Upp­gjörið: Ís­land - Slóvenía 79-87 | Sárt tap í Spodek

Íslenska karlalandsliðið í körfubolta tapaði naumlega fyrir Luka Doncic og félögum í Slóveníu, 79-87, í fjórða leik sínum í D-riðli Evrópumótsins í körfubolta.

Leikurinn var lengst af jafn en slakur þriðji leikhluti reyndist Íslendingum dýr. Slóvenar unnu hann, 24-11, en Íslendingar áttu góða endurkomu í fjórða leikhluta. Hún dugði þó ekki til.

Martin Hermannsson var stigahæstur í íslenska liðinu með 22 stig. Tryggvi Snær Hlinason skoraði ellefu stig og tók fjórtán fráköst en fékk sína fimmtu villu þegar þrjár mínútur voru eftir. Kristinn Pálsson og Jón Axel Guðmundsson skoruðu einnig ellefu stig og settu niður nokkra góða þrisa.

Luka Doncic var stiga- og stoðsendingahæstur allra, með 22 stig og sjö stoðsendingar. 

Doncic í villuvandræðum og Ísland aðeins stigi undir í hálfleik

Fyrri hálfleikurinn var flottur hjá strákunum okkar, þó þeir hafi verið að elta og endað einu stigi undir eftir bæði fyrsta leikhlutann og þegar hálfleikurinn var flautaður af.

Staðan í hálfleik var 35-36 fyrir Slóveníu en Luka Doncic lenti snemma í villuvandræðum og sat lengi á bekknum, sem hjálpaði mikið við að hægja á sóknarleik Slóvena. Sömuleiðis varð hann mjög pirraður á dómurunum og smitaði út frá sér neikvæða orku.

Sóknarleikur Íslands gekk hins vegar smurt, fyrir utan kannski síðustu þrjár mínútur fyrri hálfleiks þegar bæði lið voru í vandræðum.

Martin Hermannsson leiddi stigasöfnun liðsins, var aðgangsharður og réðst á körfuna, sem opnaði líka á skotmennina fyrir utan. Skotnýtingin úr þristum var 36% í fyrri hálfleik, sem er ekkert stórkostlegt en samt það langbesta sem Ísland hefur sýnt á mótinu.

Enn og aftur átti Ísland hins vegar slakan þriðja leikhluta.

Fjórtán stigum undir fyrir fjórða leikhlutann

Eins og í öðrum leikjum mótsins mætti Ísland illa til leiks í seinni hálfleik.

Dómararnir voru strákunum okkar heldur ekki hliðhollir. Nokkrar furðulegar ákvarðanir teknar af tríóinu, tæknivillur og sóknarvillur gefnar sem stuðningsmenn Íslands furðuðu sig á.

Luka Doncic snögghitnaði líka hinumegin, sem hjálpaði alls ekki. Setti niðurtvo erfiða þrista, annan þeirra yfir Tryggva Hlinason sjálfan, sem fáir myndu þora að reyna.

Á sama tíma varð sóknarleikur Íslands stamur og skotin hættu að detta. Ísland skoraði aðeins ellefu stig í þriðja leikhluta og hitti ekki úr einu þriggja stiga skoti þrátt fyrir fimm tilraunir.

Fjórtán stiga munur milli liðanna og staðan 46-60 fyrir Slóveníu þegar þriðja leikhluta lauk.

Flottir í fjórða en fjórtán stiga munur var of mikið

Betur gekk að skjóta boltanum í fjórða leikhluta, mun betur reyndar. Kristinn setti fyrsta þristinn, þruman sem boðaði storminn og fleiri leikmenn létu rigna í kjölfarið. Kári Jónsson, Jón Axel og Martin Hermannsson settu allir niður mikilvæg skot.

Slóvenía svaraði hins vegar jafn óðum, því miður fyrir Ísland þá hitnuðu þeir líka fyrir utan.

Fjórði leikhlutinn varð því að mjög spennandi baráttu en á endanum var of mikill munur milli liðanna. Slóvenía vann sér upp stórt forskot í þriðja leikhluta sem Ísland náði ekki að yfirstíga.

Mótinu lokið en einn leikur eftir

Átta stiga tap varð á endanum niðurstaðan, 79-87 lokatölur og Ísland hefur tapað fyrstu fjórum leikjum Evrópumótsins. Fimmti leikurinn gegn Frakklandi verður spilaður á fimmtudaginn og vonandi sækja strákarnir okkar sinn fyrsta sigur á stórmóti þar en þeir eiga ekki möguleika á að komast áfram í sextán liða úrslit.