Bein út­sending: Ís­land í efsta sæti á Evrópubikarnum

Íslenska landsliðið er á toppnum í stigakeppninni eftir fyrri daginn með 260 stig, í öðru sæti er Lúxemborg með 219,5 stig og í því þriðja eru Moldóvar með 203 stig. Efstu þrjú liðin fara upp um deild og keppa því í annarri deildinni á Evrópubikarnum 2027.

Keppt var í tuttugu greinum í Maribor í Slóveníu í gær og öðrum sautján greinum í dag en alls sextán íslenskir keppendur stíga á stokk.

Seinni dagur mótsins er nú hafinn og í beinu streymi að ofan. Fyrsti íslenski keppandinn kemur klukkan 12:45 og síðan keppa Íslendingar með reglulegu millibili þar til mótinu lýkur síðdegis.

Frjálsíþróttasambandið tók saman dagskrá íslensku keppendanna á mótinu í dag, hana má finna hér fyrir neðan, yfirfærða á íslenskan tíma.

Dagskráin frá FRÍ:

Seinni dagurinn hefst einnig á sleggjukasti og er núna komið að konunum og þar mætir til leiks Guðrún Karítas Hallgrímsdóttir. Hún er með lengsta kast ársins af skráðum keppendum, en Guðrún Karítas hefur kastað lengst í ár 69,92 m og er það einnig hennar lengsta kast yfir allt. Það er spurning hvort að þetta verði dagurinn þar sem hún kastar yfir 70 metrana. Sleggjukast kvenna hefst klukkan 12:45.

Næst út á völlinn er Irma Gunnarsdóttir, en hún er meðal keppenda í þrístökki kvenna sem hefst klukkan 12:50. Irma er með þriðja besta árangur ársins, en hún hefur í ár stokkið 13,31 m. Irma er Íslandsmethafi í þrístökki og er Íslandsmet hennar 13,61 m frá því síðasta sumar.

Klukkan 13:30 er komið að stangarstökki karla og þar keppir Gunnar Eyjólfsson en hann hefur stokkið 4,25 hæst í ár, sem er fimmti besti árangur skráðra keppenda, en hæst hefur hann stokkið 4,60 m og gerði hann það sl. sumar.

Kúluvarp kvenna hefst klukkan 14:25 og Erna Sóley Gunnarsdóttir er meðal keppenda þar en hún á langbesta ársárangur þeirra, en hún er búin að kasta 17,63 m. Lengst hefur Erna Sóley kastað 17,92 m og er það Íslandsmetið í kúluvarpi kvenna, en hún kastaði það á síðasta ári.

Fyrsta hlaupagrein dagsins er 110 m grindahlaup karla og þar mætir Þorleifur Einar Leifsson á brautina og á hann besta tíma skráðra keppenda, en hann hefur hlaupið best í ár á 14,74 sek, sem er einnig hans besti árangur yfir allt. Þorleifur var í svakalegum gír á Smáþjóðaleikunum í lok maí þannig að það verður gaman að sjá hvað hann gerir í Maribor. 110 m grindahlaup karla hefst klukkan 14:30, en Þorleifur Einar er í seinni riðlinum sem verður ræstur 14:32.

Næst er komið að kringlukasti karla og þar er Mímir Sigurðsson meðal keppenda en hann hefur kastað 52,85 m lengst í ár, sem er fimmti besti árangur skráðra keppenda. En lengst hefur hann kastað 62,08 m og gerði hann það sumarið 2022. Kringlakast karla hefst klukkan 14:35.

Júlía Kristín Jóhannesdóttir keppir í 100 m grindahlaupi kvenna klukkan 14:57, hún er í seinni riðlinum. Hún á annan besta tíma skráðra keppenda, en hún hefur hlaupið hraðast í ár á 13,62 sek en það er einnig hennar besti tími yfir allt. Júlía Kristín hefur verið að mikilli siglingu í grindahlaupinu síðastliðna mánuði þannig að það verður gaman fylgjast með henni á morgun.

