Vara við því að ölvuðu fólki sé boðið að sitja að sumbli í Lysti­garðinum

Til stendur að halda sumar- og bjórhátíð veitingahússins LYST í Lystigarði Akureyrar dagana 18. til 20. júlí. Það verður fjórða árið í röð þar sem handverksbrugghús kynna framleiðslu sína í garðinum.

Ekki eru allir sáttir við áformin. Tvö bréf þar sem áhyggjum var lýst af hátíðinni voru lögð fram til kynningar í bæjarráði Akureyrar á fimmtudag, bæði frá garðyrkjufólki.

Guðríður Helgadóttir, formaður Garðyrkjufélags Íslands, ritaði bænum bréf þar sem hún sagði það skjóta skökku við að drykkjuhátíð væri auglýst í eins dýrmætu plöntusafni og Lystigarðurinn á Akureyri væri. Þekkt væri að dómgreind fólks slævðist verulega þegar það væri undir áhrifum áfengis og þá gætu óhöppin átt sér stað.

„Slík óhöpp þurfa ekki að vera alvarleg en áhættan á því að bjóða ölvuðu fólki upp að sitja að sumbli í grasagarði með óbætanlegum plöntum hlýtur að vera augljós hverjum sem horfa vill,“ skrifar Guðríður sem vill að bæjarstjórn Akureyrar skoði að finna hátíðinni annan stað.

Í svipaðan streng tekur Ásta Camilla Gylfadóttir sem skrifaði sögu Lystigarðsins og vann þar sem garðyrkjufræðingur á sínum tíma. Hún telur bjórhátíð alls ekki eiga heima í garðinum þar sem viðkvæmur gróður sé alltumlykjandi og „fólk í misjöfnu ástandi reiki um garðinn og detti í beðin“.

Líkir hún garðinum við safn með lifandi plöntur.

„Myndi maður vera með samskonar bjórhátíð á Listasafni Akureyrar í Gilinu eða Minjasafninu? Plöntur í grasagarði eru jafn dýrmætir safngripir eins og listaverk á vegg eða askur í hillu,“ segir Ásta Camilla í bréfi sínu.

Alltaf farið vel fram

Reynir Grétarsson, skipuleggjandi hátíðarinnar og eigandi LYST, segir hátíðina hafa farið vel fram öll þau ár sem hún hafi verið haldin. Reynt sé að standa vel að hátíðinni og í sátt við garðinn. Þannig hafi verið sérstök gæsla fyrir beðin og brýnt fyrir gestum að ganga vel um.

Að þessi sinni kynna fimmtán brugghús framleiðslu sína. Sá hluti hátíðarinnar er á milli klukkan 13:00 og 18:00 á laugardag. Reynir segir að hátíðin hafi aldrei verið stórt fyllerí og flestir gestir kunni sig.

Hann er þó meðvitaður um að ákveðin togstreita hafi verið um hátíðina en skipuleggjendur hafi aldrei sýnt neitt annað en samstarfsvilja um að halda garðinum fínum. Hann bendir á að nýbúið sé að halda 17. júní hátíð í garðinum. Þar sé þar að auki veitingastaður- og kaffihús og svið fyrir viðburði.

„Mér finnst ömurlegt að garðyrkjufólk sé að kvarta yfir þessu. Flest þeirra hafa ekki mætt á þetta,“ segir Reynir.

Lokahnykkur hátíðarinnar í ár er tónleikar í lystigarðinum sem Reynir segir að séu þeir flottustu til þessa. Þar troða Rakel Sigurðardóttir, Bríet, Una Torfadóttir og Jói Pé og Króli upp.