Georg í Sigur Rós selur slotið

Húsið er 212 fermetrar að stærð á tveimur hæðum ásamt kjallara. Húsið var byggt árið 1936 en hefur verið mikið endurnýjað síðastliðin ár. 

Heimilið er hlýlegt og bjart búið fallegum mublum og litríkum innanstokksmunum. Auk þess er fjölmörg og fjölbreytt listaverk sem prýða veggina.

Í eldhúsi er rúmgóð viðarinnrétting með góðu skápaplássi, tvöfaldri quartz borðplötu og stórri eyju sem hægt er að sitja við. Á gólfi eru svartar og hvítar flísar sem gefa rýminu sjarmerandi yfirbragð.

Í lýsingu eignarinnar á fasteignavef Vísis kemur fram að opið er á milli eldhúss, stofu og borðstofu, þaðan er útgengt á suðursvalir og snyrtilegan garð. Fjögur svefnherbergi eru í eigninni, tvö baðherbergi með möguleika á því þriðja og flísalagt þvottahús með baðkari.

Við húsið er vel gróinn garður með sólpalli og glerhýsi með kamínu þar sem hægt væri að rækta grænmeti og ávexti.