Flug­vél fór út af og öllum brautum lokað

„Þetta er bara minniháttar,“ segir Guðni Sigurðsson, upplýsingafulltrúi Icelandair, í samtali við Vísi. 

„En samkvæmt verklagi þarf að framkvæma skoðun á vélinni, svo fer hún líklega bara í afísingu og áfram sína leið.“

Hann segir að vélin, sem er af tegundinni Airbus A321, hafi verið á leið frá hliði og runnið til er henni var ekið frá flugstöðinni. Engan hafi sakað en um fulla vél var að ræða. 

Mikil hálka er á vellinum, að sögn Guðna en gular veðurviðvaranir hafa verið í gildi víða um landið í dag. Hann segir að vélin fari að líkindum í loftið á ný um leið og búið sé að draga hana. Vélin á að fara til Lundúna.

Samkvæmt heimildum fréttastofu var öllum brautum á vellinum lokað en upp úr klukkan 18 voru flugvélar teknar að lenda á vellinum á ný eftir að hafa verið flogið í biðstöðu í nokkra stund. 

Farþegi sagði við Vísi klukkan 18.30 í að farþegum hefði verið tilkynnt að vegna hálku væri erfitt fyrir önnur farartæki á vellinum að komast að vélinni. Farþegar hefðu setið í vélinni síðan klukkan 18.

Fréttin hefur verið uppfærð.