Lárus Orri stýrir ÍA út tíma­bilið

Lárus Orri mun taka formlega við þjálfun ÍA eftir leik liðsins gegn Stjörnunni sem fram fer á morgun og mun hann stýra liðinu út keppnistímabilið. Þjálfarateymi liðsins verður að öðru leyti óbreytt frá því sem áður var.

Lárus Orri hefur síðustu ár getið sér gott orð sem sérfræðingur í sjónvarpi, í umfjöllun um íslenska landsliðið og Bestu deild karla, en snýr nú aftur í þjálfun. Hann hefur áður stýrt liðum Þórs á Akureyri og KF.

Þessi 52 ára fyrrverandi atvinnu- og landsliðsmaður ólst upp á Akranesi og lék með yngri flokkum ÍA við góðan orðstír. Hann lék til að mynda til úrslita um Íslandsmeistaratitlana í 2. og 3. flokki í sömu vikunni árið 1989 en flutti svo til Akureyrar með fjölskyldu sinni. Þar lék hann með meistaraflokki Þórs í nokkur ár. 

Hann átti svo magnaðan atvinnumannaferil í Englandi sem spannaði 10 ár þar sem hann lék með Stoke og WBA, bæði í næstefstu deild og úrvalsdeild. Hann á að baki 42 A landsleiki og spilaði auk þess með öllum yngri landsliðum Íslands.