Taka höndum saman gegn hnífaburði: „Þú ert aumingi“

Fjallað hefur verið um fjöldamörg dæmi hnífaburðar ungmenna síðustu daga. 17 ára stúlka sem stungin var með hnífi í miðborginni lét lífið fyrir helgi. Um helgina voru tveir stungnir í gistiskýlinu Granda og lögregla greindi frá því í morgun að hnífi hafi verið beitt á bæjarhátíðinni Í túninu heima. 

Forsætisráðherra kallar eftir auknum sýnileika lögreglu. Afbrotafræðingur segir útköllum vegna vopnaburðar ungmenna hafa fjölgað verulega en flest segjast ungmennin ganga með hníf til að verja sig. 

„Slepptu því“

Á samfélagsmiðlum er nú mikið rætt um hnífaburð og margir þjóðþekktir einstaklingar sem hafa tekið höndum saman gegn þessu samfélagsmeini. Tiktok-myndband tónlistarmannsins Arons Kristins Jónassonar, þar sem hann ræðir stunguárásina við Skúlagötu, hefur til að mynda fengið um 120 þúsund áhorf.

„Ef þú ert lítill strákur og ert eitthvað „hmm ætti ég að taka hnífinn með mér“, gaur, slepptu því. Það er enginn að fara að stinga neinn, þú ert ekki að fara að stinga neinn. Ef þú ert með hníf á þér þá ættirðu að skammast þín. Þú ert aumingi, Guð blessi þig.“

Villi Neto skemmtikraftur tekur í sama streng. „Þetta er bara ömurlegt, þetta er ógeðslegt. Ekki vera að taka hníf með ykkur.“

Sindri Geir Óskarsson sóknarprestur í Glerárkirkju á Akureyri er vinsæll á samfélagsmiðlinum TikTok.  Hann lætur málið sig varða.

„Sumt sem við gerum er hægt að taka aftur, en ef við tökum líf, þá er ekki hægt að taka það aftur,“ segir Sindri Geir. „Mér er alveg sama hvaða rök þú heldur að þú hafir fyrir því að taka hníf eitthvert. Það er bara kjaftæði, svo skildu hann eftir heima. Hentu honum, eyðileggðu hann og ekki leyfa vinum þínum að komast upp með að mæta vopnaðir eitthvert.“

Sævar Breki Einarsson meðlimur poppsveitarinnar Nussun hefur sambærileg skilaboð. „Ekki taka ákvörðun sem getur eyðilagt bæði líf þitt og annarra.“

Jón Már Gunnarsson kvikmyndagerðarmaður veltir fyrir sér ástæðum þess að ungt fólk beri hnífa almennt. 

„Er þetta accessory eins og gullkeðja eða úr? Er þetta eitthvað sem er töff að vera með? Því ég á erfitt með að trúa því að heil kynslóð sé komin á þann stað að öll átök séu upp á líf og dauða, ég á líka erfitt með að trúa því að fólk upplifi sig í það mikilli hættu við að fara niður í bæ, að það vopnist.“

„Við þurfum að standa saman gegn þessu. Ekki vera með hníf, ekki umgangast fólk sem er með hníf. Tökum skýra og sterka afstöðu: enga hnífa í kringum mig, út með þig.“

„Ekki vera aumingi með hníf,“ eru sömuleiðis skilaboðin á mynd sem gengið hefur um samfélagsmiðla.