Þurfa að hlífa henni við fjöl­miðlum vegna heilaþreytu

Aðgerðirnar koma fram í sérstakri tilkynningu til fjölmiðla á miðvikudag sem norska ríkisútvarpið fjallar um.

Svahn snýr aftur í heimsbikarinn í Granåsen um næstu helgi. Hún er að koma aftur eftir að hafa fengið heilahristing og orðið fyrir hálsmeiðslum þegar hún féll á sama stað fyrr á árinu þegar hún var að undirbúa sig fyrir heimsmeistaramótið í skíðagöngu.

Í sumar og haust hefur allt gengið í rétta átt hjá skíðastjörnunni, en að sögn sænska skíðasambandsins glímir Svahn enn við það sem lýst er sem „viðvarandi heilaþreytu“.

Þetta hefur valdið henni erfiðleikum.

„Undanfarið höfum við meðal annars í tengslum við blaðamannafundi tekið eftir bakslagi í formi heilaþreytu hjá Linn, sem í aðstæðum með miklum áreitum, hávaða og hreyfingu hefur haft áhrif á endurhæfingu hennar,“ segir Rickard Noberius, landsliðslæknir Svíþjóðar.

„Þess vegna höfum við tekið þá ákvörðun að hlífa Linn við aðstæðum sem geta haft neikvæð áhrif og að einbeita okkur að fullu að framkvæmd keppnanna,“ bætir hann við.