Ætlar ekki í for­manninn og varar við eftir­líkingum

Þetta kemur fram í færslu hans á Facebook. 

Þar segir hann mikið og víða skrafað um hver muni taka við keflinu af Bjarna Benediktssyni, sem formaður Sjálfstæðisflokksins. Flokkurinn standi á tímamótum eftir að hafa goldið afhroð í síðustu Alþingiskosningum og margir spyrji sig hvort flokkurinn hafi glatað erindi sínu.

Stefán segir ljóst að Sjálfstæðisflokkurinn geti ekki gengið að því sem vísu að fjórðungur, hvað þá þriðjungur, kjósenda ljái málflutningi hans eyra. 

Það breyti þó engu um erindi sjálfstæðisstefnunnar eða mikilvægi hennar. „Hún mun annað tveggja, finna sér áframhaldandi farveg með Sjálfstæðisflokknum eða hreinlega einhvern annan. Stjórnmálaflokkar koma og fara en hugsjónir gera það síður,“ skrifar hann.

„Einhverjir myndu halda því fram að ég megi síst við slíku“

Stefán segir ekki skrítið að öllum steinum sé velt við og svara leitað við því hver sé líklegastur til að geta veitt Sjálfstæðisflokknum þá forystu sem hann þarf í ljósi þeirrar þröngu stöðu sem flokkurinn er í, bæði á þjóðarsviðinu og í Reykjavík „þar sem eyðimerkurganga hans hefur varað í meira en þrjá áratugi“.

Margir hafi þar verið nefndir til sögunnar, sumir af augljósum ástæðum en aðrir séu sóttir um lengri veg og þeim komið á framfæri í umræðunni. Það sé hollt, skynsamlegt og ekki síst skemmtilegt.

„Mér að miklum óvörum hefur mitt nafn dúkkað upp í þessu tali öllu á opinberum vettvangi, og er sennilega afleiðing af því að Sjálfstæðismenn, vítt og breitt um landið, hafa hvatt mig til að íhuga framboð og enn aðrir hafa skorað á mig í sama tilliti,“ skrifar hann.

„Allt er það að sjálfsögðu til þess gert að kítla hégómann pínulítið - en einhverjir myndu halda því fram að ég megi síst við slíku. Dæmi hver fyrir sig.“

Hann segist ekki hafa leitt hugann að formannsframboði „svo nokkru nemi“ þó hann sé þakklátur fyrir það að fólk á öllum aldri trúi því að hann geti risuð undir ábyrgð af þessu tagi.

Einhver húmoristi nýtt sér nafnið

„Staðreyndin er sú að ég hef verið, og er, önnum kafinn við að halda uppi kröftugri þjóðfélagsumræðu undir merkjum Spursmála. Það er ærið nóg dagsverk, og ég trúi því einnig að það skipti sköpum fyrir lýðræðisþróunina í landinu,“ skrifar hann í færslunni.

Sá vettvangur hafi vakið áhuga fólks á stjórnmálum, meðal ungra, eldra fólks og þeirra sem hafa gefið þessum anga samfélagsins lítinn gaum fram til þessa.

„Að því sögðu vil ég koma því á framfæri að nýr aðgangur á Instagram er ekki tengdur mér með neinu móti að öðru leyti en því að einhver húmoristinn hefur nýtt snjáldruna á mér til skreytingar, auk nafnsins sem foreldrar mínir gáfu mér 10. desember 1983,“ skrifar hann í færslunni.

„Betra hefði verið að hafa mig með í ráðum við það föndur allt. Þá hefði þessi „síða“ ekki litið dagsins ljós, og ég ekki angrað fólk með þessum hugleiðingum, þar sem ég sit á flugvelli í Bandaríkjunum og bíð þess að komast heim til Íslands. Landsins sem sannarlega er sterkt, svo lengi sem sjálfstæðisstefnan nýtur hljómgrunns meðal Íslendinga,“ skrifar hann að lokum.

Færslu Stefáns má lesa í heild sinni hér fyrir neðan: