Ætla að binda enda á skattaívilnun fyrir rafmagnsbíla

Þetta hefur Reuters eftir heimildarmönnum sínum meðal Trump-liða en talið er að breytingin muni koma verulega niður á rafmagnsbílavæðingu í Bandaríkjunum, sem hægt hefur verulega á.

Forsvarsmenn Tesla, stærsta rafmagnsbílaframleiðanda Bandaríkjanna, hafa sagst styðja þessar ætlanir en Joe Biden, núverandi forseti, hóf þessar skattaívilnanir.

Elon Musk, eigandi Tesla og auðugasti maður heims, sagði í sumar að niðurfelling skattaívilnana myndi koma niður á sölu fyrirtækisins til skamms tíma en hann væri þó hlynntur slíkum aðgerðum. Það væri vegna þess að það myndi koma mun verr niður á samkeppnisaðilum Tesla eins og General Motors og þannig hagnast Tesla til lengri tíma.

Musk tók virkan þátt í kosningabaráttu Trumps og er sagður vinna náið með teymi Trumps. Þá hefur Trump gert Musk að sérstökum ráðgjafa sínum um niðurskurð og sparnað innan stjórnkerfisins.

Í frétt Reuters segir að Tesla hafi selt tæplega helming allra rafmagnsbíla í Bandaríkjunum á þriðja fjórðungi þessa árs. Aðrir bandarískir bílaframleiðendur séu þar langt á eftir. Þessi fyrirtæki hafa þó saxað verulega á forskot Tesla á undanförnum árum.

Það sést á því að árið 2020 seldi Tesla rúm áttatíu prósent allra rafmagnsbíla í Bandaríkjunum.

Sérfræðingar segja niðurfellingu skattaívilnana þýða að samkeppnisaðilar Tesla eigi erfiðara með að halda í við fyrirtækið til lengri tíma.

Mike Murphy, Repúblikani sem stýrir hagsmunahópi rafmagnsbílaframleiðenda, segir í samtali við Reuters að ætlanir teymis Trumps muni koma verulega niður á bandarískum bílaframleiðendum, sem séu ekki bara að berjast við Tesla heldur einnig kínverska framleiðendur sem fá verulegar niðurgreiðslur frá yfirvöldum í Kína og hafa verið að auka markaðshlutdeild sína um heiminn allan.

„Trump-liðar eru að sýna að þeir hafa engan áhuga á að hjálpa bandarískum bílaframleiðendum að lifa af hina væntanlegu kínversku innrás,“ sagði Murphy.