Kobe Bry­ant á enn­þá lang­vinsælustu skóna í NBA

Michael Jordan ruddi án vafa brautina þegar kom að samkrulli NBA stjarna og vörumerkja en Kobe Bryant ber höfuð og herðar yfir aðra leikmenn í dag þegar kemur að skóm. Í dag eru yfir 130 leikmenn sem leika í skóm með eru kenndir við Kobe.

Því fer fjarri að allir leikmenn deildarinnar séu svo heppnir að vera með nafnið sitt hengt á skó en slíkum samningum fylgja alla jafna gríðarlega háar upphæðir fyrir leikmenn. Þrátt fyrir að Kobe hafi fallið frá árið 2020 eru skórnir hans ennþá gríðarlega vinsælir og í raun kemst enginn annar leikmaður með tærnar þar sem skórnir hans Kobe hafa hælana.

Þá eru Nike skór einnig í algjörum sérflokki, en af fimm vinsælustu skónum á Nike alla. Adidas eru næstir á blað með skó sem eru kenndir við James Harden en Adidas bauð Harden á sínum tíma 200 milljónir dollara fyrir að skipta úr Nike yfir í Adidas.

Þá er einnig athyglisvert að í fjórða sæti eru skór sem kenndir eru við Sabrina Ionescu, sem leikur í WNBA. Það þýðir að á topp fimm listanum yfir vinsælustu skóna í NBA deildinni eru tvær tegundir kenndar við leikmenn sem leika ekki í deildinni.

Af þeim ellefu skóm sem Nike gerði í samvinnu við Kobe, eru Kobe 6 langvinsælastir meðal leikmanna NBA deildarinnar. Skórnir komu fyrst á markað árið 2011 og eru af mörgum taldir bestu skórnir sem komu úr þessu samstarfi.

Nike er í algjörri yfirburðastöðu þegar kemur að skóm í NBA deildinni. Adidas kemur þar á eftir en hlutfallið er í raun hverfandi í samanburði við risann Nike. Adidas er þó eina vörumerkið fyrir utan Nike sem á fleiri en eina skó kennda við leikmenn á topplistanum, þá James Harden, Donovan Mitchell og Damian Lillard.