Hrikalega spennandi grillkeppni á Kótilettunni

Jakob Bjarnar skrifar 15. júlí 2024 16:04

Sigurvegarar í Grillkeppninni, þeirri svölustu á landinu, voru þau Marín Hergis Valdimarsdóttir í flokki áhugamanna og David Clausen Pétursson í flokki fagmanna. Þau eru þarna með sjálfum BBQ-kóngnum Alfreð Fannari Björnssyni sem var formaður dómnefndarinnar. mummi lú

Einar Bárðarson, tíðindamaður Vísis, fylgdist grannt með helstu grillkeppni landsins sem fram fór á Kótilettunni, nema hvar, um helgina.

Mikið fjör var á grillkeppninni og var hörð keppi um Grillpylsu ársins. Saman komnir voru allir helstu grillsérfræðingar landsins, bæði í fagmanna- og áhugamannaflokki. Og auðvitað á útihátíðinni Kótilettunni sem vex fiskur um hrygg með hverju árinu.

„Það ætti ekki að hafa komið neinum á óvart því þar fór fram keppnin um „Grillpylsu ársins“ sem er mjög vinsæl keppnin enda landsmenn sólgnir í grillaðar pylsur,“ segir Einar.

Og í ár var ekkert gefið eftir. dómnefndin átti fullt í fangi með að vega og meta hvaða pylsa væri best. Á hátíðinni voru öll stærstu grillmerki landsins með sýningarbása og allir helstu kjötframleiðendur kepptust við að fanga bragðlauka gesta og gangandi.

Í keppninni um „Grillmeistarann“ var það Marín Hergils Valdimarsdóttir sem sigraði í flokki áhugamanna en í flokki fagmanna var það sjálfur David Clausen Pétursson sem sigraði. Þetta er annað ári í röð sem David hampar þessum titli.

David Clausen sigraði annað árið í röð og skortir ekkert á fagmanneskuna við grillið á þeim bænum.mummi lú

Hvort um sig hlaut ostakörfu frá MS, grill og kol frá Weber, gjafapoka frá BBQ Kónginum og gjafabréf frá Sælkerabúðinni. Í keppni framleiðenda um titilinn „Grillpylsa ársins“ var það Ali sem bar sigur úr bítum.

Dómnefndin var ekki skipuð neinum veifiskötum: Inga Katrín Guðmundsdóttir betur þekkt sem grilldrottningin, þá BBQ kóngurinn Alfreð Fannar Björnsson sem jafnframt formaður dómnefndar, Ívar Örn Hansen sem við þekkjum sem „Helvítis kokkinn“ á Stöð 2 og Jóhann Sveinsson var fulltrúi Íslenska kokkalandsliðsins í ár.

Dómnefndin var vígaleg að venju en þarna eru þau: Inga Katrín Guðmundsdóttir betur þekkt sem grilldrottningin, þá kóngurinn Alfreð Fannar Björnsson, Ívar Örn Hansen sem við þekkjum sem Helvítis kokkinn á Stöð 2 og Jóhann Sveinsson sem var fulltrúi Íslenska kokkalandsliðsins.mummi lú

Kynnir var Gústi B og reynir Einar að ljúga því í blaðamann að fáir viti að B-ið standi fyrir BBQ en það er bannað að ljúga í blaðamenn. En það breytir ekki því að Gústi fór á kostum.

Kótelettan og Styrktarfélag krabbameinssjúkra barna voru svo með sína árlegu sölu á kótelettum á hátíðinni. Söfnunin var haldin í samstarfi við Kjötbankann, Ali matvörur, kjarnafæði, SS og Stjörnugrís. Steindi og Auddi voru meðal þeirra sem rifu í grillspaðana og létu gott af sér og frá sér leiða.

Kótelettan og samstarfsaðilar hennar eru með þessu árlega verkefni sínu einn stærsti stuðningsaðili Styrktarfélagsins á Íslandi.