Frelsis­flokkurinn stærstur í Austur­ríki

Frelsisflokkurinn (FPÖ) er þjóðernissinnaður hægri flokkur sem talar fyrir harðri innflytjendastefnu og hefur uppi efasemdir um áframhaldandi stuðning við Úkraínu gegn Rússum. Innflytjendamál, Úkraína, og verðbólgan voru fyrirferðamikil atriði í kosningabaráttunni.

Fyrstu útgönguspár gefa til kynna að flokkurinn fái 29,1 prósent atkvæða, og verði stærsti flokkurinn á þingi. Næststærstur er ÖVP, hefðbundnari íhaldsflokkur í líkingu við kristilega demókrata, með 26,3 prósent atkvæða.

Karl Nehammer, formaður næststærsta flokksins ÖVP, hefur sagt að ómögulegt væri að taka þátt í ríkisstjórn með Frelsisflokknum. Það væri „ómögulegt að vera í ríkisstjórn með fólki sem er hrifið af samsæriskenningum.“

Það er því ekki ljóst hvort góður árangur Frelsisflokksins geti skilað þeim í ríkisstjórn.

Þriðji stærsti flokkurinn samkvæmt spánni eru Sósíaldemókratar með 21 prósent, svo frjálslyndi flokkurinn NEOS með 9 prósent atkvæða og loks Græningjar með 8,3 prósent atkvæða.

Kommúnistaflokkur Austurríkis fær 2,4 prósent atkvæða, og Bjórflokkurinn 2 prósent.