Til­gáta um að laun­morðingi hafi farið manna­villt þegar Jón Þröstur hvarf

Í frétt írska blaðsins Irish Times er því haldið fram að fjölskylda Jóns Þrastar telji að leigumorðingi sem hafi verið ráðinn til þess að myrða annan Íslending sem var á Írlandi á sama tíma og hann hafi drepið Jón Þröst fyrir mistök.

Þar segir ennfremur að írska lögreglan telji að einstaklingar á Íslandi kunni að búa yfir vitneskju um örlög Jóns Þrastar en að þeir veigri sér við að ræða við íslensku lögregluna. Vonast sé til að þeir séu fúsari til þess að ræða við írska rannsóknarlögreglumenn.

Alls stendur til að írsku lögreglumennirnir taki skýrslu af 35 manns. Það verður gert undir forræði og undir stjórn íslensku lögreglunnar. Írsku lögreglumennirnir hafa ekki heimild til þess að handtaka eða ákæra fólk á Íslandi.

Írska lögreglan gerði leit á fjórum stöðum í Dyflinni í apríl. Líkleitarhundar eru sagðir hafa verið með í för. Leitin var gerð á grundvelli ábendinga sem bárust eftir að írska og íslenska ríkisútvarpið birtu hlaðvarpsþáttaröð sem þau unnu saman um hvarf Jóns Þrastar.

Síðast spurðist til Jóns Þrastar á Bonnington-hótelinu í norðanverðri Dyflinni 9. febrúar árið 2019. Engar vísbendingar eru um hvert hann fór né hvað varð af honum. Hann var í borginni til þess að taka þátt í pókermóti með félaga sínum. Hann hafði ekki komið til Dyflinnar áður og þekkti engan þar.