Klukkan 15:20 er komið að 1500 m hlaupi kvenna og þar mætir Embla Margrét Hreimsdóttir til leiks, en hennar ársbesta er 4:31,46 mín og er það annar besti tími skráðra keppenda, aðeins nokkrum sekúndubrotum hraðari tími en hjá Aina Cinca Bons frá Andorra sem á best í ár 4:31,93 mín. Þannig að þetta gæti orðið mjög spennandi 1500 m hlaup.

Daði Arnarson mun keppa í 800 m hlaupi karla sem hefst klukkan 15:35, en Daði er í seinni riðlinum sem ræstur er klukkan 17:37. Daði hefur hlaupið á 1:54,12 í ár og er það einnig hans besti tími yfir allt. Þetta er fimmti besti tími skráðra keppenda.

Í hástökki kvenna, sem hefst klukkan 15:50, er Birta María Haraldsdóttir á meðal keppenda en í ár hefur hún stokkið hæst 1,81 m og er það annar besti árangur skráðra keppenda en hæst hefur hún stokkið 1,87 en það gerði hún sl. sumar.

Eir Chang Hlésdóttir, sem átti frábært 100 m hlaup fyrr í dag, mætir aftur á brautina í 200 m hlaupi kvenna sem hefst klukkan 16:00, en Eir er í seinni riðlinum sem ræstur er kl. 16:02. Eir hefur hlaupið hraðast í ár á 23,69 sek, en það gerði hún í vetur þegar hún bætti Íslandsmetið í greininni, og er þetta besti tími skráðra keppenda.

Guðjón Dunbar D. Þorsteinsson er meðal keppenda í þrístökki karla, sem hefst klukkan 16:05. Guðjón hefur stokkið lengst 14,66 m og gerði hann það í ár, og er það sjötti besti árangur skráðra keppenda.

Næst er komið að 200 m hlaupi karla klukkan 16:20, og þar mætir Kristófer Þorgrímsson á brautina en í ár hefur hann hlaupið hraðast á 21,42 sek sem er þriðji besti tími skráðra keppenda. Hraðast hefur Kristófer hlaupið á 21,29 og gerði hann það sl. sumar. Kristófer er í seinni riðlinum sem fer af stað klukkan 18:22.

Sindri Hrafn Guðmundsson er meðal keppenda í spjótkasti karla sem hefst klukkan 16:25, en hann á besta árangur ársins meðal skráðra keppenda, en hann er búinn að kasta 81,39 m lengst í ár, en allra lengst á hann 82,55 m frá sl. sumri.

Klukkan 16:50 er komið að 5000 m hlaupi kvenna og þangað mætir Andrea Kolbeinsdóttir, sem bætti Íslandsmetið í 5 km götuhlaupi í síðustu viku og í 3000 m hindrunarhlaupi fyrr í dag. Andrea er greinilega í svakalegu formi þessa dagana og verður gaman að sjá hvað hún gerir í 5000 m hlaupinu á morgun. Andrea á annan besta tíma skráðra keppenda yfir allt sem er 16:32,42 mín frá því árið 2023. Andrea hefur ekki hlaupið 5000 m (á braut) í ár og á því ekki ársbestan árangur.

Hlynur Andrésson, sem hljóp 1500 m fyrr í dag, mætir aftur á brautina á morgun þegar 3000 m hindrunarhlaup karla fer fram klukkan 17:20. Hlynur á best 8:44,11 mín frá því 2018 og er það annar besti tími skráðra keppenda. Hlynur hefur ekki hlaupið 3000 m hindrunarhlaup á þessu ári og á því ekki skráðan ársbesta tíma.

Lokagrein mótsins er svo 4×400 m blandað boðhlaup, alltaf stemming að enda á boðhlaupi. Íslensku boðhlaupssveitina skipa Ívar Kristinn Jasonarson, Ingibjörg Sigurðardóttir, Sæmundur Ólafsson og Ísold Sævarsdóttir.