Féll allt að tuttugu metra við foss á Snæ­fells­nesi

Útkall vegna slyssins barst Neyðarlínunni á þriðja tímanum í dag og voru bæði björgunarsveitir frá Grundarfirði og Stykkishólmi kallaðar út. Lögreglan kom einnig að málinu. 

Slysið varð á Vatnaleið sem liggur þvert yfir Snæfellsnes en þyrla Landhelgisgæslunnar sem var í æfingaflugi var látin sækja lækni og koma með á vettvang. Þyrlan flutti svo manninn til Reykjavíkur á fimmta tímanum.

Ásmundur Kristinn Ásmundsson aðstoðaryfirlögregluþjónn á Vesturlandi segir í samtali við fréttastofu að maðurinn hafi verið með meðvitund þegar viðbragðsaðila bar að. Ekki liggur fyrir um hversu alvarleg meiðsli mannsin eru.

Ferðamaðurinn hafi verið á göngu skammt frá útsýnispalli yfir Selvallavatni. Ásmundur segir göngustíginn hafa verið hálan, ferðamaðurinn runnið og fallið niður það sem lögreglumenn á vettvangi töldu vera um 15-20 metra.

Ásmundur ítrekar að mun betur hafi farið en á horfðist þegar útkallið barst. Þessu megi meðal annars þakka því að ferðamaðurinn hafi lent á bakkanum en ekki úti í ánni.

Jón Þór Víglundsson, upplýsingafulltrúi Landsbjargar, segir að öllum aðgerðum á svæðinu sé lokið. 

Fréttin hefur verið uppfærð.