Taktu þátt í Ford Fanta­sy leik Bestu deildar karla

Fyrir þau sem þekkja ekki fantasy leikinn snýst hann um að velja ellefu leikmann úr liðum deildarinnar sem síðan safna stigum eftir því hvernig þeim gengur innan vallar, t.d. með skoruðum mörkum, markvörslu, stoðsendingum og fleiri þáttum en leikurinn er keyrður áfram á rauntíma tölfræði frá Opta að sögn Björns Þórs Ingasonar, markaðsstjóri Íslensks Toppfótboltans. „Þar sem spilarar eru almennt að velja leikmenn úr mörgum liðum Bestu deildarinnar í lið sitt þýðir það að þeir fylgjast mun betur með fleiri liðum í sumar en ekki bara sínu uppáhaldsliði. Því auðvitað þarf að fylgjast með sínum leikmönnum og hvort þeir séu að standa sig og afla stiga fyrir fantasy liðið sitt. Leikmenn fá eingöngu stig út frá mælanlegum hlutum leiksins. Þau uppfærast í rauntíma og því er hægt að sjá hvernig stigin breytast á meðan leikirnir fara fram.“

Leikurinn fór fyrst í loftið sumarið 2022 og hefur þróast jafnt og þétt síðan auk þess sem spilurum hefur fjölgað með hverju árinu. „Í dag eru um 9000 manns að spila leikinn en fyrsta sumarið tóku um 4000 spilarar þátt. Þessa stöðugu fjölgun spilara má vafalaust bæði rekja til þróunar leiksins en ekki síður til þess að æ fleiri þekktir leikmenn spila nú í Bestu deild karla. Ford Fantasy leikurinn er virkilega skemmtileg viðbót við fótboltasumarið enda fær hann spilara til að fylgjast með fleiri leikjum og leikmönnum en hægt er að skipta út leikmönnum meðan leikurinn stendur yfir.“

Eins og staðan er í dag nær leikurinn eingöngu til Bestu deildar karla en að sögn Björns er engin rauntíma tölfræði keyrð í Bestu deild kvenna. „Það myndi skemma upplifun spilara talsvert ef leikurinn væri keyrður á 1-2 daga gamalli tölfræði og því eru stelpurnar ekki komnar inn í leikinn. Við höfum verið í viðræðum við forsvarsmenn félaganna sem hafa tekið þá ákvörðun að skoða aðrar leiðir til að koma til móts við stuðningsmenn kvennaboltans. Við vonumst þó að sjálfsögðu eftir því að Besta deild kvenna komi sem fyrst inn í leikinn okkar.“

Skráning fer fram á fantasy.bestadeildin.is og það kostar ekkert að taka þátt. „Leiknum lýkur svo með síðasta flauti tímabilsins í október en sigurvegarinn hlýtur í verðlaun ferð á enska boltann á næsta tímabili.“

Nánari upplýsingar á fantasy.bestadeildin.is.