For­maður Pírata sækist eftir öðru til fjórða sæti

Dóra Björt Guðjónsdóttir leiddi listann í síðustu kosningum en hún hefur nú gengið til liðs við Samfylkinguna. Prófkjör Pírata í Reykjavík hefst 26. febrúar.

Olga Margrét Kristínardóttir Cilia lögmaður býður sig fram í annað sæti listans. Einnig sækist Oktavía Hrund Guðrúnar Jóns, formaður Pírata, eftir 2. til 4. sæti og bæði Oddur Björn Jónsson, stuðningsfulltrúi í íbúðakjarna, og Unnar Þór Sæmundsson, framkvæmdastjóri og laganemi, eftir 2. til 5. sæti.

Þetta kemur fram í tilkynningu frá Pírötum. Sæborg Ninja Urðardóttir fjöllistakvár óskar eftir fjórða sæti á lista flokksins í borginni og Jökull Leuschner Veigarsson, framkvæmdastjóri og atvinnubílstjóri, eftir 3. til 4. sæti.

Með þrjú sæti en mælast með minna fylgi

Þá óskar Hans Alexander Margrétarson Hansen, deildarstjóri á leikskóla, eftir 4. til. 6. sæti og Guðni Freyr Öfjörð, sem titlaður er urbanisti, 9. til 10. sæti fyrir borgarstjórnarkosningarnar í maí.

Tinna Helgadóttir, viðskiptafræðingur og 3. varaborgarfulltrúi Pírata, gefur sömuleiðis kost á sér en sækist ekki eftir tilteknu sæti, ef marka má tilkynningu Pírata.

Um tvö þúsund manns eru skráðir félagar í Pírötum í Reykjavík og eru þar með á kjörskrá í komandi prófkjöri. Verður sem fyrr kosið rafrænt og lýkur prófkjörinu 6. mars. 

Píratar eru í dag með þrjú sæti í borgarstjórn. Samkvæmt könnun Gallup sem framkvæmd var í lok janúar hefur stuðningur við flokkinn minnkað en samkvæmt henni myndu Píratar missa tvö sæti. 

Þurfi að standa vörð um mannréttindi

Olga Margrét Cilia sem gefur kost á sér í 2. sæti listans í Reykjavík hefur setið í framkvæmdastjórn Pírata og sinnt varaþingmennsku fyrir flokkinn.

„Við lifum á fasískum tímum og nú meira en áður þurfum við að huga að jaðarsettum hópum og standa vörð um mannréttindi fyrir okkur öll ! Gagnsæi, ábyrg stjórnmál og virkt eftirlit með valdi eru þau gildi sem ég starfa fyrst og fremst eftir,“ segir hún í tilkynningu.

Hún vilji sjá frjálslyndan mannréttindaflokk sem berjist fyrir lýðræði í borgarstjórn.

„Sjálfsákvörðunarréttur einstaklinga á að vera í forgrunni í allri ákvarðanatöku borgarinnar. Reykjavík er fyrst og fremst þjónustuaðili fyrir borgara, þau sem kjósa okkur til valda. Við þurfum að kjarna lögmætt hlutverk borgarinnar betur og einblína á það sem gerir borgina að góðum stað fyrir öll. 

Í forgrunni á að vera fjölskylduvæn borg þar sem börn fá leikskólapláss og þar sem við erum ekki háð bílnum í hversdeginum. Ég vil sjá grósku í menningu og listum á forsendum unga fólksins. Ég vil sjá raunhæfan íbúðarmarkað fyrir fólk ekki fyrirtæki og gróða. Ég vil eftirlit með valdi og vernd friðhelgis okkar!“

Fréttin hefur verið uppfærð.