Innlent

Brosa hringinn á upphafsdegi strandveiða

Margrét Helga Erlingsdóttir skrifar
Örn Pálsson, framkvæmdastjóri Landssambands smábátaeigenda segir daginn í dag stóran í huga strandveiðimanna.
Örn Pálsson, framkvæmdastjóri Landssambands smábátaeigenda segir daginn í dag stóran í huga strandveiðimanna.

Strandveiðimenn brosa hringinn í dag á upphafsdegi strandveiðitímabilsins að sögn framkvæmdastjóra Landssambands smábátaeigenda. Hann segir mikið tilhlökkunarefni að sjá hafnirnar fyllast af lífi og segir mikið muna um fleiri strandveiðidaga.

Fiskistofu bárust hátt í níu hundruð umsóknir um veiðileyfi til strandveiða nú fyrir sumarið sem er mikil fjölgun frá því í fyrra en samkvæmt nýjustu tölum frá Fiskistofu hefur hún afgreitt 779 leyfi. Í fyrra tóku sjómenn á 756 bátum þátt í strandveiðunum. Ríkisstjórnin hefur heitið strandveiðimönnum 48 veiðidögum eða tólf veiðidögum í hverjum mánuði til og með ágúst.

Dagurinn í dag markar upphaf veiðanna. Örn Pálsson, framkvæmdastjóri Landssambands smábátaeigenda segir daginn í dag stóran í huga strandveiðimanna.

„Þeir brosa allan hringinn kallarnir núna, og svo eru náttúrulega fullt af konum komnar í þetta líka þannig að þetta er mikill og stór dagur. Við fáum 48 daga í sumar og allir ánægðir með það.“

Hin síðustu ár hafi konum fjölgað sem ástundi strandveiðar.

„Þær láta vel af því þær sem eru búnar að fara nokkur skipti, að þetta gangi bara ljómandi vel þannig að ég býst við því að þær fari að hasla sér völl þarna eins og á fleiri sviðum.“

Örn rekur fjölgun umsókna um leyfi aðallega til tveggja þátta, þótt rómantíkin á sjónum sé vissulega mikið aðdráttarafl.

„Það er svona orðið þrengra um pláss hjá stærri útgerðinni því sjómenn sem hafði verið sagt upp þar eða skertir að einhverju leyti að þeir leita í strandveiðarnar. Nú síðan voru grásleppuveiðarnar kvótasettar og kvótinn var svo lítill hjá mörgum þessara aðila og sumir fengu ekki neitt og þeir hafa leitað í strandveiðarnar sem geta þá svarað þessari skertu afkomu hjá þeim.“

Það mátti nema mikla tilhlökkun í Erni.

„Þetta er mjög skemmtilegt að sjá núna hvernig lífið færist yfir þessar hafnir, þær fyllast af bátum, menn fullir eldmóðs og spjalla saman og hjálpa hvorum öðrum. Þetta er alveg hreint mjög mikið svoleiðis,“

Já, er þetta alveg samfélag?

„Þetta er samfélag, það er víst ábyggilegt, það er það. Þarna hittast menn sem hafa kannski aldrei sést áður og það tekst með þeim vinátta og helst jafnvel út ævina ein sog ég hef orðið var við.“


Tengdar fréttir

Ráðherra skoðar frekari girðingar á strandveiðar

Óheftar 48 daga strandveiðar í sumar gætu þýtt að heildarafli veiðanna fari fimmtán- til tuttugu þúsund tonnum fram úr því aflamagni sem ætlað er til veiðanna. Hanna Katrín Friðriksson atvinnuvegaráðherra segir liggja ljóst fyrir að gera þurfi einhverjar breytingar og horfa til þess að setja frekari girðingar til að tryggja sjálfbærni veiðanna.

Strandveiðar augljóslega ekki ábatasamasta leiðin við veiðar

Daði Már Kristófersson, fjármála- og efnahagsráðherra, segir að skýrslur hafi leitt í ljós að strandveiðikerfið hafi ekki verið brú fyrir nýliðun inn í aflamarkskerfið eins og vonast hafði verið til. Hann segir það augljósa staðreynd að ef strandveiðar væru ábatasamasta leiðin við að stunda veiðar væru allar hafnir fullar af trillum. Kannanir hafi þó sýnt að Íslendingar vilji að gætt sé jafnræðis milli sjónarmiða um hagræði og byggðasjónarmiða.

Segir fullan ein­hug um öll mál hjá sam­hentri ríkis­stjórn

Kristrún Frostadóttir forsætisráðherra flutti sína fyrstu stefnuræðu á Alþingi í kvöld. Í ræðunni sagði hún fulla einingu í ríkisstjórn um þau málefni sem fram komi í þingmálaskrá og kynnti næstu skref stjórnarinnar. Hún sagði þjóðina í senn vera heppna með Þorgerði Katrínu Gunnarsdóttir, og mega vera stolta af Ingu Sæland, samráðherra hennar í ríkisstjórn.




Fleiri fréttir

Sjá meira


×