Neymar ætlar sér að koma aftur til Evrópu eftir Santos ævin­týrið

Neymar gerði bara sex mánaða samning við Santos en hann ætlar ekki að enda feril sinn þar heldur reyna að koma honum aftur á skrið.

Heimildir ESPN herma að Neymar vilji síðan komast til liðs í einu af fimm bestu deildum Evrópu að þessum sex mánuðum loknum.

Al Hilal og Neymar gerðu á mánudaginn starfslokasamning sex mánuðum áður en samningur leikmannsins átti að renna út. Neymar hafði verið orðaður við bandarísku félögin Inter Miami og Chicago Fire en fljótlega kom í ljós að hann væri á leiðinni aftur til Santos.

Hinn 32 ára gamli framherji ætlar sér að nota tímann hjá Santos til að koma sér aftur í gang eftir meiðslahrjáð ár. Neymar spilaði ekki marga leiki með Al Hilal og spilaði síðast í Evrópu með franska félaginu Paris Saint-Germain.

Neymar verður kynntur formlega til leiks á Pacaembu leikvanginum í Sao Paulo á morgun og hann gæti spilað sinn fyrsta leik á móti Botafogo SP 5. febrúar.

Neymar spilaði með Santos frá 2009 til 2013 en hann skoraði þá 136 mörk í 225 leikjum. Það fór hann síðan til Barcelona.