Mæta Víkingum á nýlögðu gervigrasi í Eyjum

ÍBV birti mynd af nýjum Hásteinsvelli á Facebook-síðu félagsins í gær þar sem ungir iðkendur æfðu á nýju gervigrasi. Hefja átti leik á vellinum í maí en tafir urðu á framkvæmdum við völlinn. Eyjamenn hafa leikið á Þórsvelli í Heimaey í upphafi móts í bæði Bestu deild karla og Lengjudeild kvenna.

Fótbolti.net greinir frá því að bið eftir gúmmíkurli til að leggja í nýja grasið hafi valdið töfum.

Völlurinn er aftur á móti klár og mun kvennalið ÍBV vígja nýtt gervigras á Hásteinsvelli í kvöld er það mætir sameiginlegu liði Grindavíkur og Njarðvíkur í Lengjudeild kvenna í kvöld.

Karlalið félagsins mætir Víkingi í Bestu deild karla klukkan 14:00 á morgun. ÍBV vann 3-0 sigur á Víkingi á Þórsvelli í Mjólkurbikar karla fyrr í sumar.