Stjórn­sýslan í kringum sjókvíaeldi sé gölluð

Þann 12. desember gaf Matvælastofnun út tillögu að rekstrarleyfi Kaldvíkur hf til fiskeldis í Seyðisfirði. Frestur til að skila inn athugasemdum við tillöguna er til 20. janúar næstkomandi. 

Í ljósi þessa setti VÁ - félag um vernd fjarðar, af stað undirskriftasöfnun þar sem biðlað er til nýrrar ríkisstjórnar um að stöðva áformin. Benedikta Guðrún Svavarsdóttir fer fyrir félaginu. Hún ræddi málið, ásamt Katrínu Oddsdóttur lögmanni, í kvöldfréttum Stöðvar 2 í kvöld.

Benedikta segir íbúa í Seyðisfirði hafa barist fyrir gegn sjókvíaeldi í Seyðisfirði í fjögur ár. Hún segir samtökin koma fram fyrir meirihluta íbúa bæjarins. Þau hafi tekið þátt í öllu samráði sem þeim hefur staðið til boða að taka þátt í en það hafi ekki dugað. Ekki hafi verið hlustað á þau.

„Svo er þetta bara náttúra og lífríki Íslands sem er undir og okkur ber að vernda, en ekki afhenda á silfurfati til aðila sem vilja eyðileggja hana og græða heilmikla fjármuni á henni.“

Katrín Oddsdóttir lögmaður segir það skipta sig miklu máli að koma í veg fyrir að þessi framkvæmd verði að raunveruleika.

„Ég elska Seyðisfjörð og held að það skipti verulega miklu máli að fólk fái að taka ákvarðanir um sitt nærumhverfi sjálft. Ég held það sé ekkert hægt að segja fólkinu á Seyðisfirði að það eigi að fá sjókvíaeldi, hvort sem það vill það ekki ekki. Það er fráleitt.“

Stjórnsýslan gölluð

Katrín segist hafa kynnt sér þennan málaflott ítarlega síðastliðið ár og segir stjórnsýsluna í kringum málaflokkinn mjög gallaða. Fyrir vikið skili hún gölluðum niðurstöðum, gölluðum leyfum og ólögmætum framkvæmdum.

„Það gengur ekki að hafa það þannig lengur,“ segir hún og að hún vonist til þess að það verði hægt að breyta henni.

Umsagnarfrestur vegna framkvæmdarinnar rennur út næsta mánudag. Katrín segir að í fyrra hafi hún látið reyna á nokkuð mál hjá úrskurðarnefnd umhverfis- og auðlindamála og í kjölfarið einhver leyfi frá MAST ógild.

„Það er ekki þannig að þetta er fullkomin stjórnsýsla og við þurfum bara að treysta þessum stofnunum. Því miður,“ segir hún og að það hafi til dæmis verið erfitt að nálgast gögn um sjókvíaeldi.

Benedikta segist þó bjartsýn á framhaldið, þó svo að málið sé komið í þetta ferli. Hún bendir á að fyrir kosningar hafi fulltrúar frá öllum flokkum sem nú sitja í ríkisstjórn, á fundi Landverndar, að þau myndu vilja stöðva þessa leyfisveitingu.

„Nú erum við því komin með þessa undirskriftasöfnun í gang og við viljum fá umboð landsmanna til að fara með það mál áfram og þá veit ég að þau geta gert það sem er rétt í þessu máli,“ segir Benedikta að lokum.