„Eins og að ganga inn í slátur­hús“

Eiginkonan lést í nóvember sem leið og því var notast við vitnisburð hennar hjá lögreglu í stað vitnaleiðslu fyrir dómi. Hún var lykilvitni í málinu, en miðað við lýsingar hennar og Steinþórs Einarssonar, sem er ákærður fyrir manndrápið, varð hún vitni að átökum milli Tómasar og Steinþórs, sem leiddu til dauða Tómasar.

Lýsingar konunnar á atburðum næturinnar í október í fyrra voru að mörgu leyti í samræmi við lýsingar Steinþórs sem lýsti atvikunum sjálfur í morgun. Í báðum skýrslutökunum var konan sjáanlega í miklu uppnámi.

Konan tjáði lögreglu að hún hefði yfirgefið heimili þeirra Tómasar daginn á undan eftir ósætti og fengið inn í húsinu þar sem átökin áttu eftir að brjótast út. Steinþór dvaldi einnig í húsinu. Þau hefðu setið við eldhúsborðið að spjalla þegar Tómas bar að garði.

Tómas hafi beðið hana um að koma með sér heim, en hún ekki viljað það. Steinþór hafi ítrekað vilja hennar en Tómas tekið því illa og ráðist á hann.

„Erfitt að átta sig á þessu“

Helsti munurinn á framburði konunnar og Steinþórs var að hún sagði að hún hefði reynt að stía þeim í sundur. Í framhaldinu hafi hún heyrt Steinþór spyrja hvort Tómas væri með hníf.

„Ertu með hníf fíflið þitt, ætlar þú að stinga mig?“ hafði konan eftir Steinþóri. Í kjölfarið lýsti hún því að hafa séð mikið blóð. Og að hún hafi hringt á Neyðarlínuna.

„Þetta gerðist ótrúlega hratt. Það er erfitt að átta sig á þessu,“ sagði konan.

Í framburði sínum minntist Steinþór ekki á að konan hafi reynt að skilja þá í sundur. Tómas lét lífið vegna tveggja stungusára, en Steinþór hlaut stungusár í kinn og í læri.

Konan sagði jafnframt að ekki væri um að ræða fyrsta skipti sem Tómas og Steinþór hefðu slegist. Sjálfur sagði Steinþór að hann hefði einungis séð Tómas reiðan einu sinni áður. Vanalega hefði hann verið rólegur og hegðun hans umrætt kvöld ekki í samræmi við það sem hann hafði kynnst. 

Þó sagðist hann vera komin með nóg af ofbeldinu sem Tómas beitti konuna í hjónabandi þeirra.

Vaknaði við öskur

Húsráðandi í húsinu þar sem atvikin áttu sér stað gaf einnig skýrslu fyrir dómi. Hún sagðist hafa hýst eiginkonuna, sem bjó ásamt Tómasi í sömu götu, eftir að hún bankaði upp hjá henni daginn áður með mar í andlitinu. 

Jafnframt sagðist hún hafa orðið vör við lögregluna á heimili konunnar og Tómasar.

Húsráðandinn lýsti því einnig að hún og eiginkonan hefðu drukkið mikið um nóttina. Hún hefði sjálf orðið þreytt og farið að sofa. Hún hafi vaknað við öskur eiginkonunnar og farið úr herberginu sínu og séð Steinþór skríðandi á gólfinu, og síðan Tómas meðvitundarlausan. Hún sagði að allt hafi verið útatað blóði

Heyrði að Steinþór hafi ráðist á Tómas

Karlmaður sem var kallaður fyrir dóminn sem vitni segist hafa heyrt af atvikunum á annan hátt en Steinþór og eiginkonan lýstu. Hann hafi verið á rúntinum með stelpu á Ólafsfirði þegar hann sá konu „sem var eins og hún væri í geðrofi“ í glugga á húsi. Hann hafi hringt á Neyðarlínuna og verið spurður hvort þau kynnu fyrstu hjálp, sem þau gerðu, og þau beðin um að fara í húsið.

„Þegar ég gekk þarna inn var það eins og að ganga inn í sláturhús,“ sagði karlmaðurinn. Hann sagðist hafa átt í samskiptum við konurnar tvær, eiginkonuna og húsráðandann, en virðist hafa ruglað þeim og nöfnum þeirra sama að einhverju leyti. Önnur hefði sagt sér að Steinþór hefði ráðist á Tómas, ólíkt því sem Steinþór hefur sjálfur haldið fram sem og eiginkonan.

Aðspurður hvort hann væri viss um að hann myndi rétt sagðist hann vera „110 prósent viss“ um að konan hefði sagt Steinþór ráðast á Tómas. Hann myndi þetta eins og það hefði gerst í gær.

Þá var hann spurður út í ummæli sem voru höfð eftir honum í lögregluskýrslu. Þar sem hann sagðist hafa heyrt að Tómas hefði ráðist Steinþór. Hann sagði líklegra að hann hefði mismælt sig þá þar sem hann hefði verið í sjokki. Hann stóð því við fyrri ummæli sín.

Karlmaðurinn var spurður út í önnur ummæli sín úr lögregluskýrslunni, sem komu óljóst fram í dómsalnum, á þá leið að Tómas hafi staðið yfir rúmi annarrar konunnar eða Steinþórs vopnaður hníf. Hann mundi ekki eftir að hafa sagt það. Önnur konan hefði sagt mikið við sig á meðan hann reyndi að endurlífga Tómas. Umrædd ummæli hefðu getað verið þar á meðal.