Ís­lenskur HM-fari í Stjörnuna

„Eftir þrettán ár í atvinnumennsku er ég hæstánægður með að vera kominn í Stjörnuna og að allt sé klappað og klárt,“ segir Samúel Kári í fréttatilkynningu.

„Stjarnan er á mjög spennandi vegferð og leikstíll þeirra hentar mér mjög vel og hlakkar mig mikið til þess að taka þátt í því, og vonast til að geta nýtt reynslu mína í þetta verkefni ásamt þvi að gera atlögu á titla og Evrópu,” sagði Samúel Kári.

Samúel Kári er uppalinn hjá Keflavík og lék þar sína fyrstu meistaraflokksleiki áður en hann gekk í raðir Reading á Englandi, aðeins 17 ára gamall.

Hann var hjá Reading til ársins 2016, en lék þó ekki með aðalliði félagsins, og fór svo til Vålerenga í Noregi. Hann var leikmaður Vålerenga þegar hann var valinn í fyrsta HM-hóp íslenskrar fótboltasögu, sem fór til Rússlands 2018, og á alls að baki átta A-landsleiki.

Samúel Kári lék einnig sem lánsmaður hjá Viking, í norsku úrvalsdeildinni, en fór svo til Paderborn í Þýskalandi í janúar 2020 og lék fimm leiki í efstu deild Þýskalands.

Hann sneri svo aftur til Viking en fór þaðan til Atromitos á Grikklandi þar sem hann hefur spilað síðustu tvö ár.

„Það er gríðarlega ánægjulegt að fá Samúel til liðs við okkur og við erum sannfærðir um að hann muni smellpassa inní það sem við höfum verið að gera í Garðabænum undanfarin ár. Eins og flestir vita þá tókum við fyrir nokkrum árum ákvarðanir um hvernig við viljum staðsetja okkur í íslenskum fótbolta og höfum unnið markvisst að þeirri hugmyndafræði og höfum verið leiðandi í því og núna er kominn tími til að stíga næstu skref á þeirri vegferð sem við höfum verið á. Liðið okkar er frábært og það eru ákaflega spennandi tímar framundan hjá okkur í Stjörnunni,“ segir Helgi Hrannarr Jónsson, formaður meistaraflokks karla í fótbolta hjá Stjörnunni.