Innlent

Ís­lendingur hand­tekinn fyrir líkams­á­rás í Osaka

Hallgerður Kolbrún E. Jónsdóttir skrifar
Íslenski maðurinn er sagður hafa verið handtekinn af lögreglunni í Osaka á laugardag fyrir líkamsárás sem hann á að hafa framið 17. október síðastliðinn.
Íslenski maðurinn er sagður hafa verið handtekinn af lögreglunni í Osaka á laugardag fyrir líkamsárás sem hann á að hafa framið 17. október síðastliðinn. Getty/Takashi Aoyama

Íslendingur á þrítugsaldri hefur verið handtekinn í Osaka í Japan grunaður um að hafa ráðist á leigubílstjóra á sextugsaldri eftir að hann neitaði að greiða fargjald. Utanríkisráðuneytið hefur vitneskju um málið.

Frá þessu er greint á japanska fréttamiðlinum Japan Today og DV greinir fyrst frá íslenskra miðla. Japan Today hefur eftir lögreglunni í Osaka að árásin hafi átt sér stað klukkan 10:30 morguninn 17. október. 

Íslenski maðurinn, sem er 24 ára gamall, er sagður hafa tekið leigubílinn í Kita Ward en neitað að borga fargjaldið, sem voru þrjú þúsund yen eða um 2.800 krónur, þegar hann kom á áfangastað. 

Leigubílstjórinn hafi elt íslenska manninn út úr bílnum, sem hafi kýlt hann nokkrum sinnum í andlitið og svo hlaupið í burt. Leigubílstjórinn er sagður hafa fengið minniháttar áverka. 

Að sögn lögreglu tókst henni að bera kennsl á manninn eftir að hafa skoðað myndefni úr öryggismyndavélum á svæðinu. Maðurinn var handtekinn á laugardag og hefur hann ekki tjáð sig í yfirheyrslum hjá lögreglu. 

Ægir Þór Eysteinsson, upplýsingafulltrúi utanríkisráðuneytisins, segir í svari við fyrirspurn fréttastofu að ráðuneytið viti af umræddu máli en geti ekki veitt upplýsingar um einstök mál.

Japan Íslendingar erlendis
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið