Fjöl­skylda flug­manns Icelandair vill að lög­regla rann­saki and­lát hans

Sólon Guðmundsson var 28 ára þegar hann lést 25. ágúst síðastliðinn. Hann hafði þá starfað sem flugmaður hjá Icelandair í um sex ár. Í apríl síðastliðnum lagði Sólon fram kvörtun til mannauðsdeildar Icelandair vegna eineltis, sem hann taldi sig hafa orðið fyrir af hálfu tveggja samstarfskvenna.

Hödd Vilhjálmsdóttir talsmaður fjölskyldu Sólons segir hið meinta einelti einkum hafa falist í einhliða frásögnum kvennanna af stuttu sambandi Sólons við aðra þeirra. Hödd segir Icelandair að lokum hafa slegið eineltiskvörtunina út af borðinu, þar sem ekki væri hægt að meina konunni að tjá sig um sína upplifun.

„Þetta hélt áfram. Ef eitthvað er versnuðu sögurnar inni í félaginu og þetta var komið út fyrir félagið líka. Hann upplifði sig... honum leið ömurlega, við getum orðað það þannig,“ segir Hödd.

Hafi ekkert fengið að vita um ásakanir

Þann 22. ágúst hafi Sólon svo verið boðaður enn einu sinni á fund með mannauðsdeild Icelandair. Hödd segir að þar hafi honum verið tjáð að komnar væru fram nýjar ásakanir á hendur honum.

„Hann fær ekki að vita hvaða ásakanir það eru og það eigi að segja honum upp störfum samkvæmt kjarasamningi og hann er í raun þvingaður til þess að segja upp störfum sjálfur.“

Hödd segir ljóst að Icelandair hafi ekki staðið rétt að málinu, því hafi ekki verið komið í viðeigandi farveg.

„Hann hefði einfaldlega í mesta lagi átt að vera settur í leyfi á meðan málið væri í ferli,“ segir Hödd.

Vilja svör þó að eitthvað misjafnt gæti komið í ljós

Þann 23. ágúst, daginn eftir fundinn, sagði Sólon upp störfum hjá Icelandair í tölvupósti. Tveimur dögum síðar fannst Sólon látinn. Síðustu vikur hefur fjölskylda hans óskað eftir upplýsingum frá Icelandair um umræddar ásakanir, sem Icelandair kveðst ekki heimilt að afhenda. Á þriðjudag skilaði lögmaður fjölskyldunnar því inn beiðni til lögreglu um að hún taki andlát Sólons til rannsóknar.

Hvað vonast þau til þess að fá út úr því? 

„Þau vonast til þess að fá út úr því að vita hvað sonur þeirra á að hafa gert. Því hann vissi það ekki sjálfur. Þetta er í raun fjölskylda að syrgja son sinn,“ segir Hödd.

Fjölskyldan sé reiðubúin til að takast á við hvað sem fram kynni að koma við slíka rannsókn.

„Hvort sem það veitir þeim einhvern frið í hjarta til að halda áfram með sitt, þá allavega fækkar það spurningunum,“ segir Hödd.

Málsmeðferðin „í skötulíki“

Mál Sólons er í ferli hjá Félagi íslenskra atvinnuflugmanna. Jón Þór Þorvaldsson formaður félagsins staðfestir að það verði tekið fyrir í starfsráði, sameiginlegri nefnd félagsins og Icelandair.

Þá hafði fréttastofa samband við Rúdolf Adolfsson geðhjúkrunarfræðing, sem Sólon leitaði til að áeggjan stéttarfélagsins og sat með honum tvo fundi hjá Icelandair. Rúdolf segir að Sólon hafi upplifað vanmátt og hjálparleysi gagnvart stjórnendum hjá mannauðsdeild Icelandair. Þá er það skoðun Rúdolfs að málsmeðferðin hafi verið í skötulíki.

Icelandair segir í svari við fyrirspurn fréttastofu að hugur fyrirtækisins sé hjá fjölskyldu, vinum og vinnufélögum Sólons. Fyrirtækið geti lögum samkvæmt ekki gefið neinar upplýsingar tengdar málinu. Fari málið í þar til gerðan farveg hjá lögreglu muni fyrirtækið að sjálfsögðu aðstoða eftir því sem unnt er.