Tískukóngur og húðdrottning ást­fangin

Heimildir Vísi herma að parið hafi verið að slá sér upp undanfarna mánuði. Ummerki þess hafa sést á samfélagsmiðlum upp á síðkastið en Helga hefur þar birt myndir af sér heima hjá Jóni.

Um helgina birti Helga síðan mynd af Jóni Davíð á Instagram-hringrás sinni þar sem þau voru greinilega saman á Hótel Rangá ásamt fleiri Húrra-liðum, Sindra Snæ Jenssyni og Alexíu Mist Baldursdóttir.

Jón Davíð er fæddur árið 1988 en Helga Sigrún árið 1997 og því níu ára aldursmunur á parinu.

Húrra og húð

Jón Davíð stofnaði Húrra Reykjavík ásamt Sindra Snæ árið 2014 og var hann framkvæmdastjóri fyrirtækisins frá stofnun til ársins 2021. Auk þess að reka sístækkandi Húrra-veldið hafa þeir félagar einnig farið út í pizzastaða-, hamborgarastaða og skemmtistaðarekstur.

Helga Sigrún er menntuð í efnaverkfræði og hagnýtri efnafræði og hefur helgað feril sinn húð- og snyrtivörum. Hún stofnaði húðvörufyrirtækið Dóttir Skin árið 2021 með Crossfit-köppunum Annie Mist og Katrínu Tönju. Fyrirtækið hóf starfsemi 2024 og gaf út fyrstu íslensku sólarvörnina síðasta sumar.

Nýverið hóf Húrra Reykjavík einmitt að selja vörur Dóttur Skin.