Pílagrímaflug Air Atlanta á fullri ferð þrátt fyrir á­tök

Í kvöldfréttum Sýnar mátti sjá myndir frá Jedda í Sádi-Arabíu en hjá flugfélaginu Atlanta hófst pílagrímaflugið þann 16. apríl. Í höfuðstöðvunum í Kópavogi segja menn átökin ekki hafa haft nein áhrif á verkefnið til þessa.

„Að svo stöddu, nei. Það hefur ekki haft nein áhrif. En auðvitað fylgjumst við með ástandinu frá degi til dags. En þetta er mjög mikilvægt fyrir Sádía og fyrir þjóðina, Sádi-Arabíu, að pílagrímaflugið haldi dampi. Og það hefur gert það,“ segir Magnús Sigurðsson, framkvæmdastjóri flugrekstrar Air Atlanta.

Flugvélar Air Atlanta eru merktar Sádía-flugfélaginu. En þegar farþegar ganga um borð sést að þær eru reknar af Air Atlanta.

„Við erum með fjórar vélar í fullum rekstri, 777 vélar frá Boeing, sem taka meira en 400 farþega í hverju flugi,“ segir Magnús.

Flugvélar Atlanta flytja múslima til og frá Sádi-Arabíu um langan veg en verkefnið stendur fram til 1. júlí.

„Við fljúgum mestmegnis á Indónesíu, sem er um það bil tíu tíma flug. Svo höfum við líka flogið til Taílands og Bangladess í þessu pílagrímaflugi,“ segir Magnús í sjónvarpsfréttinni, sem sjá má hér:

Pílagrímaflugið varð fljótlega eftir stofnun Atlanta fyrir fjörutíu árum einn af lykilþáttum í rekstri félagsins. Og svo er enn.

„Það eru færri vélar heldur en voru hérna á árum áður. En engu að síður þá er þetta alltaf stór þáttur, mjög stór þáttur í okkar rekstri og mjög mikilvægt.“

Og pílagrímaflugið kallar á mikinn starfsmannafjölda.

„Þetta eru á milli fimm og sex hundruð manns í það heila. Fyrir utan þá sem eru náttúrulega að vinna hérna í höfuðstöðvunum,“ segir Magnús.

Þáttur Flugþjóðarinnar um sögu pílagrímaflugs Íslendinga er sýndur í opinni dagskrá á Sýn klukkan 19:15.