Rashford til í að fara: „Til­búinn í nýja á­skorun“

Nýi stjórinn Ruben Amorim tók bæði Rashford og Alejandro Garnacho út úr leikmannahópi United fyrir 2-1 sigurinn gegn Manchester City á sunnudag. Amorim tók skýrt fram að það væri ekki vegna agabrota, en gaf í skyn að leikmennirnir hefðu ekki staðið sig sem skyldi bæði innan sem utan vallar.

Rashford er 27 ára gamall, fæddur í Manchester-borg og nemandi í Button Lane, skólanum þar sem 420 krakkar fengu jólagjöf frá honum í gær.

Fáið ekki nein neikvæð ummæli um Man. Utd þegar ég fer

Hann hefur alltaf verið United-maður, og skorað 138 mörk í 426 leikjum síðan hann kom fyrst inn í United-liðið árið 2016. Núna virðist sem að tíma hans hjá United sé að ljúka, jafnvel strax í næsta mánuði þegar félagaskiptaglugginn opnast.

„Ef ég veit að staðan er þegar slæm þá ætla ég ekki að gera hana verri. Ég hef séð hvernig það hefur verið þegar aðrir leikmenn hafa farið í gegnum tíðina, og ég vil ekki vera þannig. Þegar ég fer þá mun ég gefa út yfirlýsingu og hún verður frá mér,“ sagði Rashford í viðtali við Henry Winter.

„Þegar ég fer þá verða engar sárar tilfinningar. Þið munuð ekki fá nein neikvæð ummæli frá mér varðandi Manchester United. Þannig er ég sem manneskja,“ sagði Rashford og er greinilega fararsnið á honum.

„Ég tel sjálfur að ég sé tilbúinn í nýja áskorun og næstu skref.“

Sagður vilja vera áfram

BBC hefur eftir heimildarmönnum sínum að Rashford vilji í raun mest af öllu halda kyrru fyrir á Old Trafford, komast í byrjunarlið Amorims og festa sig þar í sessi. Hann sé hins vegar raunsær, eftir að hafa neyðst til að horfa á stórleikinn við City í sjónvarpinu heima hjá sér.

Rashford er næstlaunahæstur hjá United, á eftir Casemiro, og ljóst að það eru ekki mörg félög sem geta útvegað honum svipuð laun. Franska félagið PSG hefur oftast verið nefnt til sögunnar og BBC nefnir einnig möguleikann á að hann fari til Sádi-Arabíu en hefur eftir heimildum að Rashford þyki það ekki freistandi. Henry Winter, sem tók viðtalið við Rashford í gær, nefnir Spán sérstaklega sem mögulegan áfangastað.