Vona að hægt verði að keyra til Eyja eftir tíu ár

Þessar vikurnar fara fram kjarnaboranir á Eiðinu á Heimaey en þær eru gerðar til að kanna fýsileika jarðganga á milli lands og Eyja.

Félagið Eyjagöng hefur yfirumsjón með verkefninu í samvinnu við Völuberg, Eflu og Vegagerðina. Karl prins er nafn kjarnaborsins sem notaður er til verksins og er engin smásmíði.

„Nú ætlum við að bora, vonandi fjögur hundruð metra hérna niður og ná í kjarnasýni. Út frá því getum við greint jarðlög, mælt styrk, sprungur og þéttleika,“ segir Benedikt Óskar Steingrímsson jarðfræðingur hjá Völubergi. 

Nú þegar er búið að bora um 70 metra niður og segir Benedikt jarðsögu Vestmannaeyja koma í ljós.

„Þegar við höfum náð botni hér þá verður tekið saman hér í Eyjum og tækin flutt upp í landeyjasand, suður af Krossi þar sem verður tekin önnur hola, 300 metra djúp.“

„Erum nálægt öllum helstu náttúruperlum“

Hluthafar í Eyjagöngum eru sveitarfélög og ýmis fyrirtæki en markmið félagsins er að eyða óvissu í tengslum við jarðgangnagerð til Eyja.

„Hvað varðar fjárhagslega burði, við viljum meina að þetta muni standa undir sér. Umferðin, við sjáum hana vera að aukast ár frá ári um suðurlandið og við erum rosalega nálægt öllum helstu ferðamannaperlum Íslands sem eru á Suðurlandi.“

Haraldur segir félagið eiga í góðu samtali við innviðaráðherra. Stefnt er á að rannsóknunum ljúki í lok árs.

„Hvenær verður hægt að keyra á milli? Við höfum sett okkur þá sviðsmynd að það væri tíu ár. Þá værum við að fara í rannsóknarferli núna í tvö til þrjú ár og svo fjármögnunarfasa á seinni hluta þess tíma samhliða.“

„Síðan myndum við fara í borun og framkvæmdir sem myndi taka fjögur til fimm ár frá báðum endum. Í kjölfarið þá þyrfti að steypa göngin þannig að þetta yrði í heildina um tíu ár,“ segir Haraldur að lokum.