra verkfalli, sem að óbreyttu mun hefjast aðfaranótt miðvikudagsins 23. september.

Samningar flugvirkja hafa verið lausir frá síðustu áramótum, í rúma átta mánuði. Viðræður hófust í nóvember í fyrra og deilunni var vísað til ríkissáttasemjara í febrúar. Megindeiluefnið er leiðrétting vegna skekkju í kjörum flugvirkja gagnvart viðmiðunarstéttum, en Icelandair hefur sagt kröfur þeirra umfram svigrúm félagsins.

Fyrirhugað verkfall hefur þegar haft áhrif á ferðaáætlanir fólks, en rúmlega þúsund farþegar Icelandair hafa nýtt sér boð félagsins um að færa flug vegna þess. Þá hefur verið greint frá afbókunum hjá ferðaþjónustufyrirtækjum hér innanlands.