Eld­rauð Kaup­höll: Banda­ríkja­menn horfi fram á lakari lífs­kjör

Verðfall varð á Wall Street þegar virði hlutabréfa tók góða dýfu við opnun markaða. Hið sama má segja um markaði í öðrum hlutum heimsins og er Ísland þar ekki undanskilið en allar tölur í Kauphöllinni voru rauðar í dag. Snorri Jakobsson hagfræðingur segir alveg ljóst að nýir tollar Bandaríkjastjórnar hafi skapað óvissu á mörkuðum.

Óvissa fari illa í fjárfesta

„Óvissa fer alltaf illa í fjárfesta og svo er náttúrulega það sem mest hefur áhrif hér þessu afleiddu áhrif af þessari væntanlegu lífskjararýrnun sem verður.“

Snorri segir sömuleiðis að ljóst sé að vöruverð í Bandaríkjunum muni hækka á næstunni. Líkur séu á að verðbólga muni þar aukast. Það muni hafa áhrif hér heima.

„Það gæti dregið úr komu ferðamanna til Íslands og lakari lífskjör í Bandaríkjunum dregur úr eftirspurn þar eftir vörum sem eru íslenskar og erlendar og hvaðan sem þær koma.“

Segir ekki doktorum að framleiða pallbíla

Erfitt sé að segja til um það hvenær markaðir muni jafna sig.

„Það er rosalega erfitt að segja hvað markaðir munu gera. Hvort að þetta fari að snúa við í næstu viku. Það gæti alveg gerst. Það er erfitt að skilja þessar miklu lækkanir á íslenska markaðnum vegna þess að Ísland kom mjög vel út úr þessu miðað við aðrar þjóðir og það er fyrst og fremst þessu afleiddu áhrif sem gætu haft áhrif, það er að segja möguleg kaupmáttarýrnun í Bandaríkjunum.“

Eitt af markmiðum Bandaríkjaforseta með tollunum er að auka innlenda framleiðslu. Snorri segir það að það muni taka langan tíma.

Þú segir ekkert doktor visthverfisfræða að fara að setja saman pikköpp bíla. Sömuleiðis eru framleiðsluferlar orðnir miklu flóknari heldur en var.