Gagn­rýnir við­bragð lög­reglu eftir á­hlaup ung­menna

Vísir greindi frá því í dag að annar skemmtistaðanna sem lögregla lét loka í nótt vegna fjölda ungmenna þar inni væri Prikið. Í yfirlýsingu sem Geoffrey Þ. Huntingdon-Williams, einn af eigendum Priksins, sendi fréttastofu kemur fram að ungmenni hafi gert ákveðið áhlaup á staðinn. 

„Staðurinn er vinsæll, með virka og reglulega tónleikadagskrá sem trekkir að. Röð atvika veldur því að á tímapunkti var eitthvað magn af fólki undir aldri búið að ná að lauma sér inn á staðinn. Hafa fölsuð skilríki verið okkur og mörgum öðrum stöðum í miðborginni hvimleitt vandamál á tækniöld, en í gærkvöldi var álagið einnig slíkt að ekki náðist að gæta bakrýmis þar sem kliffært er til að „stelast“ inn,“ segir í yfirlýsingunni. 

Ekkert samband haft við eigendur

Starfsmenn staðarins hafi unnið að því að koma fólki sem stalst inn aftur út þegar lögreglu bar að garði. Búið var að bæta við dyravörðum og ákveðið að telja fólk aftur inn á staðinn. Í yfirlýsingunni segir að lögregla hafi sagt þær aðgerðir fullnægjandi en svo á klaufalegan hátt dregið það til baka og gert starfsmönnum að loka staðnum. 

„Viðbragð lögreglu var að okkar mati brot á meðalhófsreglu og samkomulaginu um örugga skemmtistaði sem Prikið hefur alltaf virt: Var virkt viðbragð og virk aðgerð við aðstæðum í gangi, fullt samstarf staðarins við viðbragðsaðila og sýnilegur vilji okkar til að árétta aðstæður á einni stærstu nótt skemmtanalífsins til staðar. Ekkert samband var haft við eigendur og ábyrgðarmenn leyfis heldur þurfti starfsfólk að hafa samband til að upplýsa um aðstæður. Finnst okkur það því miður óboðlegt og mun málið sæta umkvörtunum þess efnis,“ segir í yfirlýsingunni. 

Vinna ávallt eftir samkomulaginu

Prikið kom að því að stofna Samtök reykvískra skemmtistaða sem fóru fyrir samkomulaginu um örugga skemmtistaði. 

„Þar er ein mikilvægasta grunnstoðin sú að ungmennum yngri en 20 ára er óheimil dvöl á skemmtistað eftir kl. 22:00. Einnig er þar ákvæði í stefnu lögreglu um að stuðla að góðum samskiptum við stjórnendur og starfsfólk skemmtistaða, og að öll formleg og óformleg samskipti eigi að fara fram beint og milliliðalaust milli starfsmanna skemmtistaða og tengiliða lögreglu,“ segir í yfirlýsingunni. 

Tekið er þó fram að aðhald og innlit viðbragðsaðila sé ávallt velkomið á Prikinu. Þá þakka eigendurnir öllum fyrir Menningarnótt, starfsfólki, listafólki, viðbragðsaðilum og gestum. 

Hér fyrir neðan má lesa yfirlýsinguna í heild sinni.

Gömlu Reykjavík var einnig lokað

Kránni og veitingastaðnum Gömlu Reykjavík á Austurvelli var einnig lokað og rýmd í gærkvöldi vegna viðveru ungmenna undir tuttugu ára aldri. Þetta staðfestir Skarphéðinn Guðmundsson, einn rekstraraðila Gömlu Reykjavíkur. Hann segist sjálfur ekki hafa verið viðstaddur þegar lögreglu bar að garði og því ekki geta gefið neinar upplýsingar um atburðinn, til að mynda hversu margir gestir hefðu verið inni á staðnum þegar hann var rýmdur.

Aðspurður segir Skarphéðinn lokunina vissulega hafa verið mikið tap fyrir staðinn á kvöldi sem þessu þar sem margt var um manninn í miðborg Reykjavíkur. Hann hafi ekki lent í slíku atviki áður.