Lög­regla dreifði gjör­breyttri mynd af díselþjófum

Lögreglan á höfuðborgarsvæðinu birti myndina með tilkynningu á Facebook í gær í von um að fá upplýsingar um mennina fjóra sem staðnir voru að því í öryggismyndavélaupptökum að stela milljóna króna virði af díselolíu á lóð flutningafyrirtækisins Fraktlausna á Laugarnesi í Reykjavík.

Sjá einnig: Bílar fullir af bensínbrúsum séu úti um alla borg

Nafnlaus aðgangur bjó myndina til

Upptakan var birt á vef Vísis 28. júlí síðastliðinn og svo virðist sem að nafnlaus aðgangur á samfélagsmiðlum hafi tekið skjáskot af mjög svo óskýrri upptökunni og síðan notast við gervigreindarforrit af einhverju tagi til að skálda í eyðurnar.

Í myndbandinu hér að neðan er hægt að sjá skýran samanburð á upptökunni upphaflegu annars vegar og myndinni sem búið er að eiga við með gervigreind hins vegar.

Á upptökunni sést til að mynda ansi vel að einn mannanna var klæddur í gráa hettupeysu og að hann bar svarta húfu á höfði. Í myndinni sem lögreglan dreifði er hann hins vegar kominn í stuttermabol og með þykkt krullað hár. Þar að auki hefur gervigreindin hengt á hann gullkeðju af einhverri ástæðu. Ýmis önnur ummerki um gervigreindarvinnslu sjást á skjáskotinu. Til að merkja hefur gervigreindin sett óþekkt merki á húdd bílsins sem er alveg ógreinilegt í upptökunni.

Eftir því sem fréttastofa kemst næst birtist myndin fyrst á Facebook-hópnum Þjófar á Íslandi þann 27. júlí síðastliðinn. Með færslunni fylgdi textinn: „Skírari mynd af þessum dísel þjófum!“ og reikningurinn sem birti hana heitir Lóa Stína. Ólíklegt er þó að Lóa Stína sé raunverulegt nafn þess sem rekur reikninginn enda var hann stofnaður í maí síðastliðnum og hefur nær einungis birt færslur um múslímska innflytjendur og samtökin No Borders.

Rannsókn í gangi

Unnar Már Ástþórsson, aðalvarðstjóri hjá Lögreglunni á höfuðborgarsvæðinu, er í forsvari fyrir málið. Þegar fréttastofa bar það undir hann gat hann ekki tjáð sig um hvaðan lögreglan hefði haft myndina en segir það í rannsókn.

„Það er komið á fullt núna til að tryggja sannleiksgildi myndarinnar. Við erum að vinna í því, það verður að koma í ljós eftir því sem líður á daginn. Það er ekkert staðfest núna en við erum fagmenn,“ segir hann.