Málið kom upp eftir að Hreyfill útilokaði félagsmenn frá því að nýta sér aðra þjónustu á markaði sem þeim stæði til boða, allt frá því að Hopp hóf innreið sína á leigubílamarkað síðasta vor.
Á vef Samkeppniseftirlitsins kemur fram að áfrýjunarnefnin hafi þó fellt úr gildi fyrirmæli Samkeppniseftirlitsins þess efnis að Hreyfill geri nauðsynlegar breytingar á reglum og samþykktum sínum sem kveði á um banni við því að leigubílstjórar í þjónustu Hreyfils nýti sér jafnframt þjónustu annarra leigubílastöðva.
„Segir í úrskurðinum að slíkar breytingar séu ekki nauðsynlegar vegna þess banns sem felst í umræddri bráðabirgðaákvörðun og hafi yfirbragð endanlegrar ákvörðunar í skilningi stjórnsýslulaga. Af þeim sökum fellir áfrýjunarnefndin þann hluta ákvörðunarinnar úr gildi,“ segir á vef Samkeppniseftirlitsins.
Í úrskurði áfrýjunarnefndarinnar segir að ákvörðun Samkeppniseftirlitsins hafi það í för með sér að „...að leigubifreiðastjórum sem starfa í þjónustu Hreyfils, er í sjálfsvald sett hvernig þeir nýta sitt rekstrarleyfi meðan ákvörðunin varir.“
Um málið segir að Samkeppniseftirlitið hafi talið að háttsemi Hreyfils að banna bílstjórum að nýta sér þjónustu annarra stöðva hafi hvorki grundvallast á málefnalegum né hlutlægum forsendum.
„Háttsemi Hreyfils hefði verið til þess fallin að hindra innkomu nýs keppinautar á markaðinn neytendum til tjóns ásamt því að viðhalda þeim takmörkunum, gagnvart meirihluta leigubifreiðastjóra, sem ný lög um leigubifreiðaakstur áttu að uppræta.
Taldi Samkeppniseftirlitið því sennilegt að háttsemi Hreyfils fæli í sér brot gegn bannákvæðum samkeppnislaga og að skilyrði til töku ákvörðunar til bráðabirgða væru uppfyllt,“ segir á vef Samkeppniseftirlitsins.
